Read Bhaibhiri Idzva rechiShona Isaya 48 Bible Online

Isaya 48 - Bhaibhiri Idzva rechiShona bible

Isaya 48

¹Teererai munzwe izvi imi vemba yokwaJakobho imi munodaidzwa nezita raIsiraeri uye makabva muura hwaJudha, imi munopika nezita raTenzi uye munozviti vanamati vaMwari weIsiraeri musingazviiti pachokwadi kana nomazvo,

²nokuti munozviti vagari veguta rinoera uye kuti munovimba naMwari weIsiraeri ane zita rokuti Tenzi wehondo nehondo.

³Zvinhu zvakare, ndakafanozvitaura nomuromo wangu ndikazviparidza, uye ndakazviita pakarepo zvikabva zvaitika.

⁴Pamusana pokuti ndaizviziva kuti iwe uri tsvuuramuromo wakaomarara sesimbi uye kuti sendarira hautepuki,

⁵ndakazviparidza kwamuri kubvira kare zvisati zvaitika, ndakazvitaura kwamuri ndichiti mungadaro mukazoti zvifananidzo zvedu zvekunamata ndizvo zvakazviita, kana kuti zvifananidzo zvedu zvokuveza kana zvokuumba ndozvakati zviitwe.

⁶Makazvinzwa zvino mazvionaka zvose izvi saka imi hamusi[50] kubvuma here? Kubvira iye zvino ndavakukutaurirai zvinhu zvitsva zvinhu zvakavanzika zvamusati mamboziva.

⁷Zvandava kuita iye zvino, kwete zvakaitika kare kare, kusvika pari nhasi hamusati mambozvinzwa nokuti mungadaro mukati, “Ndaizviziva wani.”

⁸Hamuna kumbozvinzwa kana kumbozviziva, nakare kose hazvina kumbopinda munzeve dzenyu, nokuti ndaiziva kuti imi hamutendeki, uye kuti kubvira pauduku hwenyu mainzi vapanduki.

⁹Pamusana pezita rangu ndiri kumbodzora zvangu hasha dzangu. Pamusana pembiri yangu ndiri kudzidzora zvangu kuti ndirege kukuparadzai.

¹⁰Chinzwai, ndakakunatsai, asi kwete kuita sesirivha, ndakakuedzai muvira ramatambudziko.

¹¹Ndiri kuzviitira ini pachangu, Wandiri kuitira wacho ndini. Chandingashorerwe zvangu zita rangu chii? Handingaregi mbiri yangu ichienda zvayo kuna vamwe.

¹²“Chimbondinzwa unzwe Jakobho, iwe Isiraeri wandakadaidza. Ndini Iye ari, ndini wokutanga[51] ndini wokupedzesera.

¹³Ini noruoko rwangu ndini ndakaita ugaro hwenyika ini norudyi rwangu ndikaawarira matenga. Pandinozvidaidza zvinobva zvati pamwechete zhandanu kumira.

¹⁴“Kokorodzanai mose zvenyu munzwe, ndiani pakati pavo akaparidza zvinhu izvozvi? Tenzi anomuda achiita zvaanoda neBhabhironi, nesimba roruoko rwake acharwisa vaKaridhea.

¹⁵Ini iyeni ndini ndataura, ndini ndakamudaidza ndikauya naye uye achabudirira mune zvose zvaanoita.

¹⁶Swederai kwandiri munzwe izvi, kubvira pakutanga handina kumbotaura, muchivande, kubvira panguva yazvakaitika ini ndakanga ndiripo.” Iye zvino Tenzi Mwari andituma neMweya wake.

¹⁷Zvanzi naTenzi, Mununuri wenyu, iye anoera weIsiraeri, “Ndini Tenzi, Mwari wenyu iye anokudzidzisai zvine chimuko, anokutungamirirai mugwara ramunofanira kufamba naro.

¹⁸Dai makangoteerera waro mitemo yangu, rugare rwenyu rungadai rwakaita serwizi, kururama kwenyu kuchiitawo samasaisai egungwa,

¹⁹vana venyu vangadai vakaita sejecha kuwanda, zvizukuru zvenyu zvakaita setsanga dzaro zita ravo risingamboitwa kuti rirove kana zvako kutsakatika kwandiri.”

²⁰Budidzanai muBhabhironi mutize munyika yeKaridhea Paridzai vanhu zvinhu izvozvi, muchiita mupururu wokupembera kufara muchivazivisa izvozvi zvisvitsei kwakaperera nyika chaiko muchiti, “Tenzi anunura muranda wake Jakobho!”

²¹Havana kumbonzwa nyota paakavatungamirira nomurenje, akavaitira kuti mvura iyerere ichibuda mudombo, akatsemura padombo mvura ikapfachuka kubuda.

²²Zvanzi naTenzi, “Vakaipa havana rugare.”