Read Bhaibhiri Idzva rechiShona Isaya 19 Bible Online

Isaya 19 - Bhaibhiri Idzva rechiShona bible

Isaya 19

¹Shoko rakanangana neIjipiti. Tarirai muone “Tenzi agere pagore riri kumhanya chaizvo achienda kuIjipiti, zvifananidzo zvokunamata zveIjipiti zvichadedera nokuvapo kwake, vaIjipiti vachadumbirwa nazvo.

²Ndichaita kuti vaIjipiti vamukirane, vacharwisana pachavo, mumwe achirwisana nomumwe wake, maguta achirwisana pachawo, madzimambo achirwisanawo pachawo,

³VaIjipiti vacharasiswa mwoyo, ndichavhiringidza mazano avo. Ivo ndopavachaenda kundobvunzira kuzvifananidzo zvokunamata, nokuna vano un'anga hwokufembera namaminimini vachindobvunzirawo kumidzimu nokun'anga.

⁴Iniwo ndopandicharamwira vaIjipiti ivavo, mumaoko atenzi[29] ano mwoyo wakaoma, vatongwe namambo anotyisa ndizvo zviri kutaurwa naTenzi Tenzi wehondo nehondo.”

⁵Mvura yomuna Nairi ichapwiswa rwizi ruchanyatsoti papata kuoma.

⁶Migero yayo ichava gutukutu kunhuwa, tukova tunodira muna Nairi yeIjipiti tuchaserera tugopwa, tsanga nenhokwe dzichaora.

⁷Kuchaita madzvanga madzvanga muna Nairi kumahombekombe aNairi, zvose zvinodyarwa pedyo naNairi zvichaoma zvigopeperetswa pasare pasisina.

⁸Varedzi vachaungudza vachichema, vose zvavo vanokanda chirauro muna Nairi vachanyatsoti gojoto, ivavo vanokanda usvasvi mumvura.

⁹Vashandi vanokuruza rwodzi rweFurakisi, vachaora mwoyo pamwechete navanoruka machira nedonje jena.

¹⁰Varuki vamachira vachadumbirwa nazvo vashandi varasa mwoyo.

¹¹Machinda okuguta reZoani, mazipenzi chaiwo evanhu, ngwazi dzomakurukota aFarao dzinopa mazano asina nomusoro wose. Ndicho chii chamunotaura kuna Farao muchiti, “Ini ndiri mwanakomana wengwazi, mwanakomana wamadzimambo echinyakare?”

¹²Ko zvino ngwazi dzenyu dziripi? Ngadzichikutauriraika, dzifanokuzivisai zvarongwa kuitwa kuIjipiti naTenzi wehondo nehondo.

¹³Machinda okuguta reZoani ava mapenzi avanhu uye machinda okuguta reMemufisi, azofuririkana; vakuru vakuru vomumadzinza eko vateteretsa Ijipiti.

¹⁴Tenzi apinza mukati mayo mweya wenyonganyonga vakaita kuti Ijipiti idzedzereke mune zvose zvazvo zvainoita sokudzadzarika kunoita chidhakwa mumarutsi acho.

¹⁵Hapana chichagona kuitwa muIjipiti nenhungamiri nevokumuswe vacho kana kuitwa nebazi romurara kunyange norutsanga zvarwo.

¹⁶Pazuva iroro vaIjipiti vachaita savakadzi chaivo vodedera kutya simba roruoko rwaTenzi wehondo nehondo runenge rwozunzwa pamusoro pavo.

¹⁷Nyika yokwaJudha ichava chazezesa kuvaIjipiti. Anongoinzwa chete ichidomwa achatya pamusana pedzavarongerwa naTenzi wehondo nehondo.

¹⁸Musi iwoyo munyika yeIjipiti muchava namaguta mashanu anotaura rurimi rweKanani vachitopika naTenzi wehondo nehondo. Rimwe rawo richanzi, “Gutarezuva.”

¹⁹Nomusi iwoyo kuchava neatari yaTenzi mukati menyika yeIjipiti nomusimboti waTenzi kumuganhu kwayo.

²⁰Zvichange zviri chiratidzo chinopupurira Tenzi wehondo nehondo munyika yeIjipiti pavanochema kuna Tenzi pamusana pevanodzvinyirira vamwe iye anozovatumira mununuri achavadzivirira achivaponesa.

²¹Tenzi achazvizivisa kuvaIjipiti, vaIjipiti vachazivawo Tenzi pazuva iroro vagomupfugamira nokupira kwaari zvibayiro nomupiro wokupisa. Vachapika mhiko kuna Tenzi vachidzichengeta.

²²Tenzi acharova Ijipiti nedenda, airova kudaro, achazoiporesa, ivo vachazotendeukira kuna Tenzi, iye achazonzwa zvichemo zvavo agovarapa.

²³Nezuva iroro kuchava nomugwagwa mukuru unobva kuIjipiti uchienda kuAsiria. VaAsiria vachauya muIjipiti, vokuIjipiti vachiendawo kuAsiria uye vaIjipiti vachanamata pamwechete nevaAsiria.

²⁴Pamusi iwoyo Isiraeri ichava yechitatu kunyika yeIjipiti neAsiria dzichange dzava chikomborero chaicho pakati penyika,

²⁵Tenzi wehondo nehondo, dzaachakomborera achiti, “Makakomborerwa zvenyu imi vanhu vangu vaIjipiti, nemi vaAsiria vandakasika namaoko angu, nemi vaIsiraeri nhaka yangu.”