Read Bhaibhiri Idzva rechiShona Muparidzi 9 Bible Online

Muparidzi 9 - Bhaibhiri Idzva rechiShona bible

Muparidzi 9

¹Izvozvi zvose ndakazviongorora mumwoyo mangu ndichinyatsozviongorora ndikazviona kuti zviito zvavakarurama navangwaru zviri mumaoko aMwari, zvingave rudo kana ruvengo munhu haangazvizivi. Kwatiri vanhu zvose zvinenge zvisinganzwisisiki.

²Nokuti chinowira mumwe, ndicho chinowira vose, kungave kumururami kana kumuipi kuna vakanaka kana kuna vakaipa kuna vatsvene kana kuna vakan'ora kuna anopira chibayiro kana kuna asingapiri chibayiro. Zvakangofanana kumururami nokumutadzi. Anopika mhiko naasingapiki mhiko zvakangofanana.

³Izvi ndozvakaipa pane zvose zvinoitika pasi pedenga zvokuti tinowirwa nenhamo imwecheteyo. Chimwezve ndechokuti mwoyo yavanhu izere nouipi. Kana vari vapenyu chete kupenga kurimo mumwoyo yavo, mushure macho vanoenda kuvafi.

⁴Asi munhu achiri mupenyu navamwe vose vapenyu anechitarisiro nokuti imbwa mhenyu iri nani pane shumba yakafa.

⁵Chandinodariro ndechokuti vapenyu vanoziva kuti vachafa asi vakafa havana zvavanoziva. Mubayiro havachisina uye zvokuyeukwa hapachina.

⁶Rudo rwavo, noruvengo rwavo, uye shanje yavo zvakaparara. Havachisina kana mugove zvavo narini wose pazvinhu zvinoitwa pasi pedenga

⁷Enda udye chokudya chako nomufaro unwe waini yako nemwoyo unofara nokuti Mwari anofadzwa nezviito zvako.

⁸Gara wakapfeka zvichena. Gara wakazora mafuta mumusoro.

⁹Gara uchifara nomukadzi wepamwoyo pako mazuva ako ose ohupenyu hwako husina maturo aakakupa pasi pedenga nokuti ndiwo mugove wako paupenyu uye pabasa rako raunoshingaira kuita pasi pedenga.

¹⁰Chaunenge wagona kuita namaoko ako chiite nesimba rako rose nokuti kunzvimbo yavafi kwauri kuenda hakuna basa kana pfungwa kana ruzivo kana ungwaru.

¹¹Chimwe chandakaona pasi pedenga ndechokuti shasha yokumhanya haisiyo inokunda vamwe vose. Gamba rokurwa harisiro rinokunda muhondo vangwaru havasivo vanowana chokudya vakachenjerawo havasivo vanowana upfumi, mhizha hadzisidzo dzinobudirira nguva yavanayo imwechete uye zvinowira mumwe zvinowira vose.

¹²Munhu haazivi nguva yake. Sezvinoitwa hove dzinobatwa mumumbure wakaipa uye seshiri dzinobatwa parugombe ndizvo zvine vanhu vanobatwa panguva yakaipa pazvinongoerekana zvavawira.

¹³Chimwewo chandakaona soungwaru ndechichi pasi pedenga uye kwandiri chinhu chikuru.

¹⁴Paivapo kamwe kaguta kaive navanhu vashoma makari. Mumwe mambo akakavinga akakakomba. Akavaka zvokukakomba nazvo.

¹⁵Mukaguta ikako maiva nemurombo mungwaru. Noungwaru hwake akanunura kaguta ikako asi hapana akamboyeuka murombo iyeyo.

¹⁶Asi chandinotaura ndechokuti ungwaru huri nani pane simba. Kunyange zvazvo ungwaru hwomurombo huchishorwa uye mazwi ake asingateererwi.

¹⁷Mashoko oungwaru anofanira kuteererwa kupinda kushevedzera kwomutungamiri anodaidzira pakati pemapenzi.

¹⁸Ungwaru huri nani pane zvombo zvehondo asi mutadzi mumwechete anogona kuparadza zvizhinji zvakanaka.