Read Bhaibhiri Idzva rechiShona Isaya 57 Bible Online

Isaya 57 - Bhaibhiri Idzva rechiShona bible

Isaya 57

¹Mururami anoparara zvake pasina anombozviitirawo hanya, vanamati chaivo vachitorwa pasina anozvinzwisisa, nokuti vakarurama anobviswa munhamo,

²opinda murugare, vazorora zvavo pamibhedha yavo, ivo vanofamba muururami.

³Asi imi swederai kuno vana vana amai varoyi, vana vemhombwe nepfambi.

⁴Ndiani wamuri kuita zvokutamba naye kudai? Muri kugarira kutaura nani, muchitoraputsa rurimi kudaro, Hamusi vana vomusango here? Imi vana vounyengedzi,

⁵iyemi munobayiwa noruchiva muri mukati memioku pasi pemiti yose yakasvibira, imi munoita vana venyu zvibayiro mumapani mumikaha yamatombo?

⁶Chenyu imimi ihurungudo dzomubani. Ndidzo dzamunonamata. Kwandiri idzodzo ndidzo dzamunopira mupiro wokuteura muchiunzako mupiro wembesanwa. Ndozvingandinyevenutse mwoyo here izvozvo?

⁷Pagomo refu, panhungamakore yegomo, ndipo pamava kuita sapauriri hwenyu hwoupombwe. Ipapo ndopamunokwira kundopira zvibayiro.

⁸Kuseri kwegonhi napagwatidziro wakazviisira chokuratidza nacho kuti undifuratire. Wakafugura uriri hwako ukakwira pahuri ukahukudza-kudza ukatozvitengesa zvako kwazviri ukatorwa mwoyo nouriri hwavo, ukatozviyeva zvako zviri mutwi kudaro.[70]

⁹Munoenda imi kundonamata Moreki muina mafuta, muchivirikidza kuzora mafuta anonhuwirira; munotuma nhume dzenyu kure zvokuti vanotodzika kwazvo kunyange nokuNzvimbo yeVachakabvu.

¹⁰Wakareberwa nenzira iwe zvikakunetesa asi hauna kumbozviti, “Hazvina maturo.” Wakatozvigwinyisa nokudaro hauna kufizuka.

¹¹“Kunyeba kwawakaita wawaitya ipapa ndiani uchitadza kundiyeuka kana kutombondifunga zvako? Handina kunyarara zvangu here kwenguva ndefu chaiyo, ndokusaka usisandityi nhai?

¹²Ndichafumura ururami hwako ihwohwo nezvaunoita iwe asi hazvina zvazvichakuyamura.

¹³Kana woridza mhere iro zanzwe rako rezvifananidzo zvokunamata ngarikununure. Zvichatututswa nemhepo, zvichapupurutswa nemwando. Asi anopotera kwandiri ndiye achava muridzi wenyika, gomo rangu rinoera iri achiriita nhaka yake.”

¹⁴Zvichazonzi, “Pangurai pangurai, mugadzire nzira mubvise zvose zvingapingaidze vanhu vangu munzira,”

¹⁵nokuti zvanzi naNyadenga iye Wokumusorosoro iye Chidzachepo ane zita rokuti Anoera, “Ndinogara kumusoro munzvimbo inoera, uye ndinogarawo navane mwoyo wakapinduka vano mwoyo wokuzvirereka kutimutsurudza mwoyo wavanozvidukupisa nokumutsurudza mwoyo yavanhu vanenge vatendeuka.

¹⁶Ndinodaro nokuti handicharamba ndichingovapa mhosva kana kuramba ndakangovashatirirwa, nokuti kwandiri ini ndokunobva mweya, ndini ndakasika mweya wacho unofema.

¹⁷Pamusana pemhosva yoruchiva rwake uyu ndakashatirwa, ndikamurova ndikafuratira ndakashatirwa. Asi iye ndopaakatoomesa gotsi achiita zvake zvomusoro wake.

¹⁸Ndakaona hangu kuita kwake asi ndichamuporesa ndichamutungamirira ndigomupa mubayiro wokugarika ndichiita kuti pamiromo yavanoungudza pabude mipururu yokurumbidza

¹⁹Zvanzi naTenzi, ‘Imi vokure nemi vapadyo, ndinokupai rugare, rugare chairwo, ndichakuporesai.’

²⁰Asi vakaipa vakaita samasaisai egungwa asingagarikike pasi; mvura yaro haigadzikani inobvundura nhope netsvina,

²¹vakaipa havana rugare,” ndizvo zviri kutaurwa naMwari wangu.