Read Bhaibhiri Idzva rechiShona Mupiro 14 Bible Online

Mupiro 14 - Bhaibhiri Idzva rechiShona bible

Mupiro 14

²“Uyu ndiwo murao wemunhu ane chirwere chamapere pazuva raanochenurwa, ngaaunzwe kumupristi.

³Mupristi ngaaende naye kunze kwematendhe amuongorore kana chirwere chamapere chiya chapora,

⁴mupristi ngaati paunzwe shiri mbiri dzisina kun'ora nechimuti chomusidhari netambo tsvuku nekabazi komuhisopi.

⁵Mupristi ngaati shiri imwe iurayirwe nechapamusoro pehari yevhu ine mvura yakanaka yakachena.

⁶Ngaatore shiri mhenyu pamwechete nechimuti chomusidhari netambo tsvuku nekabazi komuhisopi azvinyike pamwechete muropa reshiri iya yaurayirwa pamusoro pehari yevhu ine mvura yakanaka yakachena.

⁷Mupristi ngaasase ropa iroro kanomwe pamunhu uya anenge achenurwa pachirwere chamapere. Mupristi ngaataure pachena kuti haachisina kun'ora. Ipapo ngaabhururutse shiri mhenyu iya itetereke zvayo nesango.

⁸Nyakuchenurwa iyeyo ngaasuke hanzu dzake aveure vhudzi nemvere dzomuviri wose ashambe nemvura. Saka achava munhu akachenurwa. Angachizodzokera hake kumatendhe asi anofanira kugara kunze kwetendhe rake kwamazuva manomwe.

⁹Pazuva rechinomwe ngaaveurezve musoro wake nendebvu netsiye nevhudzi rose romuviri wake. Ngaasuke hanzu dzake nomuviri wake, ipapo achava munhu achenurwa.

¹⁰“Pazuva rorusere ngaaunze hwayana, hono mbiri nedunzvi rehwai dzisina chinoshoreka padziri dzine gore rimwechete namakirogiramu matatu eupfu hwakanywa namafuta eorivhi uye mafuta eorivhi anokwana chikamu chepakati nepakati cherita.

¹¹Mupristi iyeyo ari kuchenura munhu ngaaise munhu iyeyo nezvinhu izvi pana Tenzi pamusuo wetendhe rokusanganira.

¹²Mupristi ngaatore hwayana hono pamwechete namafuta anokwana chikamu chepakati nepakati cherita apire Mwari mupiro wokutsiva chakatadzwa. Ngaaite mupiro unosumudzwa uchipirwa Mwari.

¹³Ngaaurayire hwayana iyoyo panzvimbo paya panourayirwa zvibayiro zvomupiro wokupfupira zvitadzo nomupiro wokupisa panzvimbo inoera. Chibayiro chomupiro wokupfupira zvitadzo ndechomupristi sezvakangoitawo chibayiro chomupiro wokuripa mhosva. Chinoera kwazvo.

¹⁴Mupristi ngaatore ropa rehwayana yomupiro wokuripa mhosva arizore kwokupedzesera kwenzeve yokurudyi yomunhu ari kuchenurwa nepachara chechanza chake chokurudyi nepachigunwe chake chikuru chetsoka yake yokurudyi.

¹⁵Mupristi ngaadururire mafuta eorivhi muchanza chake iye pachake choruboshwe.

¹⁶Ngaanyike munwe wake wokurudyi mumafuta iwayo ari muchanza chake choruboshwe, aasase kanomwe mutendhe rinoera pana Tenzi.

¹⁷Mafuta anenge asara ari muchanza chomupristi ngaazore kuwedzera paropa romupiro wokuripa mhosva kwokupedzesera kwenzeve yokurudyi yomunhu ari kuchenurwa nepachigunwe chake chokurudyi.

¹⁸Mafuta ose anenge asara ari muchanza chake ngaadire pamusoro pemunhu ari kuchenurwa. Mupristi anobva apfupira zvitadzo zvaiyeyo pana Tenzi, zvomunhu akanga aine chirwere chamapere.

¹⁹“Mupristi ngaaite mupiro wokupfupira zvitadzo, achiripira munhu ari kuchenurwa pakun'ora kwake. Kana aita izvozvo, ngaauraye chibayiro chemupiro wokupisa.

²⁰Mupristi ngaapire mupiro wokupisa nomupiro wembesanwa paatari. Nokudaro mupristi achamuripira, munhu iyeyo anobva achenurwa.

²¹“Kana munhu iyeyo ari murombo asingakwanisi kuwana izvi zvose ngaaunze hwayana hono imwechete yomupiro wake wokuripa mhosva unosimudzirwa uchipirwa Mwari wokumuripira. Ngaaunzewo upfu hwemupiro wembesanwa hunorema kirogiramu rimwechete hwakakanywa nemafuta eorivhi pamwechete nechikamu chepakati nepakati cherita remafuta eorivhi.

²²Ngaaunzewo njiva mbiri kana man'ana maviri ehangaiwa dzaangakwanise kuwana yomupiro wokupfupira zvitadzo neyomupiro wokupisa.

²³Pazuva rorusere ngaauye nadzo kumupristi kuti ichenurwe kumusuo wetendhe rokusanganira.

²⁴Mupristi ngaatore hwayana yomupiro wokuripa mhosva nechikamu chepakati nepakati perita ramafuta eorivhi aite mupiro unosimudzirwa uchipirwa Tenzi.

²⁵Ngaauraye hwayana yomupiro wokuripa mhosva, atore ropa rayo arizore kwokupedzesera kwenzeve yokurudyi yomunhu ari kuchenurwa nepachara chake chokurudyi napachigunwe chake chikuru chokurudyi.

²⁶Mupristi ngaadururire mafuta muchanza chake iye pachake chokuruboshwe,

²⁷Mupristi ngaanyike munwe wake worudyi mumafuta ari muchanza chake choruboshwe aasase kanomwe pana Mwari ipapo mutendhe rinoera.

²⁸Mupristi ngaazorewo mafuta paya paazora ropa, romupiro wokuripa mhosva kwokupedzesera kwenzeve yomunhu ari kuchenurwa yokurudyi nepachara chake chokurudyi napachigunwe chake chikuru chokurudyi.

²⁹Mafuta ose anenge asara muchanza chomupristi ngaadire pamusoro womunhu ari kuchenurwa achimuripira pana Tenzi.

³⁰Mupristi ngaapire njiva kana hangaiwa dzichiri duku, dzaangakwanise kuwana,

³¹imwe ive yomupiro wokupfupira zvitadzo, imwe ive yomupiro wokupisa pamwechete noupfu hwemupiro wembesanwa. Nokudaro mupristi achapira mupiro wokuripira pana Tenzi wokuitira munhu ari kuchenurwa.

³²Uyu ndiwo murao womunhu anenge aine chirwere chamapere asi asingakwanisi kuwana chokuti achenurwe nacho.”

³³Tenzi akataurira Mosesi naAroni kuti,

³⁴“Kana masvika munyika yeKanani yandiri kukupai kuti ive yenyu, ndikaita kuti imba yomunhu ive nechiundudzi chechirwere munyika yenyu imomo,

³⁵muridzi wayo ngaauye kumupristi amutaurire kuti, ‘Ndiri kuona zvinenge chiundudzi chechirwere mumba mangu.’

³⁶Mupristi ngaati zvose zviri muimba yacho zviburitswe panze asati apindamo kundoongorora chiundudzi chacho nokuti akasadaro zvose zvirimo zvingazonzi zvakan'ora. Mushure maizvozvo mupristi ngaapindemo kundoongorora imba iyoyo.

³⁷Ngaaongorore chiundudzi chacho, kana akaona chisiri pamusoro chete, chakapinda mukati memadziro, chiine ruvara rwamashizha kana kuti rwakatsvukuruka,

³⁸mupristi ngaabude mumba imomo aipfige igare yakapfigwa kudaro kwamazuva manomwe.

³⁹Pazuva rechinomwe mupristi ngaadzokere kuimba iya kundoiongororazve. Kana akaona chiundudzi chapararira madziro emba iyoyo,

⁴⁰mupristi ngaati vabvise mabwe ane chiundudzi andokandwa kunze kweguta kunorasirwa marara.

⁴¹“Mupristi ngaati madziro ose omukati memba iyoyo aparwe. Zvakwakwanuka zvacho ngazvindorasirwa kunze kweguta kunorasirwa marara.

⁴²Ngavatore mamwe mabwe vaaise pakabviswa mabwe aye, vadzurure madziro iwayo patsva.

⁴³“Kana chiundudzi ichocho chikadzokazve mumba muya makambobviswa mabwe mukaparwa mukadzururwa patsva,

⁴⁴mupristi ngaandoiona. Kana mavara echiundudzi ichocho apararira, nemba iyoyo, chinenge chiri chiundudzi chechirwere chinoparadza, imba iyoyo yaton'ora.

⁴⁵Ngaapaze imba iyoyo. Mabwe ayo namapango ayo nevhu rayo ngazvitakurwe zviendwe nazvo kunze kweguta kunorasirwa marara.

⁴⁶Ani naani anopinda mumba iyo panguva yainombonzi igare yakapfigwa achava akan'ora kusvikira zuva ridoke.

⁴⁷Ani naani anorara mumba imomo uye ani naani anodyiramo ngaasuke hanzu dzake.

⁴⁸“Asi kana mupristi akauya kuzoongorora akaona chiundudzi chisina kupararira nemba iya ngaataure pachena kuti haina kun'ora nokuti chiundudzi chose chinenge chapera.

⁴⁹Mupristi ngaatore man'ana maviri nechimuti chemusidhari netambo tsvuku nakabazi kemuhisopu zvokundochenurisa imba iyoyo.

⁵⁰Ngaaurayire shiri imwe pamusoro pehari yevhu ine mvura yakanaka yakachena.

⁵¹Ngaatore chimuti chomusidhari nekabazi komuhisopi netambo tsvuku pamwechete neshiri mhenyu azvinyike muropa reshiri yauraiwa mumvura yakanaka yakachena arisase kanomwe mumadziro emba iya.

⁵²Nokudaro achachenura imba iyoyo neropa reshiri iya, nemvura iya yakanaka yakachena, neshiri mhenyu nechimuti chemusidhari nakabazi kemuhisopi netambo tsvuku.

⁵³Ngaaende kunze kweguta aibhururutse itetereke zvayo nesango. Ndiko kuchenura kwaachaita imba iyoyo, ichibva yava isina kun'ora.

⁵⁴“Iwoyu ndiwo murao wechirwere chamapere chingave chezvisasa

⁵⁵kana chiundudzi chepahanzu kana chomumba

⁵⁶kana chokuzvimba kana chamatuzu, kana chevara.

⁵⁷Murao iwoyo unobatsira kuziva kuti chinhu ichi chakan'ora here kana kuti kwete. Uyu ndiwo murao wechirwere chamapere.”