Read Bhaibhiri Idzva rechiShona Isaya 14 Bible Online

Isaya 14 - Bhaibhiri Idzva rechiShona bible

Isaya 14

¹Tenzi achanzwira Jakobho ngoni achisarudzazve Isiraeri uye achavaita kuti vagare munyika mavo, vatorwa vachazobatana navo kugaramo vagoti kwati kwati kune vemba yaJakobho.

²Vechirudzi ava vachavatora vachivaendesa kwavo uye veimba yaIsiraeri vachavaita vavo munyika yaTenzi sevaranda vavo vechirume nevechikadzi. Vachatapa zvavo vacho vakambovatapa ivavo votonga zvino vaye vokumbovabata zvakaipa.

³Tenzi paachakuzorodzai kumarwadzo enyu nomupfumvu yenyu nepabasa rakaomarara ramaishandiswa,

⁴muchatotsvinyirawo mambo weBhabhironi muchiti, “Hezvoka, nyakuitira vamwe zvakaipa, zvakuperera kuzvitutumadza nehasha kwapera.

⁵Tenzi atyoranisa shamhu yomuipi, iyo tsvimbo yamadzishe

⁶akarova ndudzi dzavanhu akashatirwa achadakarira kurova chete, achitonga dzindudzi dzavanhu akatsamwa achivaonesa ndondo pasina zvokumbomira.

⁷Nyika yose yave norugare norunyararo vanhu vachitomboimba zvavo.

⁸Miti yemisaipurasi yototi toko waro nokufara! Miti yemusidhari yokuRebhanoni yotiwo, ‘Kubvira musi wawakanzi pasi mbombombo nevokutema miti havachambotivinga.’

⁹“Nzvimbo yavakafa, yavachakabvu yatozhandanuka kuzochingurana newe, paunosvikako inomutsa vachakabvu kuti vakukwazise vaiva vatungamiriri panyika. Inovasimudza pazvigaro zvavo zvoumambo vose vaimbova madzimambo endudzi dzavanhu.

¹⁰Vose vachataurawo kwauri vachiti, ‘Newe wachitiwo rukutu sesu! Tafanana!

¹¹Kuenda mbiri kwako nomutinhimira wemadimbwa ako zvachinzi pasi mbombombo, munzvimbo yevachakabvu, zvidukutse ndizvo zvava bonde rako, poworara honye ndodzava gumbeze rako.’

¹²“Zvakuvingaka! Kutotozomoka mudenga kudai, iwe Nyamatsatsi, hweva yamangwanani zvauya sei kuti unzi pasi rikiti, iyewe waimbombomesa ndudzi dzavanhu,

¹³waizviti nechomumwoyo, ‘Ndichaita chitundumusere-musere chaicho kukwira kudenga kupfuura nyenyedzi dzaMwari, ndiise chigaro changu choumambo pamusoro, nditi zvangu tendhe kugara pagomo padare ravo riri kuchamhembe uko.

¹⁴Ndichakwira kumusoro kwamakute, ndizviite soWokumusorosoro.’

¹⁵Asi waunzwa pasi kunzvimbo yevachakabvu pasi pasi chaipo peGomba.

¹⁶Vachakuona vacharamba vakakuti kanha kutarisa vachifunga nezvako vachiti; ‘Ndiye here chokwadi munhu aiita kuti pasi padedere uyu? Aingwendesa dzinyika,

¹⁷nyakuita kuti nyika ive segwenga achikurira maguta ayo, vasungwa vake, asingavabvumire kudzokera kumusha?’

¹⁸Madzimambo ose arere zvawo nomukurumbira wawo mumwe nomumwe muguva rake,

¹⁹asi iwe warasirwa kunze, kure neguva rako sokusemwa kunoitwa kusvodza, wakomberedzwa navakaurayiwa, vaya vakabayiwa namapakatwa vanoenda mumatombo eGomba sechitunha chiri kutsikirirwa zvacho netsoka.

²⁰Hauzi kuzovigwa sezvavakaitwa pamusana pokuti wakaparadza nyika yako ukauraya vanhu vako. Zvizvarwa zvevaiti vezvakaipa ngazvirege kana kuzombodomwa zita.

²¹Gadzirirai kuuraya vanakomana vake pamusana pemhosva dzamadzibaba avo, vangadaro vakamukira nyika vakaiita yavo vakazadza pasi pano pose namaguta.”

²²Zvanzi naTenzi wehondo nehondo, “Ndichavamukira ndigotsakatisa muBhabhironi zita nechitsama chacho chakasara, mwana wose zvake nechizukuru chose, ndizvo zviri kurehwa naTenzi.

²³Ndichaiita kuti ive musha wenguruve dzomusango namadziva emvura ndichaitsvaira nomutsvairo wokuparadza ndizvo zviri kurehwa naTenzi wehondo nehondo.”

²⁴Tenzi wehondo nehondo apika achiti, “Zvandakaronga ndizvo zvichaitika izvozvo uye zvandakati zvinoitwa ndizvo zvinoitika.

²⁵Ndichaparadza vaAsiria munyika mangu ndigoitsokodzera netsoka dzangu joki ravo richibva rabva pavari nomutoro wavo uchibva waturwa pamapfudzi avo.”

²⁶Ichi ndicho chinangwa chakatemwa chakanangana napasi pose uye urwu ndirwo ruoko rwacho ruchine shamhu ichiri mudenga yokuranga marudzi ose avanhu.

²⁷Nokuti Tenzi wehondo nehondo atema izvozvo ndiani achazvidzivisa, ruoko rune shamhu ruchiri mudenga ndiani acharudzora.

²⁸Mugore rakafa mambo Ahazi kwakauya mutoro weshoko iri raiti,

²⁹“Musafare zvenyu vaFirisitia, mose zvenyu muchiti shamhu yaitirova yakatyoka nokuti panzvimbo penyokawo zvayo pava kubuda chiva, vana vacho vachava nyoka dzinobhururuka.

³⁰Asi varombo vokupedzesera vachafura zvavo mumafuro angu vapemhi vachinyatsogarikana, asi ndichauraya dzinde rako nenzara uye chitsama chevako chinenge chasara ndichachiuraya.

³¹Iwe suo guru hwihwidza kuchema, iwe guta chema. Gwambai nokutya imi vaFirisitia, gwambai imi mose zvenyu. Nokuti kuri kuuya utsi huchibva kuchamhembe muhondo yake imomo hamuna mbwende.”

³²Chii chatichapindura nhume dzavaFirisitia? Tichati Tenzi akavaka guta reZioni, mariri vanhu varo vachawana pokuhwanda.