Read Bhaibhiri Idzva rechiShona Isaya 52 Bible Online

Isaya 52 - Bhaibhiri Idzva rechiShona bible

Isaya 52

¹Muka, muka, usunge dzisimbe, iwe guta reZioni. Pfeka hanzu dzako dzakanakisisa; iyewe Jerusaremu, guta rinoera, nokuti mauri iwe hamuchazombopinda zvamo vasina kudzingiswa kana vakan'ora.

²Ibva muvhu, umuke, ugare, iwe Jerusaremu musungwa, bvisa majoti muhuro mako, iwe nhapwa, mukunda, guta reZioni.

³Ndinodaro nokuti zvanzi naTenzi, “Pamakatengeswa hapana chakaripwa, saizvozvowo kununurwa kwenyu hapana mari inobviswa,

⁴nokuti zvanzi naTenzi Mwari, pakutanga imi vanhu vangu makaenda kuIjipiti mukambondogara ikoko uyewo vechiAsiria vakazokuonesai nhamo mahara.

⁵Zvino pakadai apa, changu chaizvo chiiwo ipapa, ndizvo zviri kutaurwa naTenzi, zvichinyatsoonekwa kuti vanhu vangu vari kungotorwa zvavo mahara? Tenzi ari kuti vatongi vavo vari kugurukuta, zita rangu richisweroshorwa.

⁶Naizvozvo vanhu vangu vachaziva zita rangu. Nokudaro, zuvaro vachazivawo kuti ini ndini Iye Ari ndiri kutaura kudai, iyeni pano.”

⁷Hakusi kunaka ikoko, pamakomo, kwakaita tsoka dzaanouya neshoko rakanaka, anoparidza vanhu shoko rorugare achiunza shoko rakanaka shoko rezvakanaka, anoparidza vanhu shoko roruponeso achiti kuguta reZioni, “Mwari wenyu ndiye anotonga.”[61]

⁸Teerera unzwe zvoita vachengetedzi veguta havo vodaidzira voimba pamwechete norufaro nokuti vari kunyatsozvionera nameso kudzoka kwaTenzi kuZioni.

⁹Chitsemurai mumhanzi pamwechete, imi matongo eJerusaremu nokuti Tenzi ava kunyaradza vanhu vake ava kuzonunura Jerusaremu.

¹⁰Tenzi ava kuratidza simba roruoko rwake runoera ndudzi dzose dzavanhu dzichiona kwose zvako nekwakaperera nyika vachaona ruponeso rwaMwari wedu.

¹¹Chibudai chibudaimo muBhabhironi[62] musambobata zvenyu chinhu chakan'ora! Budai mukati maro zvichenurei imi pachenyu imi vatakuri vemidziyo yaTenzi,

¹²nokuti kubuda hamusi kuzobuda zvechimbichimbi, hamusi kuzobudamo zvekutiza nokuti Tenzi achakutungamirirai, Mwari weIsiraeri achakuperekedzai ari necheshure.

¹³“Inzwai munzwe, muranda wangu achabudirira, acharumbidzwa, achasumudzirwa pamusoro achiva wapamusorosoro.

¹⁴Sezvakaitika kuti vazhinji vakakatyamara naye asisatarisike zvakanaka, asisamboonekwa somunhu. Chimiro chake zvokuti munhu pasisina,

¹⁵Ndudzi dzakawanda dzichaomawo mate mukanwa nazvo, madzimambo chaiwo achibatawo muromo pamusana pake, nokuti zvavasati vambotaurirwa zvavo ndozvavachaona nezvavasina kumbonzwa ndizvo zvavachazonzwisisa.”