Read Bhaibhiri Idzva rechiShona Isaya 55 Bible Online

Isaya 55 - Bhaibhiri Idzva rechiShona bible

Isaya 55

¹“Imi mose mune nyota uyai kumvura kunyange musina mari uyai zvenyu mutenge mudye! Uyai mutenge waini nomukaka pasina mari.

²Chamunopedzera mari chiiko muchitenga zvisiri chokudya muchifondoka kushandira zvinhu zvisingagutse chii? Nyatsonditeererai mugodya zvakanaka mugozvibaya zvenyu nokudya zvakakora.

³Tetekerai nzeve, muuye kwandiri, munzwe muzviponese. Ndichaita chitenderano changu nemi chokugara nokugara. Izvozvo uri mwoyochena wangu kuna Dhavhidhi, chaiwoiwo wechokwadi.

⁴Sezvamunongoonawo kuti ndakamuita kuti ave sechapupu kumarudzi avanhu nashe nomutungamiriri wemarudzi evanhu.

⁵Zvamuchione muchadaidza dzindudzi dzavanhu dzamusingazive, ndudzi dzavanhu vasingakuzivei dzichamhanyidzana kwamuri, achadariso ndiTenzi, Mwari wako naiye Anoera weIsiraeri nokuti ndiye akupai mbiri.”

⁶“Tsvagai Tenzi achiri kuwanika, daidzai kwaari achiri padyo.

⁷Wakaipa ngaasiye nzira yake, asina kururama asiyane netwaanofunga, adzokere kuna Tenzi kuitira kuti amunzwire tsitsi, adzokere kuna Mwari wedu nokuti anomuregerera chaizvo.

⁸Ndinodaro nokuti mafungiro angu haasiriwo mafungiro enyu, kana iwo maitiro enyu haasiriwo maitiro angu.” Ndizvo zviri kutaura Tenzi,

⁹nokuti sezvakangoita matenga kuti ari pamusoro nyika iri pasi ndizvo zvakangoitawo maitiro angu kuti ari pamusoro pamaitiro enyu uye ndangariro dzangu dziri pamusoro pendangariro dzenyu.

¹⁰“Nokuti sezvinongoita mvura nechando kunaya zvichibva mudenga zvisingambodzokerako zvisina kudiridza nyika zvichiita kuti imerese nokutumbutsa, ichipa mbeu kuna anodyara nechokudya kuna anodya,

¹¹ndizvo zvakangoitawo shoko rangu rinobva mumuromo mangu, haridzokeri kwandiri risina charinacho asi richatoita zvandinenge ndati riite richibudirira kuita zvandinenge ndarituma kuita.

¹²“Ndinodaro nokuti kubuda kwamuchaita muchabuda norufaro mugonyatsoperekedzwa murugare. Makomo nezvikomo, pamberi penyu zvichadandaura kuimba, miti yose yesango icharidza makwa.

¹³Painge pachimera minzwa pachazenge pomereswa misaipurasi painge pachimera rukato pachazenge pomereswa migwavha.[68] Izvozvi izvi kuna Tenzi zvichava sechiyeuchidzo, zvichiva mucherechedzo wokugara nokugara usingazombobviswa.”