Read Bhaibhiri Idzva rechiShona Isaya 39 Bible Online

Isaya 39 - Bhaibhiri Idzva rechiShona bible

Isaya 39

¹Panguva iyoyo Merodhakibharadhani mwanakomana waBharadhani mambo weBhabhironi, akatumira nhume netsamba nechipo kuna Hezekiya nokuti akanga anzwa kuti Hezekiya akanga amborwara akaita nani.

²Hezekiya akavagamuchira zvake akavaratidza dzimba dzake dzokuchengetera upfumi hwomumuzinda hunoti sirivha nendarama netwokubikisa tunonhuwirira namafuta anokosha nezvombo zvake zvehondo nezvose zvaiva mudzimba dzake dzokuchengetera zvinhu. Hezekiya hapana chaakasiya kuvaratidza chaiva mumuzinda make kana zvose zvoumambo.

³Muporofita Isaya akaenda kuna Hezekiya akati kwaari, “Ko shoko rauya navarume ava ndereyi? Vakakubvira nepi?” Hezekiya akati, “Vauya kwandiri vachibva kunyika iri kure kwazvo kuBhabhironi.”

⁴Iye akati, “Chiiko chavaona mumuzinda menyu?” Hezekiya akapindura achiti, “Vaona zvose zviri mumuzinda mangu. Hapana chandasiya kuvaratidza mudzimba dzangu dzokuchengetera zvinhu.”

⁵Isaya ndokuti kuna Hezekiya, “Chiteererai munzwe zvarehwa naTenzi wehondo nehondo.

⁶Kuchasvika mazuva okuti zvose zviri mumuzinda menyu nezvakachengetwa namadzibaba enyu kusvikira pari nhasi zvitutwe kuendwa nazvo kuBhabhironi pasina chinozosara, ndiTenzi anodaro kutaura.

⁷Vamwe vana venyu vakomana vamakabereka vachatapwa vakasvikogadzirwa kuitwa vayuniki mumuzinda wamambo weBhabhironi.”

⁸Hezekiya akati kuna Isaya, “Shoko raTenzi rawataura ishoko rakanaka, nokuti chero kuine rugare nokugadzikana kwezvinhu mumazuva angu.”