Read Bhaibhiri Idzva rechiShona Isaya 28 Bible Online

Isaya 28 - Bhaibhiri Idzva rechiShona bible

Isaya 28

¹Mune nhamo imi vanozvikudza voumambo hwokwaEfuremu hwezvidhakwa hune mukurumbira waiyevedza wava kuwuna seruva riri pamusoro pebani rine ivhu rakanaka nevakararadza newaini!

²Chinzwai, Tenzi ane rimwe gamba rakasimba akaita sedutu rine chimvuramahwe semhepo ine simba rakawanda inoparadza sedutu rakasimba ramafashamo emvura, iyeyo acharigira izvozvo pasi, pavhu chaipo zvakaomarara.

³Vanozvikudza voumambo hwezvidhakwa hwokwaEfuremu, vachatsokodzerwa pasi netsoka;

⁴mukurumbira wahwo waiyevedza, uri kuwuna seruva, uri pamusoro pebani rine vhu rakanaka, uchaita seguyu rokutangisa kuibva zhizha risati rasvika rokuti munhu kana akariona anobva aridya paanongoribata chete mumaoko.

⁵Pazuva iroro, Tenzi wehondo nehondo, achava mambo ane mukurumbira nechishongo chinoyevedza kuchitsama chavanhu vake vakasara

⁶achava iye mweya woruenzaniso kune anenge agere pakutonga achavawo simba kuna vanodzora hondo pamisuwo mikuru.

⁷Kana ivava vanodzengedza newaini vachidzadzarika nahwo hwahwa vapristi navaporofita vanodzadzarika nahwo hwahwa vapazamiswa misoro newaini vachidzadzarika nahwo hwahwa vava kuvhiringika pane zvavanooneswa, vari kukanganisika pakutonga nyaya,

⁸nokuti mateburu ose azara marutsi hapana pasisina tsvina.

⁹“Iye achadzidziswa ndiani uye ndiani achatsanangurirwa shoko racho? Ndumurwa here? Kana kuti mwana achangobva achangorumurwa?

¹⁰Zvaari kutoita mutemo nomutemo murao nomurao mutsetse nomutsetse zvishoma nezvishoma.”

¹¹Aiwa! Asi kutoti nomuromo wamabvakure, norurimi rwevanhu vechirudzi, Tenzi achataura kuvanhu vake

¹²vaakaudza kuti, “Zororo nderiri iri: zorodzai vakaneta ndokuzorora ikoku,” asi vakaramba kuteerera.

¹³Ndokusaka shoko raTenzi richizova kwavari, mutemo nomutemo, murao nomurao mutsetse nomutsetse, zvishoma nezvishoma kuti vagoenda vagoti nemanhede njaya kuwira pasi vaputsike, vateyewe vabatwe.

¹⁴Naizvozvo chinzwai shoko raTenzi imi vadadi, iyemi munotonga vanhu muJerusaremu,

¹⁵nokuti makatika imi, “Takaita chibvumirano norufu tikaita chitsidzirano neNzvimbo yeVachakabvu, panozopfuurawo shamhu yokuranga ichirakasha, haimbotisvika, nokuti isu takaita kuti kunyepa kuve ndokwatinohwanda nako, nhema dziri bako ratinohwanda.”

¹⁶Naizvozvo Tenzi Mwari anoti, “Chinzwai! Ndava kuisira ugaro hweZioni ibwe, ibwe rakaongororwa, ibwe rinokosha rapakona rougaro chaihwo hwakasimba: Anenge akatendeseka haazi kuzomboita zvamandikurumidze.

¹⁷Ndichaita kuti ruenzaniso ruve setambo yokuera nayo kururama kuri setambo yokuvakisa chimvuramabwe chichatsvaira botero ramakuhwa mvura ichakukura nzvimbo yokuvanda.”

¹⁸Ndopachapedzwa zvechibvumirano chenyu norufu, chitsidzirano chenyu neNzvimbo yeVachakabvu chichiparara. Kana shamhu yokuparadza yava kupfuura muchanyatsorikitwa.

¹⁹Nguva yose yainopfuura ichakurova ichapfuura mangwanani oga oga uye masikati nousiku. Kunzwa chete zvainoreva kuchava chinhu chinokutyisa kwazvo.

²⁰Ndinodaro nokuti zvichaita somubhedha mupfupi wokuti munhu haakwanisi kutambarara pauri uye segumbeze duku zvokuti munhu haakwanisi kurifuka,

²¹uye nokuti sezvakaita Tenzi paGomo rePerazimu achasimuka uye sezvaakaita muBani reGibheoni, achashatirwa agoita zvinhu zvake, zvinhu zvake zvisina akamboona agoshanda basa rake basa rake risina akamboriona.

²²Zvino imi zvokudada regai, majoti enyu angadaro akabva anyatsosungwa chaizvo kuti nganganga nokuti ndakanzwa ini chirevo, chirevo chokuparadza munyika mose zvamo chinobva kuna Tenzi Tenzi wehondo nehondo.

²³Ndipeiwo nzeve, munzwe zvandiri kutaura, chimbonzwaiwo munzwe zvandiri kureva.

²⁴Iye anorimira kudyara, anoramba here achingorima chete? Anoramba here achingobamura zvake ivhu nokungohara chete?

²⁵Kana achinge aita kuti pamusoro pacho pati chechetere, haamwaye here mbeu dzedhiri nokudyara mbeu dzekumini, agoisamo koroni mumitsetse, nebhari panzvimbowo payowo chaipo, koroni yesipereti yakapoteredzawo kumucheto?

²⁶Akadzidziswa zvakanaka nokuti Mwari wake ndiye anomuudza.

²⁷Dhiri imbesa isingakwanisiki kupurwa nechirhei chokupurisa kana kuita zvokukungurutsa vhiri rengoro pambesa yekumini. Asi dhiri inotopurwa neshamhu, kumini ichipurwawo nesharapu.

²⁸Pakupura, munhu angabva apwanya koroni yechingwa here? Kweteka, haarambe achingoipura chete. Paanofambisa mavhiri engoro yake pairi namabhiza ake, haabvi aibvukuchura.

²⁹Izvozvi izvi zvinobvawo kuna Tenzi wehondo nehondo. Mupi wemazano anoshamisa ano ungwaru hunoshamisa.