Read Bhaibhiri Idzva rechiShona Isaya 33 Bible Online

Isaya 33 - Bhaibhiri Idzva rechiShona bible

Isaya 33

¹Zvichakuwana iwe muparadzi, iwe usina kumboparadzwa iwe woujarijari usina ani akambokuitirawo ujarijari! Paunongomira chete kuparadza unobva waparadzwa, paunongogumisa kuita ujarijari, unobva waitirwa ujarijari.

²Tenzi, tinzwireiwo nyasha tinotarisira kwamuri Ivai simba redu mangwanani oga oga, mutiponesewo panguva yokutambudzika.

³Pamusana pemaungira ebongozozo, ndudzi dzavanhu dzichiti ware kutiza pamunosumuka imi, marudzi avanhu anoita chimwanda-mwanda.

⁴Vachaunganidza zvokupamba sokuunganidzwa kunoitwa hwiza vanhu vachichirikira pazviri sokumomotera kunoita mhashu.

⁵Tenzi anokudzwa nokuti anogara kumusoro achazadza Zioni noruenzaniso noururami.

⁶Zvinodiwa zvacho achaita kuti zvivepo zvinoti: ruponeso rwakawanda noungwaru noruzivo, kutya Tenzi ndiko kunenge kuri upfumi hwake.

⁷Chionai, magamba[36] anochema kunze uku, vamiririri vorugare vachihwihwidza zvinosiririsa kwazvo.

⁸Migwagwa mikuru yangove migwagwa zvayo isina anoshandisa. Vanhu venzira hapasisina. Zvibvumirano zviri kutyorwa vokupa umboo[37] vachizvidzwa, munhu haachaonekwa somunhu.

⁹Nyika iri kugurukuta ichiondongoka Rebhanoni yapazamiswa musoro nazvo, yasvava; Sharoni yava kunge gwenga zvaro, uye Bhashani neKarimero dzasasamuka mashizha adzo.

¹⁰Zvanzi naTenzi, “Zvino ndava kusimuka, zvino ndava kunyatsoti kwaku kusimuka pari zvino ndiremekedzwe.

¹¹Zvirongwa zvenyu marara chete zvamunoburamo magufu, kufemeruka kwenyu ndomoto uchakuroromesai.

¹²Ndudzi dzavanhu dzichaita sedzapiswa kuita rota seminzwa yatemerwa pasi ikapiswa mumoto.”

¹³Chinzwai munzwe zvandakaita imi muri kure uko nemi muri padyo muzive simba rangu.

¹⁴Vatadzi muZioni umu vava kutya. Vasingatyi Mwari hedzo mbwende kudedera dzichiti: “Ndiani chaizvo pakati pedu angagone kugara mumoto unororomesa? Ndiani chaizvo pakati pedu angakwanise kugara mukutsva kusingaperi?”

¹⁵Munhu anofamba noururami achitaura zvakarurama, anosema upfumi hunowanikwa nokuonesa vanhu ndondo, anozunza maoko ake kuti arege kubata pfumbamuromo, anodzivira nzeve kuti arege kunzwa zvokudeura ropa, anozarira maziso ake kuti arege kutarisa zvinhu zvakaipa.

¹⁶Iyeyo achagara makakwirira nyare yake yokuzvidzivirira ichange iri tsvingo dzamabwe achiwaniswa chokudya chake, mvura yake yokunwa isingamboshayika.

¹⁷Maziso ako achaona kuyevedza kwamambo, achaona nyika yakatandira nokoko.

¹⁸Mumwoyo mako ucharangarira nezvaityisa uchitoti “Aripiko wokuverenga uya, aripiko uya aiera kurema kwomutero? Aripiko wokuverenga nharire uya?”

¹⁹Vanhu vaye vokutsvinya hauchazovaonizve vane mutauro wakavandika usinganzwisisike vanokakama vanorurimi rusinganzwisisike.

²⁰Tarisa uoneka guta reZioni guta remazuva edu makuru akatemwa unobva waonawo Jerusaremu musha worunyararo, musha wepfirapo dzamatendhe ane hoko dzisingambofa dzakadzurwa, asina kana tambo zvayo inodimuka.

²¹Imomo Tenzi acharatidza simba rake pamusana pedu, inenge iri nzvimbo ine hova nenzizi dzakapamhama, kusina ngarava dzokurwisa nadzo dzine mikwasvo dzinofamba nomo kana ngarava huru, dzinopfuura nomo;

²²nokuti Tenzi ndiye mutongi wedu, Tenzi ndiye anotipa mutemo, Tenzi ndiye mambo wedu ndiye achatinunura.

²³Tambo dzoko dzadembera hadzichakwanisi kusimbisa bango rengarava bango rengarava panzvimbo paro kana kuti tendhe rokufambisa ngarava nemhepo rirambe rakatambanuka. Ipapo vanhu vachagovana zvavo zvinhu zvizhinji zvokupamba nezvavanowana muhondo kunyange vakaremara vachatotorawo zvinowanikwa muhondo.

²⁴Hapana mugari wemo achati, “Ndiri kurwara.” Vanhu vanogara imomo vacharegererwa uipi hwavo.