Read Bhaibhiri Idzva rechiShona Isaya 49 Bible Online

Isaya 49 - Bhaibhiri Idzva rechiShona bible

Isaya 49

¹Nditeererei munzwe imi nyika dzokumahombekombe, munzwe imi ndudzi dzavanhu dzokurekure Tenzi akandidaidza ndichiri munhumbu[52] akanditumidza zita ndiri munhumbu mamai vangu.

²Akaita kuti muromo wandinotaura unge bakatwa rakapinza akandihwandisa mumumvuri weruoko rwake. Akandiita museve wakakwenenzverwa akandihwandisa mumukutu wake.

³Akanditi, “Iwe ndiwe muranda wangu iwe Isiraeri uchaita kuti ndidhumhe mbiri.”

⁴Asi ini ndakati, “Inga ndakashandira pasina ndakapedzera simba pasina, nezvinhu zvisina maturo ose. Asi changu ini chiri muna Tenzi, nomubayiro wangu una Mwari wangu.”

⁵Saka zvino zvanzi naTenzi, iye akandiumba ndichiri mudumbu kuti ndizova muranda wake wokudzosera vokwaJakobho kwaari kuti Isiraeri izoungana kwaari nokuti ini ndiri munhu anoremekedzeka kuna Tenzi, uye Mwari ndiye simba rangu,

⁶iye anoti, “Chinhu chiduku nhai chokuti iwe uve muranda wangu, wokumutsa rudzi rwekwaJakobho nokudzosera pakare vacho vakachengetedzeka vokwaIsiraeri. Inga ndichaita kuti uve sechiedza kumarudzi evanhu kuitira kuti ruponeso rwangu rusvike kwakaperera nyika chaiko.”

⁷Zvanzi naTenzi, iye Mununuri weIsiraeri iye Anoera wayo kuna iye anozvidzwa zvokupedzesera anosemwa namarudzi evanhu, iye muranda wevatongi achiti, “Madzimambo achakuona vakasimuka machinda vachakupfugamira pamusana paTenzi akatendaka Anoera waIsiraeri akakusarudza.”

⁸Zvanzi naTenzi, “Ndichakupindura panguva kwayo pazuva roruponeso ndichakubatsira ndichakuchengeta. Ndichaita kuti uve mumiriri wevanhu vose ndichiita chitenderano changu navo chokuvadzosera nyika uye vagogoverwa nhaka yakanga yadai kuparara

⁹uye kuti uti vasungwa vabude muusungwa, vari murima vabude pachena. Vachafura zvavo, munyasi memigwagwa mikuru uye pamitunhu yakatunhumara isina miti ndopavachafurira zvavo

¹⁰havachazonzwa nzara kana nyota, kunyange mhepo inopisa nezuva hazvizovatumhisa, nokuti iye anovada kwazvo achavatungamirira achivasesedza nokuzvitubu zvemvura.

¹¹Ndichaita kuti pamakomo angu pose pave nomugwagwa, uye migwagwa yangu mikuru ichaitwa kuti itanhuke.

¹²Tarisai muone vamwe vachabva kure, vamwe vachibva kuchamhembe nokumadokero, vamwewo vachibva kunyika yeAsiwani.”[53]

¹³Imbai norufaro imi matenga upembere iwe nyika, tsemurai mumhanzi imi makomo nokuti Tenzi ava kunyaradza vanhu vake nokunzwira tsitsi vanhu vake vari munhamo.

¹⁴Asi guta reZioni rakati, “Tenzi akandifuratira Tenzi wangu, akandikanganwa.”

¹⁵“Mudzimai angakanganwe here mwana wake achiri kuyamwa, achitadza kuva netsitsi nomwana akabva munhumbu make? Kunyange zvazvo ivava vakakanganwa asi ini handizokukanganwi.

¹⁶Chinzwa unzwe ndakaita zvokukutemera senyora muzvanza zvamaoko angu, tsvingo dzako dzinogara dziri mupfungwa dzangu.

¹⁷“Vana venyu vava kupitipidza kudzoka[54] vaikuparadzai vava kubudidzana kuenda.

¹⁸Simudzai musoro mutarise kwose kwose muone kuti vari kuungana vose zvavo vachiuya kwamuri. Hezvino ndakudai ini Tenzi, ndinoti vose zvavo vachatoti pauri nyerere sezvishongo, sezvinoita muroora pamuchato kusungirira hanzu ndozvauchaita kuunganidza pauri vana vako.

¹⁹“Kunyange zvazvo nzvimbo dzemako dzakanga dzarozvwa chaizvo dzasara dzava matongo, ivhu rako rasakadzwa; uye zvino uchanyatsova kamanimani zvokuti vagari vemako vanenge vasisakwane, vaya vakambokuzhanya vachange vava kure kure.

²⁰Vana vakaberekwa nguva yenhamo yako vachakutaura uchinzwa kuti, ‘Nzvimbo iyi yaita diki kwandiri, ndiwanisewo pokugara pakati kurei;’

²¹iwe ndopauchati nechomumwoyo, ‘Ko ndiani akandiberekera ivava? Inga ndakanga ndafirwa ini ndisisabereke, ndakanga ndatopwa ini ndachinzi hangu uko njo, ko akazorera ivava ava ndiani? Zvamunoona ndakasiyiwa ndava ndoga, ko ava vabva nepiko?’ ”

²²Zvanzi naTenzi Mwari, “Chinzwa, ndichasumudza ruoko rwangu kumarudzi avanhu, ndichininira kundudzi dzavanhu. Vachauya vakatakura vanakomana mumaoko, vanasikana vako vari pamapfudzi.

²³Madzimambo achave madzibaba okukuchengeta vanavahosi vavowo vari vanamaiwo vokukurera. Vachati uso pasi kota kota vachikuremekedza, vachizvirereka zvokutonanzva guruva retsoka dzako. Ndopaunobva wazoziva kuti ini ndini Tenzi vose vanovimba neni havazonyadziswa.”

²⁴Ko chawira mumaoko eane simba chingabvutwe here kana kununura nhapwa dzomutongi ane utsinye

²⁵nokuti zvanzi naTenzi, “Kunyange chawira mumaoko meane simba chichabvutwa, nhapwa dzichinunurwa kumutongi ane utsinye nokuti ndicharwisana nevanokurwisa ndichanunura vana vako.

²⁶Ndichaita kuti ivo vanokudzvanyirira vadye nyama yomuviri wavo, vachadhakwa neropa ravo ivo sevadhakwa newaini. Ndopachaziva munhu wese kuti ini Tenzi ndini Muponesi wako, Muponesi wako noMununuri wako iyeni Samasimbaose waJakobho.”