Read Bhaibhiri Idzva rechiShona Rwiyo 8 Bible Online

Rwiyo 8 - Bhaibhiri Idzva rechiShona bible

Rwiyo 8

¹Dai iwe kwandiri uri sehanzvadzi uri wakayamwa pazamu ramai vangu. Dai kuri kuti ndinokuona kunze ndaikutsvoda. Uye hapana aimbondishora.

²Ndaienda newe kumba kwaamai vangu, mumba maiye akandibereka. Ndaikupa waini ino tunonhuwirira kuti umwe, muto wamapomegiraniti angu.

³Dai ruoko rwake rweruboshwe ruri pasi pamusoro wangu rudyi rwake rwakandigumbatira zvarwo.

⁴Ndinokukomeresai imi vanasikana veJerusaremu kuti musatirimutse kana kumutsa havi dzorudo nguva yacho isati yasvika.

⁵Ndiani uyo ari kuuya achibva kurenje akazendamira pana chido chemwoyo wake. Pasi pomuti wemuapuru ndakakumutsa, ipapo amai vako vaiva panguva yokusununguka ivo vakakubereka vaiva pahata.

⁶Ndiite sechidhindo pamwoyo wako sechidhindo paruoko rwako nokuti rudo rwakasimba sorufu, shanje ino utsiye seguva kuvaima kwayo kuvaima kwemoto, moto chaiwo unoririma.

⁷Mvura zhinji zvayo haikwanisi kudzimura rudo. Kunyange mapopopo emvura haagoni kunyudza rudo. Kunyange munhu akati regai nditsinhanise rudo nokupa upfumi hwose hwomusha wake zvinonyatsoshorwa.

⁸Tine kahanzvadzi kedu kaduku asi hakana mazamu. Tichaitei nehanzvadzi yakadai pazuva raanopfimbwa.

⁹Dai kuri kuti madziro, taivaka chokuzvidzivira nacho muhondo chesirivha kana dai kuri kuti igonhi, taimuvakirira namapuranga esidha.

¹⁰Ini ndiri chidziro, mazamu angu akaita seshongwe kwaari, ndiri chigadzanisa mwoyo.

¹¹Soromoni aiva nomunda wamagirepisi kuBharihamoni. Akaisako vanhu vokuuchengeta, mumwe nomumwe aifanira kuunza muchero unoita churu chemari yesirivha.

¹²Asi munda wangu wemagirepisi ndowangu ini pachangu. Iwe Soromoni ungava zvako nechuru chemari yesirivha iyoyo vachengeti vayo vachiwana zvavo mazana maviri.

¹³Iwe unogara mumapindu, shamwari dzangu dziri kuteerera izwi rako. Rega ndirinzwewo zvangu.

¹⁴Mhanya mudiwa wangu uite semhara kana setsvana yemhene pamakomo etwokubikisa tunonhuwirira.