Read Bhaibhiri Idzva rechiShona Isaya 63 Bible Online

Isaya 63 - Bhaibhiri Idzva rechiShona bible

Isaya 63

¹“Ndianiko uyo ari kuuya achibva Edhomu, akapfeka hanzu tsvuku dzeBhozira, akapfeka hanzu dzake dzemandiriri ari kukanyaira achigwanha kwazvo zvine simba pamusana poukuru hwake? Ndini iyeni! Ndiri kuzivisa vanhu zvokukurira kwangu, ini Changamire wokuponesa.

²“Ko idzo hanzu dzako kutsvuka kudai chii? Sei mbatya dzako kubva dzaita somunhu anga achisvina waini kudai muchisviniro?

³Ndasvina ndoga waini muchisviniro, pasina mumwe wavanhu aiva neni. Ndakavatsika-tsika ini nehasha ndichivatsokodzera ndakashatirwa; ropa ravo rinovararamisa rakadeukira pahanzu dzangu, ndokusaka mbatya dzangu dzose dzatsvuka ropa kudai.

⁴Ndinodaro nokuti zuva rokutsividza, ndakanga ndinaro mumwoyo uye gore rangu rokununura rasvika.[79]

⁵Ndakatarisa wanei wokundibatsira hapana zvakandishamisa kuti pakanga pasina wokunditsigira, saka kukurira kwandakaita isimba roruoko rwangu ndichitsigirwa ini nehasha dzangu.

⁶Nehasha dzangu ndakatsokodzera vanhu, ndudzi dzavanhu dzikaita sedzadhakwa ndikadeurira pasi ropa ravo rinovararamisa.”

⁷Ndichadetemba kurumbidza mwoyochena waTenzi, mukurumbira waTenzi nokuona zvose zvatawaniswa naTenzi nezvose zvakanakisisa kwazvo zvaakaitira vemba yaIsiraeri zvaakadai kuvapa netsitsi dzake nomwoyochena wake wakanyanya kukura kudai,

⁸nokuti anoti, “Vanhu vangu ava, vana vasina zvounyengedzi,” nezvo akava Mununuri wavo.

⁹Nhamo yavo yose yavakaona yaivawo nhamo yake, uye mutumwa wokuvapo kwake ndiye akavaponesa, akavanunura norudo rwake uye netsiye dzake nyoro, akavasimudza akavatakura mumazuva ose akare.

¹⁰Asi ivo vakapanduka vakashungurudza Mweya Mutsvene wake, ndokusaka iye akavapindukira oita somuvengi wavo, iye pachake ovarwisa.

¹¹Ndipo paakarangarira mazuva akare aye, mazuva omuranda wake Mosesi. Aripiko chaizvo nyakunyurura mugungwa, mufudzi[80] wedanga rezvipfuwo zvake? Aripiko akaisa Mweya Mutsvene wake mukati mavo,

¹²akaita kuti simba reruoko rwake rivewo kurudyi rwaMosesi akaparadzanisa mvura pamberi pavo achiitira kuti azviwanire zita rinogara nokusingaperi?

¹³Iye akavatungamirira nomuhwenje. Vakafamba vasingadzengedzeke sezvinoita bhiza risingadzengedzeke murenje.

¹⁴Sokutungamirirwa kunoitwa zvipfuwo kubani, Mweya waTenzi wakavapa zororo, saizvozvo makatungamirira vanhu venyu mukazviwanira zita rine mukurumbira.

¹⁵Tarisai pasi muone muri kudenga ikoko, muri munzvimbo menyu mamunogara munoera mune mbiri. Shungu dzenyu nesimba zviripi? Ko inga rudo rwenyu netsitsi dzenyu, kwandiri hapasisina.

¹⁶Inga ndimi baba wedu wani kunyange Abhurahamu asingatizivi uye kunyange zvazvo Isiraeri, asingatitore sevana vake, imi Tenzi ndimi Baba vedu, Mununuri wedu, kubvira kare nakare, iroro ndiro zita renyu.

¹⁷Nhai Tenzi munoitirei kuti titsauke panzira dzenyu tiomese mwoyo zvokutotadza kukutyai? Dzokai zvenyu pamusana pevaranda venyu vemadzinza enhaka yenyu.

¹⁸Kwekanguva kadiki Nzvimbo yenyu iyi Inoera yanga iri mumaoko mevanhu venyu, vavengi vedu vakatoitsokodzera zvavo pasi.

¹⁹Isu tangoitawo sevanhu vamusina kana kumbotonga zvenyu savanhu vasingadaidzwe nezita renyu.