Read Bhaibhiri Idzva rechiShona Mupiro 18 Bible Online

Mupiro 18 - Bhaibhiri Idzva rechiShona bible

Mupiro 18

¹Tenzi akataurira Mosesi achiti,

²“Udza vaIsiraeri kuti, ‘Ini Tenzi ndini Mwari wavo.

³Musatevedzere tsika dzinoitwa navanhu vokuIjipiti kwamaigara kunyange kutevedzera tsika dzinoitwa navanhu vokuKanani kwandiri kukuendesai. Musatevedzere maitiro avo.

⁴Munofanira kuchengeta mitemo yangu nokuteerera mirao yangu, ive gwara renyu ramunofamba naro, Ini Tenzi ndini Mwari wenyu.

⁵Saka chengetai mirao yangu nemitemo yangu nokuti munhu anoichengeta, inomupa upenyu, ndini Tenzi.’

⁶“Hakuna munhu anobvumirwa kutorana nehama yepedyo achiifukura, ndini Tenzi.

⁷Usazvidze baba wako uchitorana naamai vako, ndaamai, usatadze navo.

⁸Usatorane nomukadzi wababa wako, kuzvidza baba ikoko.

⁹Usatorane nahanzvadzi yako, angave mwana wababa wako nomumwe mukadzi kana mwana wamai vako nomwe murume, kunyange yakazvarirwa mumusha menyu kana kuti yakaberekerwa kumwewo.

¹⁰Usatorane nomuzukuru wako angave mwana womwanakomana wako kana mwana womwanasikana wako kutozvifumura ikoko.

¹¹Usatorane nomwana akaberekwa nababa wako nomumwe mukadzi, ihanzvadzi yako.

¹²Usatorane navatete vako, ihama yababa vako yomumba chaiyo.

¹³Usatorane nomukoma kana munun'una waamai vako nokuti ihama yaamai vako yomumba chaiyo.

¹⁴Usatorane nomudzimai womukoma kana wemunun'una wababa vako kuzvidza babamudiki kana kuti babamukuru wako ndimaiguru kana mainini vako.

¹⁵Usatorane nomuroora wako, mudzimai womwana wako saka usatorane naye.

¹⁶Usatorane nomudzimai wemukoma kana munun'una wako kuzvidza mukoma kana munun'una wako.

¹⁷Usatorane nomukadzi pedzepo wozotoranazve nemwanamusikana wake, kana kutorona nemwana womwanakomana wake kana nemwana womwanasikana wake. Vane ukama newe zvakaipa izvozvo.

¹⁸Kana mudzimai wako achiri mupenyu usatorane nomukoma kana munun'una wake chero mukadzi wako achiri mupenyu.

¹⁹“Rega kutorana nomukadzi panguva yake yokutevera.

²⁰Usatorane nomudzimai wemumwe wako uchizvin'oresa naye.

²¹Usape mwana wako kuti apisirwe Moreki mumoto uchiipisa zita raMwari wenyu, ndini Tenzi.

²²Rega kutorana nomumwe munhu wechirume sokutorana kwaungaite nomukadzi, chinhu chinosemesa kwazvo.

²³Murume ngaarege kuita chakaipa nemhuka achizvin'oresa nazvo. Mukadziwo ngaarege kuita chakaipa nemhuka, ndokurasika chaikoiko.

²⁴“Usazvin'orese nezviito zvakadaro nokuti ndudzi dzavanhu vomunyika yamuchandogara dzandichadzinga dzakazvin'oresa nezviito izvozvo.

²⁵Nyika yavo yakan'oreswa nezviito zvavo saka ndakairanga pamusana pouipi hwayo, nyika iyoyo ikaita zvokurutsa vanhu vemo.

²⁶Asi imi mose zvizvarwa zvemo navatorwa vagere nemi, chengetai mitemo nemirao yangu, murege kuita chii zvacho chakaipa chikadai.

²⁷Ndinodaro nokuti vanhu vakanga varimo, imi musati mavemo vakaita zvinhu zvakaipisisa izvozvi vakan'oresa nyika iyoyo.

²⁸Kana imi mukan'oresa nyika, ingadaro ikakurutsai somurutsiro wayakaita vanhu vaimbogaramo imi musati mavemo.

²⁹Ani naani anoita tsika dzakaipa dzikadai achachekwa ukama nevokwake.

³⁰“Naizvozvo, chengetai zvandinoreva musambofa zvenyu makaita tsika idzodzi dzakaipa dzikadaro dzaiitwa navanhu vaigaramo imi musati mavemo. Musambozvin'oresa netsika idzodzo. Ini Tenzi, ndini Mwari wenyu.”