Read Bhaibhiri Idzva rechiShona Isaya 50 Bible Online

Isaya 50 - Bhaibhiri Idzva rechiShona bible

Isaya 50

¹Tenzi ari kuti, “Ko tsamba yegupuro yandakapa amai venyu iripiko yandakavaramba nayo? Kana kuti ndiani wandine chikwereti naye kwandakakuendesai somuripo wechikwereti? Chinzwai, makaendeswako somuripo pamusana pouipi hwenyu kukanganisa kwenyu imi ndokwakaita kuti amai venyu varambwe.

²Seiko pandakauya ndisina kusvikowana munhu, zvandakadaidza sei pasina akadaira? Ko ruoko rwangu rwakapfupikiswa zvokuti harugone kununura here? Kana kuti simba rokununura handina here? Chinzwai, nezwi rangu ini rokutsiura, gungwa rinobva raoma, ndichiita kuti nzizi dzive gwenga zvaro, hove dzadzo dzigonhuhwa nokushaya mvura dzichifa nenyota.

³Ndinoitisa matenga kuti ati ndo-o kusviba ndichiapfekedza masaga sehanzu inopfekwa neakafirwa.”

⁴Tenzi Mwari akandipa muromo wakadzidziswa kuti ndizive kusimbaradza neshoko vakarukutika. Mangwanani oga oga anondimutsa anondimutsa kuti nzeve yangu iite seyomudzidzi.

⁵Tenzi Mwari akazarura nzeve dzangu ini handina kupanduka kana kufuratira.

⁶Ndakarega vanhu vachindirova musana ndikatendeutsira matama angu kune vaindidzura ndebvu. Handina kuvanza chiso changu pamusana penyadzi kana nokupfirwa mate.

⁷Sezvo Tenzi Mwari anondibatsira naizvozvo handimbopazama musoro, ndokusaka ini ndakaruma shaya uye ndinoziva kuti handizombonyadziswa.

⁸Anondipipirira ari padyo. Ndiani angapikisane neni? Ngatimirisanei. Ari kundipa mhosva wacho ndiani? Ngaauye pano pandiri.

⁹Chinzwa, Tenzi Mwari anondiyamura. Ndiani achanditi iwe une mhosva? Teerera unzwe, vose zvavo vachasakara sehembhe vachidyiwa notumashaveshave.[55]

¹⁰Ndiani pakati penyu anotya Tenzi iye anoteerera izwi romuranda wake, anofamba murima asina mwenje anovimba nezita yaTenzi? Achitsamira pana Mwari wake?

¹¹Chinzwai munzwe imi mose munotungidza moto imi munobatidza mazhenje, fambaika zvenyu muchiedza chomoto wenyu iwoyo nemazhenje iwayo amakatungidza. Asi shamhu yandichakupai noruoko rwangu ndeyokugara munhamo.