Read Bhaibhiri Idzva rechiShona Isaya 47 Bible Online

Isaya 47 - Bhaibhiri Idzva rechiShona bible

Isaya 47

¹Chiburuka pasi ugare pavhu iwe mukunda mhandara, guta reBhabhironi ugare pasi usina chigaro choumambo. Iwe mukunda, guta revaKaridhea nokuti hauchanzi munhu ano mwoyo munyoro mwoyo wokuziva.

²Chitotora makuyo uchikuya zvako upfu, vhoiri rako bvisa, katanura rokwe rako rinozvezvera napasi. Kwinya rokwe rako urisvitse muchiuno uyambuke nzizi.

³Muviri wako uchaiswa pachena, uonererwe navanhu. Ndichatsividza ndisina wandinosiya.

⁴Mununuri wedu ndiTenzi wehondo nehondo, ndozita rake iroro, ndiye Anoera weIsiraeri.

⁵Chigara chinyararire upinde murima, iwe mukunda guta revaKaridhea, nokuti hauchazonzi shasha anotonga dzinyika.

⁶Ndakanga ndashatirirwa vanhu vangu ndikan'oresa nhaka yangu ndikaiti mumaoko mako kuche, iwe hauna kuvaitira tsiye nyoro. Pane vakanga vakwegura ava joko rako wakariita kuti rinyatsoremesesa chaizvo

⁷uchizviti, “Ndini ndichagara ndiri shasha narini wose.” Zvokuti mumwoyo mako umu zvinhu izvozvi izvi hauna kumbozvifunga kana kumborangarira zvako magumo wazvo.

⁸Zvino naizvozvo chinzwa zvinhu izvi, iwe munhu wokusasana, iwe wakanyatsogarikana unozviti mumwoyo “Ndini pano ini, hakuna mumwe akaita seni! Ini, kugara sechirikadzi, hazvitomboitika, kana iko zvako kunzi ndafirwawo navana.”

⁹Izvozvi zviri zviviri uchayerekana zvakuwira zuva rimwechetero, iko kushayikirwa navana nouchirikadzi, zvichakuwira nomwero wakanyatsokwana kunyange zvazvo iwe uine uroyi hwakanyanya kudai nesimba guru remakona ako.

¹⁰Wakatogadzikana zvako mwoyo uri muhuipi hwako ihwohwo uchitozviti, “Hakuna anondiona.” Uchenjeri hwako noruzivo rwako, zvakakurasisa uchizviti mumwoyo, “Ndini pano ini hakuna mumwe kunze kwangu.”

¹¹Asi nhamo ichakuvinga yausingagoni kupedza nokupfupira, uchawirwa nenyatwa yausingakwanise kupodza nokupira, uchayerekana wawirwa nedzinoparadza dzausina chaunoziva nezvadzo.

¹²Batisisa zvemakona ako izvozvo nezvouroyi hwako hwakanyanya ihwohwo zvawadai kushanda nazvo kubvira pauduku hwako dzimwe nguva ungagone kubudiriraka, zvimwe ungambotyisidzirawo.

¹³Waneteswa nawo mazano ako akawanda, ngaachimiraka akununure tione, ivo vanoisa matenga muzvikamu zvikamu vanoongorora nyenyedzi pakugara kwemwedzi vanoti pakugara kwemwedzi vofemberaka pamusoro pezvichazokuwira.

¹⁴Hezvo vava kunge zvidzitsi, moto wovaroromesa zvino. Havachakwanisi kuzvinunura kusimba rokupisa kwerimi racho. Haasi mavhunze okuti munhu adziye usiri moto wokugara padyo uchigota!

¹⁵Ndizvozvo chete zvavanogona kukuitira kuna ivo vacho kwawaindobvunzira kubvira pauduku hwako, vachakudzvamuka voti uyu nokwake uyu nokwake, wokukununura panenge pasisina.