Read Bhaibhiri Idzva rechiShona Isaya 11 Bible Online

Isaya 11 - Bhaibhiri Idzva rechiShona bible

Isaya 11

¹Naizvozvo pachigutsa chokwaJese pachatungira nhungirwa, bukira richamera pamidzi yake.

²Mweya waTenzi uchagara paari Mweya woungwaru newokunzwisisa Mweya unopa zano newesimba Mweya woruzivo newokutya Tenzi.

³Zvokutya Tenzi ndozvaanofarira. Haatonge nezvaanoona nameso chete kana kutevedza zvaanonzwa nenzeve

⁴asi kuti achatonga varombo zvakarurama achipipirira vatamburi vepanyika uye nyika[25] achairova neshamhu yomuromo wake nefemo romuromo wake anopfuudza vakaipa.

⁵Ururami ndihwo huchava bhandhe raanosungisa muchiuno chake, kutendeseka kuri bhandhe rake muchiuno.

⁶Mhumhi ichagarisana zvayo nehwayana mbada icharara zvayo pamwechete nembudzana, mhuru neshumba nechigondora chakakora zviri pamwechetewo, zvichifudzwa zvazvo nemwana muduku.

⁷Mhou nebere zvichatofura pamwechete vana vazvo vachirara zvavo pamwechete, shumba ichafura sora semombe.

⁸Mwana ari kuyamwa achatamba zvake pamwena wemhakure ndumurwa ichiisa zvayo ruoko mumwena wechiva.

⁹Hazvizombokuvadza kana kuparadza mugomo rangu rose rinoera nokuti panyika pachange zvino pazara nokuziva Tenzi sokuzadza kunoita mvura gungwa.

¹⁰Pazuva iroro, bukira romudzi wokwaJese richamira sechiratidzo kudzindudzi dzavanhu, iyeyo ndiye achange wototsvagwa nevechirudzi, Nzvimbo yake yokugara ichava nomukurumbira.

¹¹Nomusi iwoyo, Tenzi achatambanudza ruoko rwake kechipiri kununura chitsama chakasara chevanhu vake kubva kunyika idzi dzinoti: Asiria neIjipiti nePatirosi neItiopia[26] neEramu neShinari neHamati nenyika dzokumahombekombe kwegungwa.

¹²Achasimudzira marudzi avanhu chiratidzo achikokorodza vasemwi veIsiraeri agounganidza vanhu vokwaJudha vakamwarariswa kubva kumativi mana enyika.

¹³Pfini dzevokwaEfuremu dzichapera, vanovenga vokwaJudha vachapera. VokwaEfuremu havachazoitira shanje vokwaJudha vokwaJudha havazotambudza vokwaEfuremu

¹⁴asi vachatoita chirwirangwe kurwisa vaFirisitia kumadokera uye pamwechete, vachapamba vanhu vokumabvazuva. Vachaita mubatirapamwe kurwisa Edhomu neMoabhu, vaAmoni vachavateerera.

¹⁵Tenzi achanyatsoparadza muromo wegungwa reIjipiti, achavheyesa ruoko rwake pamusoro peRwizi rwacho nemhepo yake inopisa zvakaipisisa kwazvo achirurova achiruparadzanisa kuita tukova tunomwe kuti vanhu vayambuke zvavo vachitsika pasi pakaoma.

¹⁶Pachava nomugwagwa mukuru unobva kuAsiria, wokuitira chitsama chavanhu vake vakasara sewakaitirwa vaIsiraeri pavakabuda vachibva kunyika yeIjipiti.