Read Bhaibhiri Idzva rechiShona Mupiro 1 Bible Online

Mupiro 1 - Bhaibhiri Idzva rechiShona bible

Mupiro 1

¹Tenzi akadaidza Mosesi mutendhe rokusanganira akataura kwaari achiti,

²“Taurira vaIsiraeri kuti, ‘Kana munhu achida kuunza mupiro kuna Tenzi, ngaaunze chibayiro chake chezvipfuwo, chingave mombe kana hwai kana mbudzi.’

³“Kana mupiro wake wokupisa iri mombe, ngaaunze yomukono, isina chinoshoreka pairi. Ngaauye nayo kumusuwo wetendhe rinoera kuti Tenzi amugamuchire.

⁴Munhu iyeyo ngaaise ruoko rwake pamusoro wechibayiro chokupisa ichocho. Chibayiro ichocho chichatora nzvimbo yake kuti chipfupire zvitadzo zvake.

⁵Munhu iyeyo ngaaurayire handira yake pamberi paTenzi. Vapristi vemhuri yokwaAroni ngavapire ropa rayo kuna Tenzi, vachirisasa pamativi mana eatari yokumusuwo wetendhe rokusanganira.

⁶Muridzi wemupiro wokupisa iwoyo ngaaivhiye, aiteme-teme.

⁷Vana vaAroni mupristi, vachaisa moto paatari varonge huni pamoto iwoyo.

⁸Vana vaAroni vapristi ngavaronge nyama iya yatemwa-temwa zvose nomusoro wayo, namafuta ayo pamusoro pehuni dziri kubvira paatari.

⁹Muridzi wayo ngaaisuke nemvura, zvomukati zvayo nemazondo ayo. Muprisiti ngaapisire zvose izvozvo paatari, somupiro wokupisa, mupiro unoitwa zvokupisa nomoto, unonhuhwirira zvinofadza Tenzi.

¹⁰“Kana chipo chake chemupiro wokupisa chiri hwai kana kuti mbudzi, ngaive hono isina chinoshoreka pairi.

¹¹Ngaaiurayire kuchamhembe kweatari, pana Tenzi. Vapristi vemhuri yokwaAroni ngavasase ropa rayo pamativi mana ose eatari.

¹²Munhu iyeyo ngaaiteme-teme nomusoro wayo namafuta ayo, mupristi ngaaironge paatari, ayo pamusoro pehuni dziri kubvira moto paatari.

¹³Muridzi wayo ngaasuke nemvura zvomukati zvayo nemazondo ayo. Mupristi ngaapisire zvose izvozvo somupiro wokupisa, mupiro unoitwa zvokupisa nomoto, unonhuhwirira zvinofadza Tenzi.

¹⁴“Kana munhu achida kupira kuna Tenzi somupiro wake wokupisa weshiri ngaaunze chipo chenjiva kana kuti hangaiwa duku.

¹⁵Mupristi ngaaiunze paatari, aimonye mutsipa, idimuke musoro, aipise paatari. Ropa rayo ngariregwe richibuda richiyerera, richidzika neparutivi rweatari.

¹⁶Ngaabvise chihururu neminhenga yayo azvirasire panorasirwa dota kumabvazuva kweatari.

¹⁷Ngaabate mapapiro ayo aitsemure nepakati, asi ngaarege kuikwachura. Mupristi iyeyo ngaaipisire paatari, pahuni dziri kubvira moto paatari, somupiro wokupisa, unoitwa zvokupisa, unonhuhwirira zvinofadza Tenzi.”