Read Bhaibhiri Idzva rechiShona Isaya 10 Bible Online

Isaya 10 - Bhaibhiri Idzva rechiShona bible

Isaya 10

¹Zvichavawana vanotema zvirevo zvisina kururama vanyori vanoramba vachinyora zvirevo zvebasa rechibharo

²kuti vatadzise vasina chavanacho kuwana ruenzaniso, vachipamba varombo muvanhu vangu zvinhu zvavanofanira kuti vawane uye kuti vapambe chirikadzi nokutorera nherera zvinhu zvadzo.

³Muchaita waani musi wokurangwa nedutu remhepo richauya richibva kure kure muchatizira kunaani kwamungawane rubatsiro, upfumi hwenyu muchahusiya kupi?

⁴Chenyu imi kunenge kwangova kuti undundu pakati pavasungwa kana kungoti rakata pakati pezvitunha. Nokuda kwaizvozvo hasha dzake hadzina kupora, muruoko rwake shamhu ichiri mudenga.

⁵Iwe Asiria, shamhu yangu yokunge ndatsamwa, tsvimbo yangu yokunge ndaviruka nehasha

⁶ndichakuti uvinge rudzi rwavanhu vasisadi zvaMwari ava, ndichakutuma kuvanhu vandinoda kuranga kuti undopamba nokuvatorera zvinhu nokuvatsokodzera pasi samavhu omumigwagwa.

⁷Asi izvozvi haasi kumbozvifunga, mumwoyo make izvozvi hazvimo. Chiri mupfungwa dzake kuparadza chete nokutsakatisa ndudzi dzavanhu dzakawanda

⁸nokuti anototi, “Inga vatungamiriri vangu vehondo vose madzimambo wani.

⁹Guta reKarino harina kuitwa zvakaitwa neKarishemeshi here? Ko Hamati harina kuitwa zvakaitwa neAripadhi here? Ko Samaria harina kuita zvakaitwa neDhamasikusi here?

¹⁰Sokutambanudzira ruoko rwangu ndichiranga nyika nenyika dzinonamata zvifananidzo, dzine zvifananidzo zvakakura kupinda zveJerusaremu neSamaria

¹¹ndozvandichaita izvozvi kuJerusaremu nezvifananidzo zvayo sezvandakangoita kuSamaria nezvifananidzo zvaro!”

¹²Pachapedza Tenzi basa rake rose paGomo reZioni napaJerusaremu, ndicharangira[22] mambo weAsiria kuzvitutumadza nokuzvikudza kwaanoita nokudada kwaanoita achidhadhaira

¹³achiti, “Ini noruoko rwangu ndini pano ndakazviita ini nesimba rangu, ndakazviita ini noungwaru hwangu nokuti ndinonzwisisa. Miganhu yedzindudzi dzavanhu ndakaibvisa ini, ndikapamba upfumi hwavo. Sehandira chaiyo, vainge vari pazvigaro zvoumambo ndakavatozomora ini.

¹⁴“Ndakawana upfumi hwendudzi dzavanhu sezvinongoita ruoko runenge rwawana dendere reshiri, uye sezvinongoita vanhu kuunganidza mazai akaramwiwa, ndokukukucha zvangu kwandakaita nyika. Hapana akambosimudza bapiro kana kushama muromo kana kuti chwe-e.”

¹⁵“Iro demo ringadhadhairire here munhu anoritemesa, iro soo[23] ringadadire here anorichekesa wacho? Sokunge mubhadha ungavheyese anousimudza, kana kuti tsvimbo ingasimudze iye asiri chimuti!”

¹⁶Naizvozvo Tenzi Tenzi wehondo nehondo achatumira denda rokuperezeka muviri mukati mehweswa chaidzo dzevarwi vake, mukati momukurumbira wake muchapisa sokupisa kunoita moto uri kubvira.

¹⁷Mwenje weIsiraeri uchaita somoto. Anoera wake achaita serimi romoto, uchapisa nokuroromesa minzwa yake norukato nezuva rimwechete.

¹⁸Masango ake ane mukurumbira neminda yake inopa, Tenzi achaparadza zvose mweya nomuviri, zvichiita somurwere aperezeka muviri.

¹⁹Miti yemasango ake ichasara yava mishoma zvokuti mwana muduku angatogonawo kuiverenga.

²⁰Pazuva iroro chitsama chevaIsiraeri vanenge vasara nevemba yaJakobho vakapunyuka rufu vachange vasisazemberane norudzi rwakavarova asi vachazembera pana Tenzi Anoera waIsiraeri pachokwadi.

²¹Chitsama chichadzoka, chitsama chevokwaJakobho chichadzokera kuna Mwari Samasimbaose

²²nokuti kunyange zvazvo vanhu venyu vaIsiraeri vakawanda sejecha rokumahombekombe kwegungwa, chitsama chavo chete ndicho chichadzoka. Zvokuparadza izvi zvakatotemwa zviri chinhu chizere noururami,

²³nokuti Tenzi Mwari wehondo achanyatsopedza kuita zvaakatema mukati menyika yose.

²⁴Naizvozvo zvanzi naTenzi, Tenzi wehondo nehondo, “Imi vanhu vangu vagere muZioni musatye zvenyu vaAsiria pavanokurovai netsvimbo yavo vachikusimudzirai shamhu sezvakaita vaIjipiti,

²⁵nokuti mushure mekanguva kadikidiki hasha dzangu dzichapera asi ini nehasha dzangu ndovapindukira kuvaparadza.

²⁶Tenzi wehondo nehondo achavasumudzira shamhu yokuvarova somurovero waakaita Midhiani padombo rokuOrebhu, tsvimbo yake ichange yakatambanudzirwa pamusoro pegungwa achiisimudza sezvaakaita muIjipiti.

²⁷Pazuva iroro mutoro wake uchabviswa pamapfudzi ako; joko rake richatyorwa rigobviswa pamutsipa penyu.” Asiria yakakwidza achibva kuRimoni,

²⁸yakasvika kuAiati,[24] yakapfuura nokuMigironi yakasiya yachengetesa nhumbi dzayo kuMikimashi.

²⁹Yadimura napamupata wegomo yakazorara yava kuGebha, guta reRama radedera vomuGibhia guta rokwaSauro vakatiza.

³⁰Ridza mhere iwe mukunda, guta reGarimu, teerera unzwe nhaiwe Raisha umudaire iwe Anatoti.

³¹Madhimena ririkutiza vagari vomuGebhimu votizira kundopotera.

³²Iye nhasi uno wakare Asiria ichandomira yava kuNobhu ichazunza chibhakera chayo ichikungira gomo romukunda weZioni, chikomo cheJerusaremu chacho.

³³Chionai, Tenzi Mwari wehondo nehondo achavakwazhura semapazi nesimba rinotyisa, mazipazi marefurefu achatemerwa pasi uye akati dzu-u mudenga achiarizhira pasi pasi.

³⁴Achatemera pasi nedemo majokochwa amasango, uye Rebhanoni ichaparara pamwechete nemiti yayo mirefu.