Read Bhaibhiri Idzva rechiShona Isaya 16 Bible Online

Isaya 16 - Bhaibhiri Idzva rechiShona bible

Isaya 16

¹Vanhu veMoabhu vari kuguta reSera riri kurenje vakatumira hwayana kumutongi wenyika, kugomo romukunda, guta reZioni.

²Seshiri dziri kupupurika, samanyana amwararidzwa, ndozvangoitawo vakunda veMoabhu kumazambuko aArinoni, vachiti,

³“Tipeiwo mazano mutiitirewo zvino ruenzaniso, mumvuri wenyu uti gude gude sousiku zuva richirova panhongonya, mungovigiridzawo waro vasemwi, musaburitse pachena vanenge vapotera.

⁴Regai zvenyu vasingadiwe kuMoabhu vambotiwo garei zvavo pakati penyu muve diziro ravo rokuhwanda muparadzi. Pachazenge zvamuperera wokudzvinyirira vamwe uyu, zvokuparadza izvi kusisina, naiye nyakutsokodzera vamwe netsoka atsakatika panyika,

⁵ndopachagadzikwa chigaro choumambo chichimiswa nenyasha. Pachiri, mumwe akatendeseka wetendhe rokwaDhavhidhi achagarapo. Iyeyo anenge ari munhu anotonga akanangana noruenzaniso uye anokurumidza kuita zvakarurama.”

⁶“Takanzwa nezvokuzvikudza kweMoabhu nokudada kukuru kwayaiita; nezvokuzvitutumadza kwayo nokuzvitora kwainoita, nokutafura kwayo kuzvizuwidza kwayo, hakuna chakunobatsira.”

⁷Naizvozvo Moabhu ngaizvicheme, rungairai chaizvo kuchema, munhu wose ngaacheme Moabhu, ngavacheme zvambwa zvamagirepisi okuKirihareseti

⁸nokuti minda yokuHeshibhoni neminda yamagirepisi yokuSibhuma yosvava, madzishe edzindudzi akakwazhura mapazi ayo aisvika kana nokuJazeru achirasikira nokugwenga uko; nhungirwa dzacho dzichitandira uko nouko dzichitopfuura zvadzo napamusoro pegungwa.

⁹Naizvozvo ndochema ini sokuchema kuri kuita vokuJazeru, kuchema minda yamagirepisi yokuSibhuma. Ndinonyorovesa nemisodzi, iwe guta reHeshibhoni newe guta reEreare nokuti michero yako nezvaunokohwa muminda zvawirwa nehondo.

¹⁰Zvokupembera nokufara izvi zvabviswa mumunda unobereka. Muminda yamagirepisi hamuna rwiyo ruri kuimbwa kana mhururu dzinorira wokusvina waini, mokusvinira hapasisina huro dzepajakwara rokusvina dzachiti zii kunyarara.

¹¹Naizvozvo mweya wangu uri kudandaura sechipendani kuchema Moabhu, nomwoyo wangu uchishungurudzirwa Kiriheresi.

¹²Moabhu painouya ichizvitambudza kuuya panzvimbo dzakatunhumara dzokuteurira painouya kunzvimbo yayo inoera kuzonamata, hapana chimuko kwairi.

¹³Iroro ndiro shoko rakanga rataurwa kare naTenzi rakanangana neMoabhu.

¹⁴Asi zvino Tenzi anoti, “Mumakore matatu, sezvinoita makore omunhu anoita marikicho, mbiri yeMoabhu ichashorwa kunyange zvazvo aine gurumwandira ravanhu iroro, vachapunyuka rufu vacho vachange vari vashoma dziri ndonda zvadzo.”