Read Bhaibhiri Idzva rechiShona Isaya 5 Bible Online

Isaya 5 - Bhaibhiri Idzva rechiShona bible

Isaya 5

¹[8] Regai ndimboimbira zvangu shamwari yangu rwiyo rwokuda kwaaiita munda wake wamagirepisi Shamwari yangu iyi yakanga iino munda wemagirepisi pachikomo chakanyatsoorera kwazvo.

²Akauwunda akaubvisa mabwe ose akasimamo miti yomugirepisi yakanakisisa kwazvo. Akavaka dara renharirire mukati mawo uye akachera garingiro rokusvinira magirepisi mariri achiutarisira kuti uchabereka magirepisi, asi wakamuberekera indye dzamagirepisi kuvava.

³“Zvino imi vagari veJerusaremu, imi vanhu vokwaJudha ndienzanisireiwo nyaya iri pakati pangu ini Mwari nomunda wangu wamagirepisi.

⁴“Pane chimwe here chandaifanira kuitira munda wangu wemagirepisi chandisina kuuitira? Pandaiutarisira kuti ubereke magirepisi kwawo wakazoberekerei indye dzamagirepisi kuvava?

⁵“Zvino chiregai ndikuudzei zvandichaita kumunda wangu wamagirepisi. Ndichapaza ruzhowa rwawo, ugorozvwa. Ndichaputsa rusvingo rwawo utsokodzerwe pasi.

⁶Ndichauita kuti usare rangova zita chete kuti munda. Handichaupemhena kana kuutimbira Minzwa norukato ndozvichakura zvazvo imomo Ndichaudzawo makore kuti arege kunayisa mvura pauri.”

⁷Zvino ipapa apa munda wacho wamagirepisi waTenzi wehondo nehondo, ndiyo imba yaIsiraeri. Vanhu ivava vomunyika maJudha, ndivo vacho vaakanyatsosima akatarisira ruenzaniso asi wanei potodeurwa ropa zvapo achitarisirawo kururama asi inzwei mhere!

⁸Zvichakuwanai imi, munokumba dzimba nedzimba nokuzviwanira munda nomunda kudzamara pasisina kana nzvimbo muchiita kuti mugare mangova zindoga pakati penyika.

⁹Tenzi wehondo nehondo akapika ini ndichinzwa nenzeve dzangu kuti, “Dzimba huru dzakanaka idzi dzichasara dzangova matongo asina munhu.

¹⁰Munda wamagirepisi unoita gumi remahekita kukura uchange woita marita masere ewaini. Pamabhagidhi mapfumbamwe embeu dzekoroni pachakohwewa koroni inenge yoda kuzara bhagidhi.”

¹¹Vane nhamo vanomukirira rungwanangwana vachiteveredzana nedoro, vachiti tatata naro kusvikira pakati pousiku kusvikira vapengeswa naro!

¹²Pamitambo yavo vanenge vaine zvipendani nemadimbwa netambureni nenyere newaini; asi mabasa aTenzi havana hanya nawo kana kumbotarisawo zvavo zvaakaita namaoko ake.

¹³Saka vanhu vangu vachatapwa pamusana pokushaya kunzwisisa ikoko, vanhu vavo vanoremekedzwa vacho vachifa nenzara, voruzhinji vachinzwiswa nenyota.

¹⁴Naizvozvo nzvimbo yavachakabvu yava kumedzera mate ichishama muromo wayo zvakanyanyisa kwazvo kuti imedze zvayo vokumba huru vomuJerusaremu pamwechete nevoruzhinji vacho vezhowezhowe remo rokusasana.

¹⁵Vanhu vachadukupiswa vanhu vachaninipiswa navanhuwo vane mutarisiro wokuzvidza, vachaderedzwa.

¹⁶Asi Tenzi wehondo nehondo acharumbidzwa nokutonga kwaanoita iye Mwari Anoera acharatidza kuera kwake nokuda kwoururami.

¹⁷Hwayana ndopadzichafura zvadzo sokunge dziri kumafuro zvipfuwo zvakakora nembudzana zvichifura zvazvo mumatongo.

¹⁸Zvichakuwanai imi munotokweva zvenyu uipi netambo dzounyengedzi munokwekweretsana nechitadzo netambo dzakaita sedzengoro

¹⁹muchiti, “Ngaakurumidzeka, ngaachimbidzike kuita zvaanoitazvo tione. Zvaanoda kuti zvacho iye Anoera wacho weIsiraeri ngazviuyeka tizvizivewoka!”

²⁰Zvichakuwanai imi munoti zvakaipa zvakanaka, zvakanaka muchizviti zvakaipa munosandura rima muchiriita chiedza chiedza muchiita rima muchiisawo zvinovava panzvimbo pezvinotapira zvinotapira muchiisa panzvimbo pezvinovava.

²¹Vane nhamo vanozviona sevakangwara vanhu vanozviona savakachenjera.

²²Zvichakuwanai imi shasha dzokunwa waini imi zviradza zvokudiranisa mhando nemhando dzehwahwa.

²³Munopembedza ane mhosva pamusana pepfumbamuromo, munotadzisa munhu asina mhosva kuwana zvaanofanira kuti ave nazvo.

²⁴Naizvozvo sezvinongoita rimi romoto rinopisa zvidzitsi, uye sokumbombomera kunoita uswa murimi romoto, sokudaro midzi yahwo ichaora maruva ahwo agondimuka seguruva nokuti vakaramba mutemo waTenzi wehondo nehondo vakashora shoko reAnoera weIsiraeri.

²⁵Ndokusaka Tenzi akavirukira vanhu vake nehasha, akavasimudzira ruoko rwake rune simba akavarova, makomo akandengendeka zvitunha zvavo zvikaita semarara pakati pemigwagwa. Kunyange zvakadaro zvazvo hasha dzake hadzina kupora, muruoko rwake shamhu ichiri mudenga.

²⁶Achaninira kurudzi rwevanhu ruri kure kure chaiko, achivaridzira mheterwa vari uko pasi kwenyika chaiko, rudzi rwavanhu irworwo runobva rwakasika kuuya.

²⁷Pakati pavo hapana akaneta-neta hapana anogamhina, hapana anotsimwaira kana anokotsira kunyange mundya wakaregedzera kana ane tambo dzeshangu dzakadambuka.

²⁸Miseve yavo yakarodzwa, uta hwavo hwakakungwa, matsiko emabhiza avo akaoma sedombo romusarasara, mavhiri acho chamupupuri chaicho.

²⁹Kudzvova kwavo, shumba chaidzo vanodzvova sevana veshumba dzinohon'a dzigobata nyama yadzo dzinoiti piku kutakura kuenda pasina anogona kununura.

³⁰Dzinoihon'erana pazuva iroro sokutinhira kwegungwa. Uchiti ukatarisa kunyika uku unongoona rima chete nenhamo nechiedza chachinzi kwirindindi kudzikatidzwa nerima ravo.