Read Bhaibhiri Idzva rechiShona Isaya 35 Bible Online

Isaya 35 - Bhaibhiri Idzva rechiShona bible

Isaya 35

¹Renje richafara nyika yakaoma ichafara gwenga richamwekuma nokufara, rachiti kakaka maruva kutumbuka somunhundurwa.

²Richanyatsoti namaruva akawanda tsvete rigopembera nokufara nokuimba, richapiwa mbiri yeRebhanoni nokuyevedza kwakaita sekweKarimeru nekweSharoni. Vachaona mbiri yaTenzi nomukurumbira waMwari wedu.

³Simbisai maoko akaregedzera musimbise mabvi akarengwendeka.

⁴Itii kune vane mwoyo unotya, “Simbai mwoyo, regai kutya. Tarirai muone, Mwari wenyu ari kuuya kuzotsividza nokutsividza kwaMwari, achizogadziridza zvamakakanganisirwa, achauya okununurai.”

⁵Maziso amapofu achasvinudzwa, nzeve dzamatsi dzichivhurwa.

⁶Ipapo mheta makumbo dzichachirika semhene, rurimi rwechimumumu ruchaimba norufaro nokuti murenje muchaita mafashamo emvura, mugwenga muchaita tukova twemvura.

⁷Mujecha munopisa muchava madziva, ivhu rine nyota richiva zvitubu zvemvura. Paimbova dambiro ramakava pachava jahwi rine uswa netsanga nenhokwe.

⁸Imomo muchava nomugwagwa mukuru uchanzi, “Mugwagwa Unoera.” Vakan'ora havafambi nawo. Hakuna benzi richafamba nawo kundorasisa vanenge vatsaukira kwairi. Kunyange mapenzi avanhu chaiwo haamborasika zvawo imomo.

⁹Muchange musina shumba imomo kana chikara chinorura chinotsikamo hazvisi kuzowanikwa imomo. Asi vakanunurwa ndovachafamba zvavo naimomo,

¹⁰vakaponeswa ivavo vaTenzi, vachadzokera vagouya kuZioni vachiimba, pamusoro apa, vakadzika sendaza rufaro runogara narini wose Vachawana kupembera nokufara, kusuwa nokudemba zvichati ware kutiza.