Read Bhaibhiri Idzva rechiShona Isaya 13 Bible Online

Isaya 13 - Bhaibhiri Idzva rechiShona bible

Isaya 13

¹Iri shoko rinorema rakanangana neBhabhironi rezvakaonekwa naIsaya mwanakomana waAmozi:

²Pamhene zvapo pamusoro pechikomo misaipo chiratidzo muzhambarare kudaidzira kwavari muvaninire ruoko kuti vapinde mumisuo mikuru yokuvakuru vakuru.

³Ini pachangu ndatema vanhu vangu vandakazvitsaurira ndikakoka magamba angu okurwa vanozvinzwa kuti vazopedzera hasha dzangu pavanhu ivava.

⁴Herwo ruzha rwemhomho yavanhu pamakomo runenge rwegurumwandira chairo ravanhu! Hero bongozozo redzinyika, rwamarudzi ari kukokorodzana pamwechete! Tenzi wehondo nehondo ari kuunganidza hondo yavarwi yokurwisa.

⁵Vanobva kunyika iri kure uko, vachibva kwakaperera denga chaiko, Tenzi nezvombo zvake zvehondo zvokushatirwa kwaakaita kuzoparadza nyika yose zvayo.

⁶Hwihwidzai kuchema, nokuti Zuva raTenzi rava padyo, iroro richasvika riri zuva rokuparadza kwaSamasimbaose.

⁷Naizvozvo maoko ose acharukutika munhu wose acharohwa nehana

⁸zvichivakanhamisa. Vachabatwa nokurwadziwa zvokutodemba, vacharwadziwa somukadzi ari pakusununguka. Vachangoti nde-e kutarisana vazvishayira pazvo zviso zvavo zvichidikitira.

⁹Hero Zuva raTenzi rouya! Zuva routsinye nokutsamwa nerehasha dzinotyisa rokusiya nyika yava renje nokuparadza vatadzi mairi;

¹⁰nokuti nyenyedzi dzedenga negurusvusvu radzo dzichange dzisisavhenekere, zuva richange rakasviba pakubuda kwaro, mwedziwo usisina chiedza chaunopa.

¹¹“Ndicharangira nyika zvivi zvayo uye vatadzi uipi hwavo. Ndichapedza kuzvikudza kwose kwavanozvitutumadza, ndichitonhodza kuzvinyundumadza kwavasingakatare.

¹²Ndichaita kuti vanhu vave vashoma kupinda ndarama yakanyatsokwenenzverwa. Kuwana vanhu kunenge kwotonetsa kupinda kuwana chidimu chendarama yokuOfiri.

¹³Naizvozvo ndichaita kuti matenga azunguzike pasi pandengendeke pabve panzvimbo yapo pamusana pehasha dzaTenzi wehondo nehondo pazuva rehasha dzake dzinotyisa.

¹⁴Semhara iri kudzingirirwa kana kuti sehwai dzisina anodzikokorodza mumwe nomumwe achaenda kuvanhu vokwake munhu achitizira kunyika yokwake.

¹⁵Anenge angowanikwa anobayiwa anenge angobatwa anofa nebakatwa.

¹⁶Pwere dzavo dzichapwashurwa vakatarisa dzimba dzavo dzichipambwa vakadzi vavo vachibhinywa.

¹⁷“Chionai ndavakuvamutsira vaMidhia vasina hanya nesirivha kana kufarira zvendarama.

¹⁸Uta hwavo hucharakasha kuuraya majaya vachange vasina tsitsi norusvava kana kuitira vana tsiye nyoro.

¹⁹Bhabhironi, guta rinoshamisa panyika dzose mbiri nechidadiso chevaKaridhea richaita seSodhomu neGomora paakaparadzwa naMwari.

²⁰Hamuzombofa makagarwa kana kumboitwa musha imomo pazvizvarwa zvose zvazvo. Hakuna muArabhu achazomisa tendhe rake imomo hakuna vafudzi vachararisa hwai dzavo imomo.

²¹Asi muchatorarwa zvamo namakava esango, dzimba dzavo dzichazara namazizi namajijidza. Mhou dzichagaramo uye zvidhoma zvichatambiramo.

²²Mapere acharidza zvawo huwi munharire dzavo namakava achihukura, mumizinda yavo inoyevedza. Nguva yaro yatosvika mazuva acho zvemberengera hapasisina.”