Read Bhaibhiri Idzva rechiShona Isaya 26 Bible Online

Isaya 26 - Bhaibhiri Idzva rechiShona bible

Isaya 26

¹Musi iwoyo munyika maJudha muchaimbwa rwiyo urwu runoti: Guta redu, iguta rakasimba kununura kwaakatiita kwakabva kwava sorusvingo nechimudhuri chokudzivirira.

²Zarurai misuo mikuru, rudzi rwakatendeseka rupinde.

³Munhu anoramba pfungwa dzake dzakati kwati kwati nemi, munomuchengeta ari murugare chairwo nokuti anovimba nemi.

⁴Vimbai naTenzi narini wose nokuti muna iye Tenzi Mwari ndimo mubako rokugara nokugara

⁵nokuti akaninipisa vagari venyika dzokumusoro, guta rinozvikudza akaridukupisa akariti pasi mbombombo, muvhu chaimo kuriti umburu.

⁶Rinotsikwa-tsikwa zvaro netsoka, tsoka dzavarombo zvavo muchifambwa zvamo navasina chavanacho.

⁷Gwara rowakarurama muchechetere nzira yomururami munoiita kuti ive yakati sandara.

⁸Tenzi, zvamunenge matema imi ndozvatinomirira, imi ndimi watinomirira. Zita renyu risingakanganwike ndochido chemwoyo yedu.

⁹Ini ndinokushuwai nousiku, mweya wangu mandiri unokutsvakisisai kwazvo nokuti kana kutonga kwenyu kwasvika panyika vagari vepasi pano vanobva vadzidza ururami.

¹⁰Kana muipi akaitirwa zvakanaka, haazodzidza kururama, munyika yakarurama imomo iye anenge achingoita zvoujarijari asingamboona zvake ukuru hwaTenzi.

¹¹Imi Tenzi, muruoko rwenyu shamhu iri mudenga, asi havasi kumbozviona. Chimbovaratidzai shungu dzamuinadzo nevanhu venyu, vanyare. Nehasha dzenyu dzinopisa ririmisai vavengi venyu.

¹²Imi Tenzi, ndimi muchatiwanisa rugare, nokuti basawo rose ratinoita iri, ndimi.[31]

¹³Imi Tenzi, Mwari wedu, kune mamwe madzishe akambotitonga asirimi, asi imi ndimi mune zita ratinoziva.

¹⁴Madzishe acho iwayo akafa haachazombovazve mapenyu, vangova mimvuri havachazombomuka, ndokusaka makavaranga nokuvaparadza mukavatsakatisa zvokusamboyeukwa.

¹⁵Asi imi Tenzi makapamhidzira vanhu kurudzi rwedu, muchitiwanziridza murudzi rwedu. Imi munorumbidzwa makawedzeredza nyika yacho yose.

¹⁶Imi Tenzi, munhamo vakakutsvakai vakaita munamato yokudurura, pamaivaranga.

¹⁷Somukadzi anenge ano pamuviri anoyaura achichema mukurwadziwa kwake kana nguva yake yokusungunuka yasvika. Ndizvo zvatanga takaitawo isu tisiri panemi Tenzi.

¹⁸Takanga takazvitakura tikayaura asi takasununguka mhepo. Kununura nyika ino hatina, kunyange vagari vapanyika havana kukurirwa.

¹⁹Vakafa venyu vachava vapenyu, miviri yavo ichamuka. Vashakabvu vari muvhu mukai muimbe norufaro. Tinodaro nokuti dova renyu idova rine chiedza uye nyika yavashakabvu ichasununguka.

²⁰Vanhu vangu, endai mupinde mumba muzarire makonhi mumbohwanda kwenguva shoma kusvikira hasha dzake dzapera.

²¹Ndinodaro nokuti Tenzi ari kuuya achibva kunzvimbo yake kuzorangira vagari vepanyika zvitadzo zvavo. Pasi pose vanhu vachareurura kuuraya vanhu kwavakaita, zvitadzo zvavo vanenge vasisavanzi.