Read Bhaibhiri Idzva rechiShona Mupiro 11 Bible Online

Mupiro 11 - Bhaibhiri Idzva rechiShona bible

Mupiro 11

¹Tenzi akataurira Mosesi naAroni achiti kwavari,

²“Taurirai vaIsiraeri kuti, ‘Idzi ndidzo mhuka dzamungadye zvenyu pamhuka dzose dziri panyika.’

³Mungadye zvenyu mhuka ine tsimba rakanyatsopararana, dzinenge dziri mhuka dzinozeya.

⁴Asi dzinongozeya chete kana dzinongova netsimba rakapararana chete musadzidye sengamera inozeya asi haina matsimba akapararana.

⁵Musadye nembirawo kunyange zvayo ichizeya haina tsimba rakapararana, yakan'ora kwamuri,

⁶netsuro, kunyange zvayo ichizeya haina tsimba rakapararana, yakan'ora kwamuri,

⁷nenguruve kunyange zvayo iine tsimba rakanyatsopararana haizeye, yakan'ora kwamuri.

⁸Musadye mhuka idzodzi kana kubata zvitunha zvadzo nokuti dzakan'ora kwamuri.

⁹“Pana zvose zvomumvura zvine zvimbi namakwande zvingave zvomugungwa kana murwizi mungadye zvenyu.

¹⁰Asi zvose zvisina zvimbi namakwande zvomugungwa nomurwizi zvose zvazvo zvinoita bvakanyira mumvura nezvipenyu zvose zviri mumvura musadye zvose izvozvo, zvakaipa kwazvo kwamuri.

¹¹Kwamuri, zvakaipa kwazvo, musadye nyama yazvo kana kubata zvako zvitunha zvazvo.

¹²Zvose zvomumvura zvisina zvimbi namakwande zvakaipa kwazvo kwamuri.

¹³“Pashiri dzose, idzi ndidzo shiri dzakan'ora kwamuri, hadzifanire kudyiwa, dzakaipa kwazvo kwamuri, kunoti: gondo negora nechapungu

¹⁴nenjerere nakarukodzi nemhando dzako

¹⁵nemhando dzose dzemakunguo,

¹⁶jichidza, nemazizi neshiri yegungwa namarudzi ose oruvangu,

¹⁷kouya zizi nekondo, nejambwa

¹⁸nenhapata nesvorenyama nehungwe,

¹⁹neshuramurove nemhando dzose dzeshirichena nemhupupu nomuremwaremwa.

²⁰Tupukanana twose tunobhururuka, tunogara turi gurusvusvu tuine makumbo mana twakan'ora kwamuri.

²¹Asi tunhu twose tunobhururuka tuine makumbo mana tune mamwe makumbo eshure okusvetukisa idyai zvenyu.

²²Mungadye zvenyu mhando dzose dzehwiza, nemhando dzose dzemhashumapfunde nedzemakurwe nedzezvitaunhau.

²³Asi tumwewo tupukanana twose tunenge tuchingova namakumbo mana chete twakan'ora kwamuri.

²⁴“Zvinhu zvinon'oresa munhu ndeizvi: munhu anenge agunzva zvitunha zvazvo achava munhu akan'ora kusvikira zuva ridoke.

²⁵Ani naani zvake anenge atakura kai zvako kechitunha chazvo ngaasuke hanzu dzake; achava munhu akan'ora kusvikira zuva ridoke.

²⁶Mhuka yose zvayo inenge iine tsimba rakapararana asi asina kubva anyatsopararana kana kuti isingazeyi yakan'ora kwamuri. Asi ani naani anobata chitunha chayo achava munhu akan'ora.

²⁷Mhuka dzose dzina makumbo mana, dzina matsimba akapfava dzakan'ora kwamuri. Munhu anenge abata zvitunha zvadzo, achava munhu akan'ora kusvikira zuva ridoke.

²⁸Ani naani anotakura chitunha chadzo, anofanira kusuka hanzu dzake, achava munhu akan'ora kusvikira zuva ridoke. Izvozvo zvakan'ora kwamuri.

²⁹“Utwu nditwo tupuka twakan'ora kwamuri pakati petupuka twose tunoita bvakanyira panyika, kunoti nhuta nembeva nomupurwa nemarudzi awo ose nechipotanemadziro,

³⁰gwavava, nedzvinyu, chipfira nerwaivhi.

³¹Izvozvi zvakan'ora kwamuri pakati pezvose zvinoita bvakanyira. Ani zvake anenge abata zvitunha zvazvo, achava akan'ora kudzamara zuva ridoke.

³²Kana chitunha chazvo chikaputsikira pane chinhu chipi nechipi zvacho, chinhu ichocho chaton'ora chingave chakaitwa mudziyo upi noupi wokuitisa basa. Ngachinyikwe mumvura, chichava chakan'ora kudzamara manheru chazova chachenurwa.

³³Mumudziyo wevhu upi noupi zvawo machinenge chadonhera, zvose zvinenge zvirimo zvaton'ora, putsai mudziyo iwoyo.

³⁴Zvokudya zvinenge zvadirwa mvura yabva mumudziyo iwoyo zvaton'ora chero chokunwa chinenge chirimo chaton'orawo.

³⁵Chinhu chipi nechipi zvacho chinenge chinowirwa nekai zvako kechitunha chazvo chaton'ora, kunyange ikava hari kana choto ngachiputswe-putswe, chan'ora, ngachive chinhu chakan'ora kwamuri.

³⁶Asi chitubu kana tsime rine mvura harin'ore, asi chipi nechipi zvacho chinobatana nechitunha chacho chichava chinhu chakan'ora.

³⁷Kana kai zvako kechitunha chazvo kakadonhera pambeu dzokudyara dzipi nedzipi zvadzo dzinodyarwa hadzin'ore.

³⁸Asi kana kai zvako kechitunha chazvo kakadonhera pambeu dzakaiswa mvura dzichava dzakan'ora.

³⁹“Kana mhuka inodyiwa ikafa, ani naani anoibata chitunha chayo, achava munhu akan'ora kusvikira zuva ridoke,

⁴⁰Munhu anodya nyama yayo, ngaasuke hanzu dzake, achava munhu akan'ora kusvikira zuva ridoke. Munhu anotakura chitunha chayo ngaasuke hanzu dzake, achava munhu akan'ora kusvikira zuva ridoke,

⁴¹tupuka twose tunomomana panyika twakaipa kwazvo, ngaturege kudyiwa.

⁴²Zvose zvinozvova napasi, nezvose zvinofamba namakumbo mana kana zvina makumbo akawanda, zvose zvazvo zvinomomana panyika, musadye nokuti zvakaipa kwazvo.

⁴³Musazviipise nezvinhu zvakawanda-wanda izvi zvinomomana. Musazvisvibise nazvo nokuti mungadaro mukazvin'oresa.

⁴⁴Ndinodaro nokuti ini Tenzi, ndini Mwari wenyu zvisarudzei kuva vangu, muve vatsvene nokuti ini ndiri mutsvene. Musazvin'orese nezvipi nezvipi zvazvo zvakawanda-wanda zvinomomana panyika.

⁴⁵Ndinodaro nokuti ndini Tenzi ndakakuuyisai kuno, kubva kunyika yeIjipiti, kuti ndive Mwari wenyu. Saka ivai vatsvene nokuti ini ndiri mutsvene.

⁴⁶“Iwoyu ndiwo mutemo wezvemhuka neshiri nezvose zvipenyu zvinofamba mumvura nezvose zvinoita gurusvusvu panyika,

⁴⁷wokuti mugone kusiyanisa nawo zvakan'ora nezvisina kun'ora nokusiyanisawo zvinhu zvipenyu zvingadyiwe nezvinhu zvipenyu zvisingadyiwi.”