Read Bhaibhiri Idzva rechiShona Isaya 45 Bible Online

Isaya 45 - Bhaibhiri Idzva rechiShona bible

Isaya 45

¹Tenzi ari kutaurira muzodzwa wake Sairasi wandakabatana ruoko rwerudyi zvokuti ndinofanokurira marudzi avanhu mberi kwake nokushayisa madzimambo simba nokufanozarura makonhi mberi kwake kuitira kuti misuo mikuru irege kupfigwa achiti,

²“Ndichafanoenda mberi kwako ndichifanoita kuti nzvimbo dzakatunhumara dziti chechetere, ndichipaza kuti mwarara makonhi endarira ndichidimura zvihuri zvesimbi.

³Ndichakupa upfumi hwomurima hwakavigwa munzvimbo dzechivande kuti uzive kuti ini ndini Tenzi Mwari weIsiraeri ari kukudoma nezita.

⁴Chandiri kuitira muranda wangu Jakobho, naIsiraeri wandakasarudza. Ndinokudoma nezita ndichikudaidza nezita redzinza rako kunyange zvako usingandizivi.

⁵Ndini Tenzi hakuna mumwe, hakuna mumwe Mwari kunze kwangu anokupa simba ndini kunyange usingandizivi

⁶kuitira kuti kubvira kumabuda zuva kusvikira kumadokero vanhu vagoziva kuti hakuna mumwe kunze kwangu. Ndini Tenzi hakuna mumwe.

⁷Ndini ndinoita kuti chiedza chivepo ndichisikawo rima. Ndini ndinoita kuti kuve nokugarika. Ndini ndinounza pfumvu. Ndini iyeni Tenzi ndinoita zvinhu zvese izvozvi.

⁸“Imi matenga muchadenga'mu nayai, makuti anaise ururami nyika ngaizaruke ruponeso rumere pairi[47] iite kuti ururami hutungirewo, Ini Tenzi ndini ndinozviita.”

⁹Ane nhamo munhu anokakavadzana noMusiki wake, ihari inorwisana nomuumbi wayo![48] Iro ivhu rokuumbisa ringabvunze here anoumba naro kuti, “Ko ndicho chii ichochi chauri kuumba?” Kana kuti, “Inga zvokuumba izvi, hamuna maoko nazvo?”

¹⁰Ane nhamo mwana anoti kuna baba, “Ko ndicho chiikowo ichochi chamakabereka?” Kana kutoti zvake kuna mai, “Ko chiikowo ichochi chamakasununguka?”

¹¹Tenzi, iye Anoera waIsiraeri, Musiki wake anoti, “Wada here iwe kundibvunza nezvevana vangu? Kana kutondiudza zvokuita nebasa randinoita ini namaoko angu?

¹²Ndini ndakaita nyika ndikasika munhu pairi; ini namaoko angu ndini ndakatambanudza matenga uko nekokoko. Ndini ndakabata mumaoko gurusvusvu rezvose zvomudenga imomu.

¹³Ndini ndakamumutsa mwoyo ndikamupa ukundi ndicharuramisawo makwara ake ose. Achavaka guta rangu achasunungura vanhu vangu vari muutapwa pasina zvokupiwa mubayiro kana muripo.” Ndozvinotaura Tenzi wehondo nehondo.

¹⁴Zvanzi naTenzi, “Zvinhu zvinoshandwa kuIjipiti noupfumi hwokuItiopia nevaSabhia ivo vaye hofori dzavanhu zvichauya kwamuri zvichiva zvenyu. Vachati rongondo munzira kukuteverai vachayambukira kwamuri vakasungwa nemajoti vachizoti kwamuri pasi kota kota. Vachakutetererai vachiti, imimi chete ndimi muna Mwari, hakuna mumwe, kunze kwake, hakunazve mumwe Mwari!”

¹⁵Imi muri Mwari anozvivanza zvenyu imi Mwari weIsiraeri, Mununuri.

¹⁶Vose zvavo vanenge vanyadziswa, vatsveruka, vagadziri vezvifananidzo zvokunamata vachadumbirwa pamwechete.

¹⁷Asi Isiraeri inonunurwa naTenzi nokununura kunogara narini wose asi imimi zvokunyadziswa hamunyadziswe kana kutsverutswa zvako nokusingaperi.

¹⁸Chikonzero ndechokuti iye Tenzi, Nyakusika matenga ndiye Mwari iyeyu akaumba nyika akaiita, akaita kuti imire kudai; haana kuisika sechinhu chisina kunyatsoumbwa. Chaakaisikira kuti igarwe navanhu. Ari kuti, “Ini ndini Tenzi, hakuna mumwe.

¹⁹Handina kutaura muchivande mukati menyika yerima. Handina kumboti kuzvizvarwa zvokwaJakobho, ‘Nditsvakei pasina.’ Zvandinoreva ini Tenzi, zvakarurama ndinotaura zvinhu zviri pachokwadi.”

²⁰“Kokorodzanai muuye muswedere pedyo pamwechete imi vakapunyuka vokumarudzi avanhu uku! Havana noruzivo zvarwo ivo vanotakura zvifananidzo zvokunamata zvezvimiti vachidzunga nazvo vachingogoorera kunamata kuna mwari asingagone kununura.

²¹Zivisai vanhu mupire nyaya yenyu murege vapane mazano pamwechete! Ndiani akafanozvitaura izvozvi kareko? Ndiani akazvizivisa vanhu kare ikako? Handisiri here ini Tenzi hakuna mumwe Mwari kunze kwangu ini, Mwari akarurama, Mununuri hakuna mumwe kunze kwangu.

²²“Tendeukirai kwandiri muponeswe imi vekwose kwakaperera nyika ndinodaro nokuti ini ndini Mwari hakuna mumwe.

²³Ndinopika neni pachangu kuti shoko rangu randareva muururami muromo usingawire pasi rinoti, ‘Ibvi rose zvaro[49] richandipfugamira rurimi rwese zvarwo ruchandipupura.’

²⁴“Zvichataurwa nezvangu zvichinzi, ‘Muna Tenzi chete ndimo mune ururami nesimba. Vose zvavo vaiva nedaka naye vachauya kwaari vachinyara.’

²⁵“Muna Tenzi umu zvizvarwa zvose zvokwaIsiraeri zvichava nokukurira nembiri.”