Read Bhaibhiri Idzva rechiShona Isaya 1 Bible Online

Isaya 1 - Bhaibhiri Idzva rechiShona bible

Isaya 1

¹Zvinhu zvakaoneswa Isaya mwanakomana waAmozi pamusoro peJudha neJerusaremu panguva yokutonga kwamadzimambo aya okwaJudha anoti Uziya naJotamu naAhazi naHezekia.

²“Teerera iwe denga, unzwewo iwe nyika nokuti ini Tenzi ndava kutaura, ‘Ndakarera vana ini ndikavayarutsa asi ivo vakandipandukira.

³Mombe inoziva muridzi wayo kana dhongi rinozivawo parinopirwa zvokudya nomuridzi waro asi Isiraeri haimboziva zvayo, vanhu vangu havambonzwisisa.’ ”

⁴Zvichakuwanai zvenyu rudzi rwavanhu vezvitadzo! Iyemi vanhu vazere uipi, imi zvizukuru zvavaiti vezvakaipa, vana vane muitiro wakaora. Makandiramba imi, ini Tenzi, mukandishora ini Anoera weIsiraeri, mukanyatsondipa zvenyu gotsi.

⁵Munodirei kuti shamhu irambe iri pamusana wenyu, zvaunodai kuramba makapanduka? Musoro wase wanyeka namaronda, mwoyo wako wose wachiti rukutu.

⁶Kubvira pasi petsoka kusvikira pamusoro hapana papenyu, dzangova mbonje namavanga, angova maronda ari kubuda ropa asina kusvinwa kana kusungwa kana kupfaviswa zvako namafuta.

⁷Nyika yenyu yangova nyikawo zvayo maguta enyu aririmiswa nomoto nyika yenyu yarozvwa namabvakure, yangova nyika sokunge yakurirwa namabvakure[1] imi makatarisa.

⁸Iwe mukunda weZioni Jerusaremu, wasara wangove sekatumba kemumunda wamagirepisi sakadushwa kari mumunda wamagaka seguta rakombwa.

⁹Dai Tenzi wehondo nehondo asina kutisiyira zvake chitsama chavakapunyuka, tingadai takaita hweSodhomu kana kuita hweGomora.

¹⁰Chiteererai munzwe shoko raTenzi, iyemizve vatongi veSodhomu! Teererai munzwe mutemo waMwari wedu iyemizve vanhu veGomora.

¹¹Zvanzi naTenzi, “Ndinei ini nokuwanda kwezvibayiro zvenyu? Mipiro yokupisa yehondohwe neyemafuta emhuka dzakakodzwa zvandifinha ini; handisisiri kufadzwa neropa rehandira kana rehwayana kunyange rezvikotora.

¹²Ipo pamunouya kwandiri kuzonamata, ndiani chaizvo anenge achida kuti muzotsokodzere zvenyu nhandare dzangu?

¹³Chiregai kunge muchauya nemipiro isina maturo rusenzi runondisemesa. Mazuva enyu okugara kweMwedzi namaSabata nemisangano yamunokokerana kukanyanisa ikoku, nokuti musangano mukuru wezvokunamata pamwechete nouipi, zvandifinha.

¹⁴“Mazuva Makuru enyu oKugara kwoMwedzi namazuva makuru akatemwa, mwoyo wangu hauzvidi. Kwandiri yave nhamo chaiyo yokuzvitakura, ndaneta ini nokuzvitakura.

¹⁵Pamunosimudza maoko mudenga ini ndichatarisa rutivi, kunyange pamunogoorera kunamata handiteereri, maoko enyu azere ropa.

¹⁶Shambai muzvichenese, bvisai zviito zvenyu zvakaipa mumaziso mangu. Kandai pasi uipi.

¹⁷Dzidzai kuita zvakanaka, onai kuti kuri kutongwa zvino ruenzaniso vanodzvinyirira vanhu ngavagadziridzwe. Miririrai nherera muchireverera chirikadzi.”

¹⁸Zvanzi naTenzi, “Kana madaro mochiuya zvenyu titaurirane, kunyange zvazvo zvitadzo zvenyu zvakatsvuka seropa, zvichati mbu-u kuchena somukaka, kunyange zvakati piriviri kutsvuka zvichati mbu-u kuchena sedonje.

¹⁹Kana mukada zvokuteerera muchadya zvinhu zvakanaka zvenyika.

²⁰Asi mukaramba muchipanduka, bakatwa richakutsakatisai nokuti ndini Tenzi ndazvireva nomuromo wangu.”

²¹Zvauya sei chokwadi kuti guta rakanga rakatendeka riite senzenza kudai guta rakanga rizere noruenzaniso. Ururami ndomaiva mumusha mahwo asi zvino mava memhondi.

²²Sirivha yako haisisina maturo, waini yako yashapiswa nemvura.

²³Machinda ako vapanduki neshamwari dzembavha Munhu wose ava kutarisira pfumbamuromo, ava kungomhanyira kupiwa zvipo, havamiririre nherera nhamo dzechirikadzi, mumusoro hadzivapindi.

²⁴Naizvozvo Tenzi anotaura, iye Tenzi wehondo nehondo, iye Samasimbaose weIsiraeri achiti, “Chiregai zvenyu muchiona, ndochipedzera hasha dzangu pavanhu vanondivenga ndichitsividza mhandu dzangu.

²⁵Nesimba roruoko rwangu ndava kukupindukirai! Zvose zvisina maturo mavari ndichanyatsozvinyungurutsa ndichibvisa zvose zvisina kunaka mauri.

²⁶Ndichadzosera vatongi vako sapakutanga paye namakurukota ako sapamavambo paya. Mushure mezvo uchazonzi guta rakarurama guta rakatendeka.”

²⁷Zioni richanunurwa noruenzaniso, vanopinduka vachiponeswa pamusana poururami.

²⁸Asi vapanduki navatadzi vachaparadzwa pamwechete, vanofuratira Tenzi vachatsakatiswa.

²⁹Ndinodaro nokuti zvokufarira mioku yokunamata zvichakunyadzisai; muchanyara namapindu enyu amakatsaura;[2]

³⁰nokuti muchaita somuti womuoku unowuna mashizha, sebindu risina mvura.

³¹Mikuru yacho ichaita setsotso, basa rake richiita sakamoto kubarika. Zvose zviri zviviri zvichatsva pamwechete, pagoshaya anogona kuzvidzimura.[3]