Read Bhaibhiri Idzva rechiShona Isaya 56 Bible Online

Isaya 56 - Bhaibhiri Idzva rechiShona bible

Isaya 56

¹Zvanzi naTenzi, “Itai zvinhu noruenzaniso muite zvakarurama nokuti kukuponesai kwangu kwava kutosvika uye kukununurai kwangu kwava kutoratidzwa pachena.

²Akakomborerwa hake munhu anoita izvozvi uye nomunhu anozvibatisisa anochengeta Sabata asingarin'orese, asina twaanobata-bata.”

³Mutorwa akazvibatanidza naTenzi ngaarege kuti, “Tenzi achakaronditsaura muvanhu vake,” uye muyuniki[69] ngaarege kuti, “Pangu pano ndiri aniwo zvangu muti zvawo wakaoma.”

⁴Ndinodaro nokuti zvanzi naTenzi, “Vayuniki vanochengeta maSabata angu vachisarudza kuita zvandinoda vachichengetedza chitenderano changu,

⁵ndichaita kuti pave nechimwe chinovakwa chokuyeuka nacho zita ravo mukati memba yangu nomukati metsvingo dzangu chinokunda kuva navana vakomana kana vasikana, Ndichavapa zita risina mugumo risingatsakatiki.”

⁶Vatorwa vose vanozvibatanidza neni Tenzi nokundishandira vachida zita reni vachiva varanda vangu, vose zvavo vanochengeta masabata vasingaan'oresi vachichengetedza chitenderano changu,

⁷ivava ndichavaunza kugomo rangu rinoera ndigovaita kuti vafare muimba yangu yokunamatira. Mipiro yavo inopiswa nezvibayiro ndichazvigamuchira paatari yangu nokuti imba yangu ichanzi imba yokunamatira yamarudzi ose avanhu

⁸Naizvozvo zvanzi naTenzi, Mwari “Iye anounganidza vaIsiraeri vakadzingwa ini ndichaunganidza kwavari vamwewo vanhu vandinenge ndisina kuunganidza.”

⁹“Imi zvikara zvesango uyai mudye, uyai zvenyu imi zvikara zvomudondo.

¹⁰Vatariri vake mapofu, zvokuziva havazivi zvimumumu chaizvo zvembwa. Havagoni kuhukura vanotorotomoka zvavo, chavo kurara chete vachinakirwa nehope.

¹¹“Imbwa idzi dzina makaro, hadzimboguti, ndivava vafudzi vacho vasinganzwisisi, vose vachiti uyu nenzira yake, uyu nenzira yake mumwe nomumwe achizvitsvagira upfumi, vose zvavo.

¹²Vanototaurirana zvavo vachiti, ‘Handei tinotsvaka waini, handei tinodutira hwahwa, mangwana nyaya ndiyo ndiyo, zvinenge zvisingambotauriki kuwanda.’ ”