Read Bhaibhiri Idzva rechiShona Isaya 54 Bible Online

Isaya 54 - Bhaibhiri Idzva rechiShona bible

Isaya 54

¹“Imba zvako iwe usina mbereko iwe usina kumbobereka denhura rumbo upururudze iwe usina kumborwadziwa napamuviri nokuti vana vako iwe wakasiyiwa vachawanda kupfuura vana veakaroorwa ndizvo zviri kutaurwa naTenzi.[66]

²Kudza-kudza tendhe rako udhadhanure machira emaunogara okudzikatirisa usaregedze zvako rebesa tambo dzako, hoko dzako ngadzinyatsoti ndendende kusimba,

³nokuti uchatekeshera uku nouku zvizvarwa zvako zvichatonga marudzi avanhu, maguta ava matongo vachaaita misha yavo.

⁴“Rega zvako kutya nokuti hausi kuzombonyara, rega zvako kutenderedzwa musoro nazvo nokuti hausi kuzombonyadziswa pamusana pokuti zvakakunyadzisa uchiri mudiki, uchatozvikanganwa uye kushorwa kwako pamusana pouchirikadzi hausi kuzombokuyeuka;

⁵nokuti Musiki wako ndiye murume wako Tenzi wehondo nehondo ndiro zita rake iroro, uye Anoera weIsiraeri ndiye Mununuri wako iye anonzi Mwari wapasi pose.

⁶Ndinodaro nokuti Tenzi achakudaidza somudzimai akanga arambwa akashungurudzwa mwoyo somusikana akabvisa jaya mugota paanenge zvino adzingwa, ndizvo zviri kutaurwa naMwari wako.

⁷Ndakambokuti furatirei kwechinguva, asi nengoni dzangu dzakawanda kudai ndichakuunganidzai.

⁸Nokungoti virukei kwechinguva kwandakanga ndaita nehasha, ndakakupa gotsi. Asi norudo rusingaperi ndichakunzwira tsitsi. Ndizvo zviri kutaura Tenzi Mununuri wako.

⁹“Ndinodaro nokuti kwandiri ini, mazuva ano iwaya achaita semazuva aNowa andakatsidza kuti mafashamo aNowa haafaniri kuzombovazve panyika. Nokudaro ndinotsidza kuti handichazombokushatirirwazve kana kuzombokutsiudzazve.

¹⁰Ndinodaro nokuti makomo angabve zvawo paanenge ari, zvikomo zvikatozunguzika zvazvo; asi mwoyochena wangu kwauri iwe, hauzombobva uye chitenderano changu newe, chorugare, hachizombozunguziki ndizvo zviri kutaura Tenzi ane rudo newe.”

¹¹“Nhai nyakuoneswa ndondo iwe wokutututswa nedutu remhepo iwe wakashaya anokunyaradza! Chiteerera unzwe ndichagadzikira nheyo dzako pamatombo anokosha eandimoni ndichikuvakira ugaro hwako wamatombo anokosha esafaya.[67]

¹²“Zvisuvi zvako ndichazviita nematombo anokosha eageti misuo yenyu mikuru ndichiita nematombo anokosha ekabhinikuru rusvingo rwako rwese ndichiruita namatombo anokosha.

¹³Vana vako vose vachadzidziswa naTenzi, vana vako vachapfuma zviya zvokupfuma zviya.

¹⁴Kururama ndokuchava hwaro zvokudzvanyirirwa zvichava kure newe nokuti unenge usisatye. Umbwende huchava kure newe nokuti haumboswedera pedyo newe.

¹⁵Chinzwa, kudenha vanhu vachakudenha, asi zvinenge zvisingabve kwandiri. Anenge adenhana newe uchamukandisa mapfumo pasi.

¹⁶Chinzwa unzwe, kana dziri mhizha dzezvoutare izvi dzinovhutira moto wemazimbe nemvuto dzichipfura zvombo zvokurwisa nazvo zvokushandisa mabasa akasiyana-siyana, ndini ndakadzisika ndiniwo ndakasika marudzi anoparadza acho.

¹⁷Hakuna chombo chokurwisa chichagadzirirwa iwewe chichakwanisa kuita basa racho, uye uchakonesa munhu wese anenge akukwirira dare. Iyoyi iyi ndiyo nhaka yevaranda vaTenzi uye ndokuvatsigira kwandinoita.” Ndizvo zviri kutaurwa naTenzi.