Read Bhaibhiri Idzva rechiShona Mupiro 15 Bible Online

Mupiro 15 - Bhaibhiri Idzva rechiShona bible

Mupiro 15

¹Mwari akataurira Mosesi naAroni achiti,

²“Taurira vaIsiraeri kuti, ‘Kana munhurume anezvinobuda maari kubuda kwazvo ikoko kwakan'ora.’

³Uyu ndiwo mutemo pamusoro pokun'ora kunokonzerwa nokuzvirotera: kunyange zvinobuda izvozvo zvichibuda kamwechete kana kuramba zvichibuda, zvose zvinongomun'oresa.

⁴Uvato hwose hunovatwa nomunhu anobudisa izvozvo hunon'ora. Chinhu chose chaanogara chinobva chan'ora.

⁵Ani naani anobata uvato hwake anobva an'ora kusvikira zuva ridoke. Ngaatogeza zvipfeko zvake nomuviri wake.

⁶Ani naani anogara pambogarwa nomunhu ane zviri kubuda maari, atova munhu akan'ora. Achaswera zuva rose ari munhu akan'ora kusvikira zuva ridoke. Ngaasuke hanzu dzake ashambe muviri wake. Achava munhu akan'ora kusvikira manheru.

⁷Ani naani anobata muviri womunhu ane zvinobuda maari izvozvo anofanira kusuka hanzu dzake ashambe nemvura achava munhu akan'ora kusvikira manheru.

⁸Kana munhurume uya ane zviri kubuda maari akapfira mate pamunhu asina kun'ora, apfirwa mate wacho atova munhu akan'ora kusvikira zuva ridoke.

⁹Chityaro chose chose zvacho chinenge changogarwa nomunhurume ane zviri kubuda maari chaton'ora.

¹⁰Ani naani anobata chinenge chambogarwa nomunhu iyeyo atova munhu akan'ora kusvikira zuva ridoke. Anenge atakura chinhu chakadaro, ngaasuke hanzu dzake ashambe muviri wake nemvura. Achava munhu akan'ora kusvikira manheru.

¹¹Kana munhu abatwa nomurume ane zviri kubuda maari asina kushamba maoko nemvura ngaasuke hanzu dzake, ashambe muviri wake nemvura achava munhu akan'ora kusvikira zuva ridoke.

¹²Hari yevhu inenge yabatwa nomunhu ane zviri kubuda maari ngaipwanywe, kana uri upi zvawo mudziyo womuti ngausukwe nemvura.

¹³“Kana munhurume uya ane zvanga zvichibuda maari zvamira kubuda, ngaagare mazuva manomwe okuchenurwa. Ngaasuke hanzu dzake, ashambe muviri wake mumvura yakanaka yakachena achava munhu akachenurwa.

¹⁴Pazuva rorusere ngaatore njiva mbiri kana hangaiwa mbiri dzichiri duku aende nadzo kuna Tenzi kumusuo wetendhe rokusanganira adzipe mupristi.

¹⁵Mupristi ngaadzipire kuna Tenzi, imwe ive yomupiro wokupfupira zvitadzo, imwe yacho ive yomupiro wokupisa. Naizvozvo mupristi anobva achenura pana Tenzi munhurume uya anenge ane zviri kubuda maari.

¹⁶“Kana munhurume akaburitsa mbeu dzomuviri wake, atova munhu akan'ora kusvikira zuva ridoke. Ngaasuke hanzu dzake, ashambe muviri wake.

¹⁷Kana mbeu yake ikadonhera pachinhu chipi nechipi zvacho, chingave jira kana dehwe ngachigezwe. Chichava chakan'ora kusvikira zuva ridoke.

¹⁸Kana murume akarara nomukadzi, akaburitsa mbeu dzomuviri wake vose vari vaviri ngavashambe miviri yavo vachava vanhu vakan'ora kusvikira zuva ridoke.

¹⁹“Kana mukadzi ari panguva yake yokutevera kuri kutevera samazuva ose achava munhu akan'ora kwamazuva manomwe. Ani naani anomugunzwa achava munhu akan'ora kusvikira zuva ridoke.

²⁰Chinhu chipi nechipi zvacho chaanovata kana chaanogara panguva yaanenge akan'ora chichava chakan'ora.

²¹Ani naani anobata uvato hwake ngaasuke hanzu dzake ashambe muviri wake. Achava munhu akan'ora kusvikira zuva ridoke.

²²Ani zvake anobata chii zvacho chaanogara ngaasuke hanzu dzake ashambe muviri wake nemvura. Achava munhu akan'ora kusvikira zuva ridoke.

²³Chingava chaanovata kana chii zvacho chaanogara kana munhu akangochibata chete atova munhu akan'ora kusvikira zuva ridoke.

²⁴Kana munhurume akavata nomukadzi iyeyo akatapukirwa nezvinomun'oresa achapedza mazuva manomwe ari munhu akan'ora. Chii zvacho chaanovatawo chinon'orawo.

²⁵“Kana akaramba achibuda ropa kwamazuva mazhinji isiri nguva yake yokutevera kana kuramba achibuda ropa nguva yake yokutevera yapfuura, achava munhu akan'ora nguva yose yaanenge achibuda ropa. Akangon'ora sezvaanoita ari panguva yake yokutevera.

²⁶Uvato upi noupi zvahwo hwaanovata mazuva ake ose okutevera uye chigaro chose chose zvacho chaanogara chichava chakan'ora sezvazvinongoita panguva yake yokutevera.

²⁷Ani naani anobata zvinhu izvozvo anon'ora, achava munhu akan'ora ngaasuke hanzu dzake, ashambe muviri wake nemvura. Achava munhu akan'ora kusvikira zuva ridoke.

²⁸Kana ropa rake ramira kubuda ngaambogara kwamazuva manomwe, kana mazuva iwayo apera, achava munhu akachenurwa.

²⁹Pazuva rorusere ngaatore njiva mbiri kana hangaiwa mbiri dzichiri duku aende nadzo kumupristi kumusuo wetendhe rokusanganira.

³⁰Mupristi ngaapire imwe ive yomupiro wokupfupira zvitadzo, imwe yacho ive yomupiro wokupisa. Nokudaro mupristi anobva achenura pana Tenzi mukadzi iyeyo pakutevera kwake kunenge kuchimun'oresa.

³¹“Ndiko kutsauranisa kwauchaita vanenge van'ora nevanenge vasina pakati pavaIsiraeri, kuti varege kufa pamusana pokun'ora kwavanenge vanako, vachin'oresa tendhe rinoera riri pakati pavo.

³²“Iwoyu ndiwo murao unosunga murume anozvirotera neanoburitsa mbeu yomuviri wake achizvin'oresa,

³³ndiwo unosungawo mukadzi ari kurwara panguva yake yokutevera angave munhurume kana munhukadzi anezvinobuda maari nomurumewo anovata nomukadzi akan'ora.”