Read Bhaibhiri Idzva rechiShona Isaya 21 Bible Online

Isaya 21 - Bhaibhiri Idzva rechiShona bible

Isaya 21

¹Herino shoko rakanangana nerenje rokugungwa. Sokutsvaira kunoita chamupupuri munyika yeNegevhu chinouya chichibva kugwenga, chichibva kunyika inotyisa kwazvo.

²Ndakaziviswa nezvechiratidzo chakaomarara, mupambi wopamba, muparadzi woparadza. Eramu enda uku, Midhia komba kutura mafemo kwose kwawakakonzera ndichakupedza.

³Ipapo ndarwadziwa kwazvo zvokuti muchiuno mangu, handichagona. Ndabatwa ini namarwadzo samarwadzo omukadzi ari kusununguka. Ndakotamiswa zvokuti handichanzwa, ndatopazamiswa nazvo zvokuti handichaona.

⁴Ndatenderera musoro, nhamo yandishayisa chokuita. Mambakwedza andanga ndichichemera andisandukira akava nguva yokuhuta kudedera.

⁵Hezvo vogadzikira chokudya pateburu vowaridza dzichari vachidya vachinwa zvavo. “Mukai machinda, zorai nhoo mafuta,”

⁶nokuti Tenzi akanditi, “Enda unoisa munhu nharirire azivise zvaanenge aona.

⁷Saka kana aona vachairi vengoro dzehondo dzamabhiza akabopwa ari maviri maviri navanhu vakatasva madhongi navakatasva ngamera, ngaanyatsoteerera, ateererese chaizvo.”

⁸Ipapo nharirire iya yakati, “Tenzi, ini ndimire panharire pano pandinoswera ndiri masikati nousiku hwose ndopandinenge ndiri.”

⁹Zvino havo vauya vachairi vengoro dzehondo dzamabhiza akabopwa ari maviri maviri! Iye akati, “Yaparara, yaparara Bhabhironi pamwechete nezvifananidzo zvose zvavamwari vayo azvibwadamurira pasi.”

¹⁰Nhai nyakupurwa, nyakuurutswa wangu zvandanzwa kuna Tenzi wehondo nehondo Mwari weIsiraeri, ndozvandinokuzivisa.

¹¹Herino shoko rakanangana neDhuma. Mumwe ari kudaidza kwandiri ari kuSeiri, ari kuti, “Nharirire we-e kusvikira riniko nousiku ihwohwu? Nharirire we-e, kusvikira riniko nousiku ihwohwu?”

¹²Mutariri ndokuti, “Mangwanani achauya uye usiku huchauya zvakare. Kana uchida kuzobvunza, dzoka zvako uzobvunza.”

¹³Herino shoko rakanangana neArabhia. Mumajokochwa amasango omuArabhia ndomamuchatogara, imi vamadungwerungwe engamera vokwaDhedhani

¹⁴ane nyota muigirei mvura, anenge apotera muchingureiwo nechokudya, imi vagari venyika yokwaTema,

¹⁵nokuti vakatiza mapakatwa, vachitiza bakatwa rakaburitswa muhara, nouta hwakanga hwatatamurwa, kuri kutiza hondo yatsviriridza kurwiwa

¹⁶nokuti Tenzi akanditi, “Gore risati rapera sezvakangoita makore amarikicho mbiri yose yokwaKedhari ichapera kuti hwa.

¹⁷Uye marimbirimbi evarwi vemiseve vokumagamba ehondo okuvanakomana vokwaKedhari vachava vashoma nokuti Tenzi Mwari weIsiraeri ndizvo zvaareva.”