Read Bhaibhiri Idzva rechiShona Isaya 42 Bible Online

Isaya 42 - Bhaibhiri Idzva rechiShona bible

Isaya 42

¹“Hoyu muranda wangu wandinotsigira munhu wandakazvisarudzira, wangu wepamwoyo. Ndakaisa Mweya wangu maari, achaunzira marudzi avanhu ruenzaniso.

²Haazoita zvokudaidzira kana zvokushevedzera nenzwi rake kunyange kuita kuti rinzwike mumugwagwa.

³Rutsanga runenge rwakatyoka haridimure, rambhi rine tambo inoti kamoto roi roi kubvira haaridzime, achaunzira vanhu ruenzaniso chairwo.

⁴Haachazorasa mwoyo kana kudzokera shure. Kusvikira aunza ruenzaniso panyika, nyika dziri kumahombekombe kwegungwa dzamirira mutemo wake.”

⁵Zvanzi naTenzi Mwari, iye akasika matenga achiatambanudza nokokoko iye akawarira nyika nezviri mairi iye anopa vanhu mweya wokufema iye anopa upenyu vanofamba mairi,

⁶“Ndini Tenzi. Ndakakudaidzira kuzoita zvinhu chaizvo zvakarurama, ndakakubata ruoko ndikakuchengeta. Iwe ndiwe wandakaita kuti uve sechitenderano changu nendudzi dzavanhu chiedza kumarudzi avanhu

⁷kuzozarura maziso amapofu, kuzoburitsa vasungwa mujeri rapasi pevhu kuburitsa mujeri vagere muzarima.

⁸Ndini Yahweh, irori ndiro zita rangu. Hakuna zvako kana mumwe wandinopa ukuru hwangu kana kupa kurumbidzwa kwandinoitwa kuzvifananidzo zvokunamata zvakavezwa.

⁹Chionaika kuti, zvinhu zvakare zvakatoitika zvino ndava kukuzivisai zvinhu zvitsva nguva yokuitika kwazvo isati yasvika, ndava kufanokutaurirai nezvazvo.”

¹⁰Imbirai Tenzi rwiyo rutsva mumurumbidze, kubvira kumucheto wapasi pose. Gungwa ngaritinhire nezvose zviri mariri nenyika dzokumahombekombe kwegungwa navagari vadzo.

¹¹Gwenga namaguta aro ngazvidaidzire nezwi razvo nemishawo inogara Kedhari. Vagari vokuSera ngavaimbe nokufara kwazvo. Ngavadaidzire vari pamusoro chaipo pamakomo.

¹²Ngavape mbiri kuna Tenzi vadhumise mukurumbira wake munyika dzokumahombekombe kwegungwa

¹³Tenzi ari kuenda zvake segamba chairo rehondo, anoviruka nehasha somunhu wehondo. Anodaidzira anoshevedzera achizviratidza kuti ane simba rokukurira mhandu dzake.

¹⁴Kwenguva ndefu ndanga ndinyerere zvangu, ndanga ndakangobata mwoyo ndichizvidzora zvangu. Zvino ndava kuridza mhere somukadzi ari panguva yokusununguka, ndochitura femo ndichifemereka.

¹⁵Makomo nezvikomo ndichazviti pasi mbombombo kuparadza ndiomese zvose zvinomeramo. Nzizi ndichadzisandura kuita zvitsuwa madziva ndichiaomesa.

¹⁶Uye mapofu ndichaatungamirira nenzira yavasingazivi, ndichivatungamirira nomutunzira twavanga vasingazivi. Panzvimbo perima rakavaputira ini ndichaisa chiedza pana makomba makomba ndichiita kuti pati chechetere. Izvozvi izvi ndozvinhu zvandichaita, handisi kuzovafuratira.

¹⁷Asi vachapishunurwa vachinyadziswa chaizvo vanovimba nezvifananidzo zvavo zvokunamata zvakavezwa, vanoti kuzvifananidzo zvoutare hwakaita zvokunyungurutswa, “Imi ndimi vamwari vedu.”

¹⁸Chinzwa unzwe iwe matsi chitarisa iwe bofu uonewo!

¹⁹Ndiani chaizvo ano upofu kusatoti iye muranda wangu, kana kuti ane umatsi sohwenhume yangu yandinotuma? Ndiani chaizvo ane upofu sehwaiye akateketererweni uyu, kana kuti ane upofu hwakaita sohwemuranda waTenzi?

²⁰Unoona zvako zvinhu zvakawanda asi haunyatsozvicherechedza, nzeve dzako dzakazaruka asi haunzwe.

²¹Tenzi, pamusana pokururama kwake, akafadzwa nokurumbidza mutemo wake nokuita kuti ukurumbire.

²²Asi vanhu ivava vanhu vakabhinywa, vakapambwa, vose zvavo vakazaririrwa muninga vakahwandiswa mujeri, vakapinda munhamo isina anonunura, chinhu zvacho chokupamba chisina anoti, “Ngachidzorerwe!”

²³Pakati penyu nyaya iyoyi ndiani angaitetekere nzeve akateerera akanzwa zvakanangana neramangwana?

²⁴Ndianiko wakaisa wokwaJakobho mumaoko omupambi, uye vokwaIsiraeri mumaoko amabhinya? Handiti ndiTenzi here watakatadzira, ana makwara avasina kutevedza ano mutemo wavasina kuteerera?

²⁵Ndokusaka akapedzera paari shungu dzokuviruka kwaakanga aita nehasha, nokumupinza munhamo yehondo. Akaputirwa namarimi omoto asi kuti zvazvaireva haana kuzvibata zvakamupisa asi chidzidzo chacho hachina kumupinda mumusoro.