Read Bhaibhiri Idzva rechiShona Muparidzi 7 Bible Online

Muparidzi 7 - Bhaibhiri Idzva rechiShona bible

Muparidzi 7

¹Zita rakanaka riri nani pano mafuta anokosha uye zuva rokufa riri nani pane zuva rokuberekwa.

²Zviri nani kuenda kuimba iri kuchemwa rufu pano kuenda kuimba yemafaro. Nokuti rufu ndiwo maperero omunhu wose. Vapenyu vanofanira kuzvichengeta mumwoyo izvozvo.

³Kusuruvara kuri nani pano kuseka mwoyo unofara unogona kuvanzwa muuso hwakasuwa.

⁴Mwoyo yavangwaru iri muimba inochemwa rufu asi mwoyo yamapenzi iri muimba yemafaro.

⁵Zviri nani kuteerera kutsiura kwomungwaru pano kuteerera rwiyo rwamapenzi.

⁶Kubwabwatika kunoita minzwa pasi pebhodho, ndozvakangoitawo kuseka kwamapenzi izvozvowo hazvinzwisisiki.

⁷Kudzvanyirira mumwe zvakaipa kunoita kuti mungwaru ave benzi. Pfumbamuromo inokanganisa pfungwa dzomunhu.

⁸Kupera kwechinhu kuri nani pane kutanga kwacho. Munhu ano mwoyo murefu ari nani pane ane mweya wokuzvikudza.

⁹Usakurumidze kushatirwa nokuti mumwoyo yamapenzi ndimo mumusha madzo hasha.

¹⁰Usabvunze kuti, “Ko seiko mazuva akare akanga akanaka kupfuura anhasi uno? Mubvunzo wako haubvi muungwaru.”

¹¹Sezvakangoita nhaka, ungwaru chinhu chakanaka chinobatsira vachiri kuona zuva.

¹²Sokuchengetedza munhu kunoita mari ndizvozvowo zvinoita ungwaru kuchengetedza munhu uye chakanakira ruzivo ndechichi chokuti ungwaru hunochengetedza upenyu hwomunhu anahwo.

¹³Rangarira zvakaitwa naMwari. Ndiani angatwasanudze chaanenge akombamisa?

¹⁴Pamazuva okubudirira, fara, kana zvinhu zvaipa mazuvayo, rangarira kuti Mwari ndiye akaita mazuva okutanga aya namazuva echipiri aya kuitira kuti munhu arege kuziva zvichazoitika.

¹⁵Paupenyu hwangu husina zvahwo maturo ndakaona zvose izvi zvokuti. Munhu wakarurama anofa nyangwe akarurama zvake anofa. Kwouyawo munhu akaipa kunyange akaipa anogara upenyu hurefu muzviito zvake zvakaipa.

¹⁶Usapfurikidze pakururama kwako uye rega kupfurikidza pakungwara unodirei kuzviparadza.

¹⁷Rega kupfurikidza pauipi hwako kana kuva benzi chaunofira nguva yako isati yasvika chii?

¹⁸Rega kubva wati nechimwechete tetere uchikanganwa chimwe chiya nokuti munhu anotya Mwari anobudirira mune zvose zviri zviviri.

¹⁹Ungwaru hunosimbisa mungwaru kupinda gumi ravatongi vari muguta.

²⁰Hakuna mururami panyika anoita zvakanaka asingatadzire Mwari.

²¹Usangoteerera zvose zvose zvinotaurwa navanhu ungadaro ukatonzwa musevenzi wako achikureva.

²²Iwe unoziva mumwoyo mako kuti wakamboreva vamwe kazhinji.

²³Zvose izvi ndakazviedza neungwaru ndakati regai ndingware asi ungwaru hwaiva kure neni.

²⁴Zvakaitika kare zviri kure uye zvakadzama, zvakadzamisisa. Ndianiwo zvake angazviwane?

²⁵Ndakazosvika pakuzvibvunzurudza mumwoyo ndikazviedza, ndikatsvagisisa ndichivhima ungwaru neuwandu hwezvinhu uye kuti ndizive kuipa kwoupenzi uyezve kuti upenzi urema chaiho.

²⁶Ndakaona kuti munhukadzi anorwadza kupinda rufu anongova misungo yoga yoga, mumwoyo wake mimbure chaiyo maoko ake zvikachikiro chaizvo. Munhu akarurama pana Mwari anomupunyuka asi mutadzi anokachikirwa naye.

²⁷Muparidzi anoti izvi ndizvo zvandawana ndichinyatsofungisisa chinhu chimwe nechimwe kuti ndiwane kuwanda kwazvo.

²⁸Ndakatsvaka kwenguva ndefu pasina chandakawana. Ndakawana murume mumwechetechete akarurama mukati mechiuru asi pakati pavakadzi vose zvavo hapana wandakawana.

²⁹Chandakaona chete ndechichi chokuti Mwari akasika munhu akarurama asi vanhu ndivo vakazozvitsvakirawo zvavo twakawanda.