Read Bhaibhiri Idzva rechiShona Isaya 17 Bible Online

Isaya 17 - Bhaibhiri Idzva rechiShona bible

Isaya 17

¹Shoko rakanangana neDhamasikusi chinzwai munzwe, “Dhamasikusi, zvokuva guta izvi zvichariperera richava murwi wematongo.

²Maguta aAroeri[28] achagara asisina munhu achatenge zvawo ava ezvipfuwo zvicharara zvazvo pasi, pasisina anozvivhundutsira.

³Guta retsvingo richaparara kwaEfuremu kuDhamasikusi umambo huchabviswa chitsama chichasara cheveSiria chichaita zvakaitika kumukurumbira wevanhu vokwaIsiraeri,” ndizvo zviri kurehwa naTenzi wehondo nehondo.

⁴“Pazuva iroro mukurumbira wokwaJakobho uchanyatsoti pasi mbombombo. Kukora ikoko kuchapera.

⁵Zvichaita somunda wakohwiwa hura dzimire, wakohwiwa hura idzodzo namaoko, somunhu anofuhwa hura idzodzo mubani reRefaimu.

⁶Hongu zvokufuhwa zvichasarawo zvirimo sezvinongoitawo muti womuorivhi kana wagumwa. Maorivhi maviri kana matatu anosara pabazi rokumusorosoro, michero mina kana mishanu pamapazi omuti womuchero.” Ndizvo zviri kutaura Tenzi Mwari weIsiraeri.

⁷Pazuva iroro vanhu vachave nehanya nomusiki wavo votarisa kune mururami weIsiraeri.

⁸Vanenge vasisina hanya neatari dzavakavaka namaoko avo vasisatarise kune zvinhu zvakaitwa neminwe yavo, zvingave maAshera kana atari dzorusenzi.

⁹Pazuva iroro maguta avo akasimba achaita samatongo avaHivhi naavaAmori avakatiza pamusana pavaIsiraeri, achava renje.

¹⁰Ndinodaro nokuti imi makakanganwa Mwari ruponeso rwenyu mukakanganwa dombo ramunopotera. Naizvozvo kunyange mukadyara mbesa dzakanaka kana kusima migirepisi yavamwari vokumwe

¹¹kunyange mukadziitisa kuti dzikure nezuva ramunodzidyara, muchidziitisa kuti dzitumbuke mangwanani ezuva ramunodzidyara zvokudzikohwa zvichakunzvengai ava mazuva enhamo nokurwara kusingarapiki.

¹²Mai we-e, mutsindo wendudzi dzavanhu vakawanda unotinhira samaungira egungwa, mai we-e kutinhira kwendudzi dzavanhu vanoriridza sokutinhira kwemvura zhinji

¹³ndudzi dzavanhu dzinoriridza sokutinhira kwemvura zhinji. Vachadzitsiura dzigoti ware kutizira kure sehundi inopupurutswa nemhepo mugomo sechamupupuri chedutu remhepo

¹⁴kumanheru heyo hondo inotyisa, mambakwedza hapasisina aripo ndiwo mugove wavanotipamba mugove wavanotitorera zvinhu zvedu.