Read Bhaibhiri Idzva rechiShona Isaya 51 Bible Online

Isaya 51 - Bhaibhiri Idzva rechiShona bible

Isaya 51

¹“Nditeererei imi munotevera ururami, imi munotsvaka Tenzi. Tarisai kudombo kwamakakwakwanurwa nokuziware kwamakacherwa.

²Hamuone here baba wenyu Abhurahamu, naSara akakuberekai? Nokuti pandakamudaidza, akanga achingova munhu mumwechete ndikazomukomborera nokumupa vana vazhinji,

³nokuti Tenzi achanyaradza guta reZioni achinzwira tsitsi matongo aro ose achaita kuti renje raro rive seEdheni, gwenga raro richiita sebindu raTenzi. Muchafarwa imomo muchipemberwa, muchitendwa Mwari muchiimbwa.

⁴“Teererai kwandiri vanhu vangu ndinzwei imi rudzi rwavanhu vangu nokuti kwandiri ndokuchabva mutemo noruenzaniso rwangu rwunopa chiedza kumarudzi.

⁵Nguva yangu yokununura yava kutosvika izvozvi, nguva yangu yokuti ndichiponesa yatova kuuya izvozvi, marudzi evanhu achava mumaoko mangu, ndichatonga nyika dzokumakungwa dzakamirireni, vava kungotarisira kwandiri inini noruoko rwangu.

⁶Simudzai musoro mutarise nameso enyu kumatenga, mutarisewo panyika pasi pasi nokuti matenga achanyangarika soutsi, pasi pachasakara sembatya, vanhu vanogaramo vachafawo senhunzi.[56] Asi kununura kwangu kuchagara narini wose uye kukunda kwangu kuchavapo nokusingaperi.

⁷“Nditeererei munzwe imi munoziva ururami, vanhu vane mwoyo une mutemo wangu, regai kutya kushorwa navanhu musatye kunyomba kwavo.

⁸Ndinodaro nokuti vachadyiwa namabetepeswa[57] sehembe vachidyiwa nezviundudzi semvere. Asi kukunda kwangu kuchavapo nokusingaperi uye kununura kwangu kuchagara kuripo zvizvarwa zvenyu zvose.”

⁹“Simukai, simukai mukoke simba, imi Tenzi nesimba reruoko rwenyu simukai somumazuva aye epasichigare mazuva aye ekarekare. Hamusirimi here makaita Rahabhu kanyama kanyama muchibaya garanyanya riya?

¹⁰Hamusirimi here makaomesa gungwa mvura zhinji yehwenje chaiyo muchiita kuti pasi pasi pegungwa pave nenzira, kuitira kuti vakanunurwa vapfuure.[58]

¹¹Ipapo vakanunurwa naTenzi vachadzoka, vachauya kuZioni vachiimba vaine rufaro rusingaperi mumwoyo vachava nokupembera nokufara kusuwa nokuyaura zvichati ware kutiza.

¹²“Ini iyeni ndini ndinokunyaradzai, chaunotyira munhu anofa chii munhuwo zvake akaita souswa

¹³uchikanganwa Tenzi akakusika akawarira matenga akaita ugaro hwenyika uchiswerotya zvako ukasha hwomunhu anodzvanyirira, iye akaisa mwoyo mune zvokuparadza? Hwava papiko ukasha hwomunhu anobata vamwe zvakaipa wacho?

¹⁴Nyakumbonzi pasi kota kota atobva asunungurwa izvozvi. Haachapafa kana kudzika kuGomba kunyange kushaya chokudya

¹⁵nokuti ini Tenzi, ndini Mwari wako anobvundura gungwa kuti masaisai aro atinhire. NdiTenzi wehondo nehondo ndozita rake irori.

¹⁶Ndaisa mashoko angu mumuromo mako iwe ndikakuhwandisa mumumvuri weruoko rwangu, matenga ndinoadzika nyika ndichiitirawo ugaro hwayo ndiri kuti kuguta reZioni, ‘Muri vanhu vangu.’ ”

¹⁷Muka Muka, uti twii kumira iwe guta reJerusaremu iwe wakatumhiswa neshamhu yeruoko rwaTenzi mukombe wehasha dzake iwe wakanwa namasese ese kapfuko kezvakakudhadharitsa.

¹⁸Hapasisina nomumwe anotungamirira Jerusaremu pakati pevanakomana vose zvavo varakabereka; wokurisesedza noruoko hapasisina pakati pevanakomana varo vose zvavo varakarera.

¹⁹Zvinhu zviviri izvozvi izvi zvakakuwira iwe zvino ndiani achakubata maoko? Ko paumharadzi nepakuparadza kwose uku nepashangwa yenzara nepamapakatwa ehondo zvakakuwirai izvi, pakadai, ndinokunyaradza ndakaita sei?[59]

²⁰Vana vako vacharukutika vakati rakata kurara pakona yoga yoga yomugwagwa vachiita sengwarati iri mumambure Mwari ari kuvaonesa ndondo nehasha dzake, kuri kutsiudza kwaMwari wavo.

²¹Naizvozvo iwe Jerusaremu[60] teerera unzwe izvi, iwe uri kuoneswa nhamo iwe wakadai kudhakwa, nezvisiri waini.

²²Zvanzi naTenzi wako, Tenzi, Mwari wako anopipirira vanhu vake nhuna dzavo, “Chinzwa unzwe ndobvisa mumaoko mako mukombe waikudhadharitsa nekapfuko kehasha dzangu hauchazvinwazve.

²³Asi vaikuonesa ndondo ivavo ndivo vandava kupa muruoko mukombe wenhamo iyoyo, ivo vaikuti, ‘Zvambarara pasi tifambe napamusoro pako,’ iwe ukanyatsoita kuti musana wako uti kwasvarara sepasi uye somugwagwa wavanofamba nawo.”