Read Bhaibhiri Idzva rechiShona Rwiyo 2 Bible Online

Rwiyo 2 - Bhaibhiri Idzva rechiShona bible

Rwiyo 2

¹Ini ndiri ruva romurosi[1] wekuSharoni ruva reriri zvaro romumapani.

²Seruva reriri mukati merukato ndizvo zvakaita chido chemwoyo wangu pakati pevasikana.

³Somuti wemuapuru mukati mesango, ndozvakaita mudiwa wangu mukati memajaya. Muti wandakagara mumumvuri wawo norufaro une michero yawo inondinakira.

⁴Akaenda neni kumabiko ewaini. Rudo ndorwaiva pamusoro, somureza.

⁵Dai ukangondidzorawo mwoyo nemichero yemagirepisi akaomeswa undimutse mwoyo nemaapuru nokuti ini ndashaya pokuisa mwoyo ini norudo!

⁶Dai ruoko rwake rweruboshe ruri pasi pemusoro wangu rudyi rwake rwakandigumbatira.

⁷Ndinokukomeresai imi vanasikana veJerusaremu mupike nemhara nemhene dzesango kuti hamutirimutsi kana kumutsa havi dzorudo nguva yacho isati yasvika.

⁸Ndiri kunzwa mutsindo womudiwa wangu, hoyo wouya, achiuruka mumakomo.

⁹Achisvetuka zvikomo mudiwa wangu akaita semhara kana kuti setsvana yemhene. Hoyo wamira zvino seri kwemadziro edu achidongorera napawindo achitarisa nepawaya yesefa.

¹⁰Mudiwa wangu hoyo wotaura achinditi: “Simuka chido chemwoyo wangu iwe tsvarakadenga yangu uuye.”

¹¹Nguva yechando yapfuura mvura yokunaya yapera, uye yaenda.

¹²Maruva abuda panyika nguva yokuimba yasvika kurira kwenjiva kwava kunzwika munyika medu.

¹³Muonde wavakubereka maonde, migirepisi yava namaruva ari kunhuwirira. Simuka chido chemwoyo wangu uya zvako tsvarakadenga yangu.

¹⁴Iwe njiva yangu iri mumikaha yamabwe nemakavandika muzvikomo. Rega ndione zvangu uso hwako, ndinzwe hangu izwi rako nokuti izwi rako rakanakisa uye uso hwako hunoyevedza.

¹⁵Tibatirei makava, tukava tudiki turi kukanganisa minda yedu yamagirepisi, nokuti minda yedu yamagirepisi yava namaruva.

¹⁶Mudiwa wangu ndewangu, ini ndiri wake, anofudzira zvipfuwo zvake mukati memaruva amariri.

¹⁷Kusvikira rungwanani kwofefetera; rima roenda udzoke mudiwa wangu, uite semhara pamakomo eBheta.[2]