Read Bhaibhiri Idzva rechiShona Isaya 24 Bible Online

Isaya 24 - Bhaibhiri Idzva rechiShona bible

Isaya 24

¹Chinzwai, Tenzi achaparadza pasi pose Achipaita renje achawondonga nyika achimwararanisa vageremo.

²Munhu wose achaitirwa zvimwechetezvo, vangave vanhu zvavo kana mupristi, angave muranda kana tenzi wake, angavewo musikana webasa kana amai vaanoshandira angave mutengi kana mutengesi, angave mukweretesi kana mukwereti, angave mudzoreri kana mudzorerwi.

³Pasi pose pachanyatsoparadzwa zvokunyatsoitwa dongo chairo nokuti Tenzi wazvitaura.

⁴Pasi pose pari kuchema, pauna, nyika iri kuperezeka nokusvava, matenga ari kuperezekawo pamwechete napasi pose.

⁵Pasi pose paipiswa navagari vemo nokuti vakadarika mitemo vakaramba mirao vakatyora chitenderano chokugara nokugara.

⁶Naizvozvo rushambwa rwaparadza pasi pose vagari vemo vanotambudzikira mhosva dzavo. Ndokusaka vagari vepasi pose vakatsva kwasara vanhu vashoma.

⁷Waini inochema migirepisi inosvava vose vamafaro vaya vari kutowuwura.

⁸Rufaro rwokuridza ngoma rwamiswa, ruzha rwevamafaro rwapera, rufaro rwokuridza zvipendhani rwamiswa.

⁹Zvokunwa waini vachiimba zvachiti nho-o, hwahwa, kune avo vanohunwa, hwava kuvava.

¹⁰Guta remhirizhonga rachiti pasi mbombombo, dzimba dzose dzachinzi gwibha gwibha kuzarira, zvokuti hapana anogona kupinda.

¹¹Rave jemedzanwa mumigwagwa, pamusana pokushaya waini mafaro ose asvika kumapeto kwawo, rufaro rwapanyika rwarambidzwa.

¹²Muguta chasara hapasisina, misuo mikuru yabvungunjurwa kusara asakara.

¹³Izvozvo ndozvazvichaita mukati menyika, pakati pamarudzi avanhu sezvinongoita muti womuorivhi kana wagumwa, sepanguva yokufuhwa magirepisi nguva yokusvina waini yapera.

¹⁴Vanodaidzira vachiimba norufaro vanodaidzira nezvoukuru hwaTenzi kumadokero.

¹⁵Naizvozvo vokumabvazuva, rumbidzai Tenzi, vokunyika dzokumahombekombe kwegungwa, rumbidzai zita raTenzi, Mwari weIsiraeri.

¹⁶Kubva kwakaperera nyika tinonzwa nziyo dzokurumbidza, mbiri yaiye Mururami. Asi ndati, “Ndapera ini, ndapera simba! Nhamo yangu iyi, nokuti vanyengedzi vari kuita zvounyengedzi, vanyengedzi vari kuita zvounyengedzi chaizvo.”

¹⁷Imi vagari vapanyika kutya nehunza nomusungo zvavanemi.

¹⁸Anotiza maungira anotyisa achawira muhunza, anenge ati regai ndibude muhunza imomo anobva anzi kachi nomusungo nokuti mawindho edenga akazaruka nougaro hwenyika huri kundengendeka.

¹⁹Pasi pose panyatsomeduka-meduka, pasi pose patsemuka, pasi pose pazunzwa zvakaipisisa kwazvo.

²⁰Nyika iri kudzedzereka sechidhakwa, iri kuzvebuka semba. Kukanganisa kwayo kuri kuiremera, iri kutoputsika, haichazombomukazve.

²¹Pazuva iroro Tenzi acharanga hondo dzomudenga, mudenga imomo madzimambo apasi ipo pasi pano

²²vachaunganidzwa pamwechete savasungwa vari muhunza, vachapfigirwa mujeri mushure memazuva mazhinji vanozorangwa.

²³Ipapo mwedzi uchaora zuva rigodzima nokuti Tenzi wehondo nehondo achatonga paGomo reZioni muJerusaremu acharatidza mbiri yake kuvakuru vakuru vake.