Read Bhaibhiri Idzva rechiShona Isaya 65 Bible Online

Isaya 65 - Bhaibhiri Idzva rechiShona bible

Isaya 65

¹“Ndakanga ndakatomirira kuti nditsvakwe navanhu vasina kundibvunza. Ndakanga ndakamirira ini kuti vanhu vandiwane asi pakanga pasina. Ini ndaiti, ‘Ndiri pano, ndiri pano,’ kurudzi rusingambodaidza zvarwo zita rangu,

²ndichiswerotambanudzira maoko kumhandupandu dzavanhu, vanofamba nenzira isina kunaka vachiita zvavo zvomusoro wavo.

³Vanhu vanoramba vachindidenha ndiripo kudai, vachipira zvibayiro mumapindu vachipisira rusenzi pazvidhina.

⁴Vanhu vanogara kumakuva vachirara vari munzvimbo dzakavandika vachidya nyama yenguruve, nomuto wezvinhu zvakan'ora zviri mumidziyo yavo.

⁵Vanhu vanotozviti zvavo, ‘Mirira kure uko usaswedere pedyo neni nokuti kwauri ndinoera.’ Ivava kwandiri utsi zvahwo hunondipfungaidza mumhuno, zvichindipa mazaridzwa kunge moto unopfuta muswere wose.

⁶“Chinzwai munzwe chiga[81] chemhosva yavo chakanyorwa ndinacho. Zvokunyarara, handinyarari, asi ndichavaranga. Honguka, ndichavaripisa kudzamara pachipfuva chaipo, pavanochengetera mari[82] yavo.

⁷Ndichavaripisa uipi hwavo nouipi hwamadzibaba avo pamwechete,” ndizvo zviri kutaura Tenzi, achiti, “Ndinodaro nokuti vaindopisa rusenzi pamakomo vachindishonha pazvikomo. Ndichaona zvangu mwero wandichavatorera pachipfuwa pavo pavanochengetera mari ndichivaripisa zvavakaita kare.”

⁸Zvanzi naTenzi, “Sezvinongoitawo waini kuti inowanikwa muchitsumbu chamagirepisi, vanhu vachiti regai kuchiparadza nokuti machiri mune chikomborero izvozvi, ndozvineni, pamusana pavaranda vangu handisi kuzovaparadza vose.

⁹Ini ndichaunza zvizvarwa zvokwaJakobho, vari vedzinza rokwaJudha kuti vatore makomo angu ave avo, vasarudzwi vangu vagare nhaka nyika yavo ivava varanda vangu ndivo vachagara zvavo imomo.

¹⁰KuSharoni uku kuchava mafuro ezvipfuwo, nebani reAkori richava mafuro emombe, pamusana pevanhu vangu vanenge vachinditsvaga.

¹¹“Asi imimi makafuratira Tenzi, imi makakanganwa gomo rangu rinoera, imi munotonamata zvenyu Gadhi, imi munozadza makapu emasanganiswa ewaini okuteura kuna Meni,

¹²chenyu imi chandakutemerai kufa muchiurayiwa namapakatwa, mose mucharakatiswa kufa, nokuti ndakakudaidzaika ini asi hamuna kudaira. Pandaitaura, hamunaka kuteerera. Zvandinoti zvakaipa ndozvacho zvamakatoita, muchisarudza zvenyu kuita zvinhu zvandisingadi.”

¹³Naizvozvo zvanzi naTenzi Mwari, “Varanda vangu vachadya asi imi muchifa nenzara. Mazvinzwa! Varanda vangu vachanwa asi imi muchifa nenyota. Mazvinzwaka! Varanda vangu vachapembera nokufara, asi imi muchanyadziswa.

¹⁴Chinzwai munzwe, kuvaranda vangu achava makuwerere kuimba nokufara, asi kwamuri imi ichava misodzi chete kuchema muchirwadziwa mwoyo muchihwihwidza kuchema muchishungurudzwa mwoyo.

¹⁵Zita renyu imi richasara pakati pevasarudzwi vangu rava chokutukisa nacho vanhu. Tenzi Mwari achakuurayai asi varanda vake achavadaidza nerimwewo zita.

¹⁶Zvinenge zvava panyika ndezvokuti, munhu anenge ava kuda chikomborero, achakumbira kukomborerwa naMwari wechokwadi, neanenge oda kupika mhiko pasi pano achazopika naMwari wechokwadi. Ndinodaro nokuti nhamo dziye dzakare dzichange dzakanganwika dzisisimo mumaziso angu.”

¹⁷“Chionai kuti ndava kusika denga idzva nenyika itsva. Zvinhu zvakare zviya hazvichazoyeukwa kana kuuya hazvo mumusoro.

¹⁸Asi farai zvenyu mufare kwazvo nokusingaperi muchifarira zvandava kusika nokuti tarisai muone ndava kusika Jerusaremu rorufaro nevanhu varowo vari vanhu vakafara chaizvo.

¹⁹Ini ndichafarira Jerusaremu vanhu vangu ndichivafarira. Mariri hamuzonzwika izwi rokuchema kana kuridza mhere.

²⁰Hamuna mucheche mariri achararama mazuva mashomanana, kana munhu achembera anodimurirwa panzira mazuva oupenyu hwake. Chinenge chotovepo ndechokuti mwana anotozofa asvitsa zana ramakore. Kunyange mutadzi kufa aine zana remakore runenge ruchitova rushambwa.

²¹Vanhu vachavaka dzimba vakatodzigara, vachisima minda yamagirepisi vachitozodyawo michero yayo.

²²Havazomboti ivo vakavaka, mumwewo zvake ndiye ozogaramo, hazvisiri kuzombosima mumwe achizodya, nokuti vanhu vangu vachararama samakore anogara hunde yomuti. Vasarudzwi vangu ava vachasaraka chaizvo vachingofarira basa ravanoita ivo namaoko avo.

²³Havasi kuzomboshandira pasina kana kuberekera vana vavo nhamo nokuti ivo nevana vavo vanenge vari vana vaTenzi, nyakurumbidzwa.

²⁴Vasati vatombonamata ini ndinenge ndatopindura kare munamato wavo, ivo vachiri kutaura, ini ndinenge ndatozvinzwa.

²⁵Mhumhi nehwayana zvichafura pamwechete, shumba inenge yofura sora semombe, nyoka ichange yodya guruva. Zvinenge zvisisakuvadze kana kuparadza mugomo rangu rose zvaro rinoera,” ndizvo zviri kutaura Tenzi.