Read Bhaibhiri Idzva rechiShona Isaya 40 Bible Online

Isaya 40 - Bhaibhiri Idzva rechiShona bible

Isaya 40

¹“Nyaradzai, nyaradzai vanhu vangu” ndizvo zviri kutaura Mwari wenyu,

²“Taurirai Jerusaremu mazwi anonyaradza mwoyo, muparidze Jerusaremu kuti nguva yenyu yehondo yapera[43] uye kuti mhosva yenyu yaregererwa uyewo kuti makatogamuchira kare kakapetwa kaviri chirango cheshamhu yaTenzi chezvitadzo zvenyu zvose.”

³Izwi rinodaidzira richiti, “Gadzirai murenje mugwagwa waTenzi, ruramisirai Mwari wedu mugwagwa mukuru mugwenga.

⁴Mapani ose ngaafushirwe, makomo ose nezvikomo ngazviparadzirwe zviti pasi sandarara. Panenge pasina kuenzana panyatsonzi chechetere, pana magadhi magadhi panyatsoti ware ware.

⁵Mbiri yaTenzi ichaburitswa pachena, vanhu vose vachaiona pamwechete, nokuti Tenzi anozvitaura nomromo wake.”

⁶Izwi rakati, “Daidzira!” Ini ndikati, “Ndodaidzira kuti kuti?” Iti, “Vanhu vose zvavo uswa norunako rwavo rwakaita seruva zvaro resango.

⁷Uswa hunouna, ruva rinosvava pazvinongorohwa nemhepo inofuridzwa naTenzi kwazviri, chokwadika vanhu uswa zvahwo.

⁸Uswa hunouna, ruva rinosvava asi shoko raMwari wedu rinogara nokusingaperi.”

⁹Kwira pamusoro pegomo refu iwe Zioni muparidzi wamashoko akanaka, udaidzire nezwi guru iwe Jerusaremu muparidzi wamashoko akanaka, daidzira usatye. Iti kumaguta ekwaJudha, hoyo, tarirai muone Mwari wenyu.

¹⁰Tarisai muone, Tenzi ari kuuya nesimba rake anotonga nesimba roruoko rwake. Tarirai muone, mubayiro wake anawo, muripo wake ndiwo waanotungamidza.

¹¹Achafudza zvipfuwo zvake somufudzi achagumbatira hwayana mumaoko ake achidzitakura pachifuva chake achinyatsonanaidza dzina vana.

¹²Ndiani akamboera mvura yamakungwa nechanza choruoko rwake kana akamboerawo matenga nechanza chake, kana akamboisa ivhu rapasi pose zvapo mumugomo kunyange kuera makomo muzvikero, kana zvikomo muchikero chomurengarenga?

¹³Ndiani akambotungamirira Mweya waTenzi, kana segweta rake achimurayiridza;

¹⁴waakambondobvunza mazano kuti amujekesere ndiani; akambomudzidzisa gwara roruenzaniso ndiani, akambomudzidzisa amupa ruzivo ndiani; akamuratidza nzira yokunzwisisa nayo?

¹⁵Chinzwai munzwe, marudzi ose avanhu aya akaita sedonhwe remvura riri mumugomo, uye akangoita semhukutu iri muzvikero, muonewo zvenyu kuti, zvitsuwa anozvikuhumura zvake seguruva rakatsetseka.

¹⁶Rebhanoni haina huni dzakakwana kana mhuka dzayo hadzikwane kuita mupiro wokupisa.

¹⁷Marudzi ose zvawo kwaari iye akangoita sechinhu chisina maturo, iye anoaona seasiri chinhu zvavo uye sechinhu pasina.

¹⁸Mwari mungamufananidze nei chaizvo, kana kuti chii chaichowo chamungamuenzanise nacho?

¹⁹Chifananidzo chokunamata, chinotoita zvokugadzirwa nomushandi, mhizha yezvendarama yochinamirira nendarama yochigadzirira cheni dzesirivha.

²⁰Murombo anotozozvisarudzira zvake huniwo zvadzo dzisingaori kuti awane chokuitisa mupiro anotsvakawo nyanzvi inoziva basa kuzomisa chifananidzo chokunamata chisingazobviswa.

²¹Hamuna zvamunoziva here? Hamuna chamakambonzwa here? Hamuna here chamakataurirwa pakutanga? Hamunzwisisi here mavambirwo akaita nyika?

²²Iye agere pamusoro peziendanakuenda rakatenderedza nyika ina vanhu vageremo, vakaita sezvitaunhau iye akawarira matenga sejira rokudzikatirisa anoatambanudza somusasa wetendhe wokugara,

²³anoita kuti machinda ave zvinhu zvisina maturo, anoita kuti vatongi vapanyika vave vanhu pasina.

²⁴Vanoita sokungonzi simwei kana kuti dyarwei midzi isati yatombobata muvhu, iye akangovafuridza nemhepo yake vanobva vawuna votututswa nemhepo huru ine simba sehundi.

²⁵Zvino munonditora saani chaizvo wamunondienzanisa naye? Ndizvo zviri kubvunzwa naiye Anoera.

²⁶Munodiiko kumbosimudza musoro[44] mukaonawo kuti ndiani chaizvo akasika zvose izvozvi, iye anozvitungamirira sehondo nouwandi hwazvo kudaro achizvidaidza zvose namazita. Pamusana poukuru hwesimba rake uye nokuti pasimba chikakarara chaicho, hapana nechimwe chinenge chisipo.

²⁷Nhaiwe Jakobho, nhaiwe Isiraeri, unodirei kutaura. Chii chauri kunyunyutira uchiti? “Upenyu hwangu ini kuna Mwari hwava chinhu chakavandika uye zvokuti ndiwane zvandinofanira kuwana Mwari haasisina hanya nazvo.”

²⁸Hamuna zvamunoziva here? Hamuna chamakambonzwa here kuti, Tenzi ndiye Mwari, Chidzachepo kuti ndiye Musiki wenyika yose zvayo kusvika kwainoperera? Haamborukutika kana kuneta zvako, udzamu hwepfungwa dzake hakuna angahubate.

²⁹Anopa simba munhu anenge arukutika, anenge asina simba anomusimbaradza.

³⁰Kunyange vechidiki vanorukutika vachitoneta, majaya anowira pasi nokuneta

³¹asi vanovimba naTenzi simba ravo richavandudzwa, vachabhururuka namapapiro samakondo vachamhanya asi vasinganeti vachafamba asi vasingarukutiki.