Read Bhaibhiri Idzva rechiShona Rwiyo 5 Bible Online

Rwiyo 5 - Bhaibhiri Idzva rechiShona bible

Rwiyo 5

¹Ndauya ini kubindu rangu iwe mwana wamai, mwenga wangu. Ndavakunongerera mura yangu uye tunonhuwirira twangu. Ndavakutodya zinga rouchi uyewo uchi hwangu ndava kutonwa ini waini nemukaka wangu. Idyai shamwari munwe; nwiririrai, imi vadiwa.

²Ndakavata zvangu asi kukotsira mukati umu handina. Ndiye inzwei mudiwa achigogodza, achiti, “Ndizarurire mwana wamai, iwe chido chemwoyo wangu, njiva yangu iwe wakaperera nokunaka. Nokuti musoro wangu munyoro nedova, vhudzi rangu ratota namadonhwe ousiku.”

³Ndanga ndatopfekenura hanzu. Ndidzipfeke zvakare here? Ndanga ndashamba tsoka dzangu ndodzisvibisazve nevhu here?

⁴Mudiwa wangu akapinza ruoko rwake ndokubata chihuri mwoyo wangu wakanzwa manyawi. Ndakanzwa manyawi mumwoyo mangu.

⁵Pandakazoti regai ndimuke ndizarurire mudiwa wangu, maoko angu achidonha mura minwe ichiyerera mura ichitoyerera pane chokuzarurisa gonhi.

⁶Ndakazarurira mudiwa wangu asi mudiwa wangu akanga atendeuka aenda, zvakandipedza simba paakadzokera.[5] Ndakamutsvaka ndikamushaya ndakamudaidza asi haana kupindura.

⁷Vachengetedzi veguta vakandiona pavaingunofamba-famba neguta, vakandirova vakandikuvadza vakanditorera gemenzi rangu ivo vachengetedzi vaparusvingo.

⁸Ndinokukumbirisai chaizvo vanasikana veJerusaremu kuti kana mawana mudiwa wangu mumutaurire kuti ndapera ini norudo.

⁹Nhaiwe mukadzi akanakisisa kudai iye mudiwa wako chii chaizvo chaanopfuura vamwe nacho? Iye mudiwa wako chaanopfuura vamwe nacho chii chaizvo zvokutotikumbirisa ukadaro?

¹⁰Mudiwa wangu akapenyerera, akatsvukirira, anonyatsoonekwa mukati mezviuru gumi zvavanhu.

¹¹Musoro wake indarama chaiyo yakanakisisa. Vhudzi rake, rinoyerera rakasviba kuti ndo-o segunguwo.

¹²Maziso ake anenge njiva dziri pedyo namadziva emvura, akanyikwa mumukaka, akanyatsoiswa panzvimbo pawo zvakanaka.

¹³Matamawo ake akaita semihomba yetwokubikisa tunonhuwirira tunoburitsa kunhuwirira; iyo miromo yake iyi, maruva zvawo amariri, inodonha mura inoyerera.

¹⁴Maoko ake, heyo mibhadha zvayo yendarama yakashongedzwa zvishongo muviri wake ndiro[6] zvayo yemunyanga wenzou yakaiswa tutombo twesafaya.

¹⁵Iwo makumbo ake aya, hedzo mbiru zvadzo dzakamiswa muzvigadzikiro zvendarama uyewo chimiro chake ungati iRebhanoni kunaka kwazvo semiti yemisidhari.

¹⁶Zvaanotaura izvi zvinotapira samare, iye wose, sezvaari anodiwa. Ndiye mudiwa wangu iyeyo ndiye shamwari yangu, imi vanasikana veJerusaremu.