Read Bhaibhiri Idzva rechiShona Isaya 62 Bible Online

Isaya 62 - Bhaibhiri Idzva rechiShona bible

Isaya 62

¹Pamusana peZioni, handimbonyarara kutaura. Pamusana peguta reJerusaremu handimbozorora kusvikira kupembedzwa kwaro kwajeka sechiedza, ruponeso rwaro rwanyatsovhenekera semwenje.

²Marudzi avanhu achaona kupembedzwa kwako, madzimambo ose achaonawo mbiri yako. Iwe uchadaidzwa nezita idzva rauchatumidzwa naTenzi nomuromo wake.

³Uchave ndaza yakanakisisa muruoko rwaTenzi, nenyembe youmambo chaiyo muruoko rwaMwari wako.

⁴Iwe hauchazonzi, “Murambwi,”[76] nyika yako haichazonzi, “Dongo.” Asi uchatonzi, “Wangu wapamwoyo,”[77] nyika yako ichinzi, “Muroora,” nokuti Tenzi anofadzwa newe, nyika yenyu icharoorwa

⁵sezvinongoita mukomana anoroora mhandara, iye akakuvaka[78] wacho achakuroora uye sokufarira kunoita mukomana mukadzi waaroora ndokukufarirai kuchaita Mwari wenyu.

⁶Pasvingo ako iwe Jerusaremu ndaisa vatariri, havambonyarara siku nesikati. Imi munoyeuka Tenzi kudai musazorore,

⁷musambomupa zvenyu zororo, kudzamara aita kuti guta reJerusaremu rimire ariita kuti rive nomukurumbira pasi pano.

⁸Tenzi apika norudyi rwake apika nesimba roruoko rwake kuti, “Handichambofa ndakapazve mbesanwa dzenyu kuti dzive chokudya chavavengi venyu uye vatorwa havasi kuzombonwazve waini yenyu yamakadikitira kushanda.

⁹Asi kutoti vanenge vaisa mbesanwa mumatura ndivo vachadzidya vachirumbidza Tenzi, vanenge vatanha magirepisi ndivo vachanwa waini yacho vari munhandare dzeNzvimbo yangu Inoera.”

¹⁰Pindai pindai nomumisuo mikuru gadzirirai vanhu mugwagwa, gadzirai gadzirai mugwagwa mukuru mubvisei mabwe musimudze mureza pamusoro pendudzi dzavanhu.

¹¹Teererai munzwe, Tenzi ari kuzivisa vanhu kusvikira kwakaperera nyika. Itii kuguta reZioni, “Tarisai muone, ruponeso rwenyu rwava kusvika. Tarisai muone, mubayiro wake anawo, muripo wake ndiwo waanotungamidza.”

¹²Vachanzi vanhu, “Vanoera vaNyakununurwa vaTenzi” iwe uchinzi, “Wapamwoyo pavanhu guta risina kutizwa.”