Read Bhaibhiri Idzva rechiShona Rwiyo 4 Bible Online

Rwiyo 4 - Bhaibhiri Idzva rechiShona bible

Rwiyo 4

¹Hakusi kunaka ikoko, chido chemwoyo wangu, hakusi kunaka kwawakaita! Iwo maziso ako aya, ungati injiva chokwadi muvhoiri mako imomo. Iro vhudzi rako ungati idanga rembudzi dziri kuita murikitira pamateru eGireadhi.

²Iwo mazino acho, ungati idanga zvaro rehwai dzavakuda kuveurwa padzinobuda madzinoshambidzwa. Dzose dziina mapatya pasina kana yakasvodza.

³Iyo miromo yako iyi, kuita setambo tsvuku chaiyo. Muromo wako wakazonaka! Ndoda katauriro kako! Hakusi kutapira mhani ikoko. Matama ako ungati muchero wamapomegiraniti wakachekwa nepakati muvhoiri mako imomo.

⁴Mutsipa wako heyo shongwe zvayo yaDhavhidhi yakavakwa senhurikidzwa pakarembera churu chenhoo. Dzose dziri nhoo dzamagamba ehondo.

⁵Iwo mazamu ako ari maviri, ungati zvimhuru zviviri zvemhara, mapatya chaiwo emhara dziri kufura zvadzo mukati mamaruva amariri.

⁶Kwofefetera kusvikira rungwanani rima raenda, ndichazvitututsa kumakomo emura uye kugomo rorusenzi.

⁷Wakazonaka ufunge, chido chemwoyo wangu, hauna kana kan'an'a zvako.

⁸Ngatichibva kuno kuRebhanoni, mwenga wangu ngatichibvai kuno kuRebhanoni, Tiza[4] panhongonya yegomo reAmana ubve pamusoro pemakomo eSeniri neHerimoni ubve mumapako eshumba nomumakomo embada.

⁹Wanditora mwoyo mwana wamai, mwenga wangu. Wanditora mwoyo nokungonditi tarise kwawaita uye nechishongo chako chimwechete chomuhuro.

¹⁰Hakusi kunaka kwakaita rudo rwako, mwana wamai, iwe mwenga wangu. Rudo rwako kana waini inosara pasi. Twokubikisa tunonhuwirira twuya pamafuta ako anonhuwirira hatupasviki.

¹¹Mumiromo mako munobuda usvisvi hunotapira, mwana wamai pasi porurimi rwako mukaka oga nouchi. Kunhuwirira kwehembe dzako ungati kunhuhwirira kweRebhanoni.

¹²Hanzvadzi yangu, iye mwenga wangu uyu ibindu rakakiiwa, kasipiti zvako kakanamirwa

¹³mabukira ako munda chaiwo wamapomegiraniti une michero yakanakisisa yeHena ine Nadhi.

¹⁴Ine Nadhi neSafuroni neKaramusi nechinamoni nemiti yose yorusenzi nemura negavakava uyewo tunonhuwirira twukuru-twukuru.

¹⁵Mune Kasipiti kebindu, tsime remvura mhenyu netukova tunoyerera tuchibva kuRebhanoni.

¹⁶Iwe mhepo yokuchamhembe muka, uya iwe mhepo yokuMaodzanyemba; vhuvhuta pabindu rangu. Kunhuwira kwaro kupeperetsere kose kose. Mudiwa wangu ngaauye kubindu rake adye michero yaro yakanakisisa.