Read Bhaibhiri Idzva rechiShona Mupiro 19 Bible Online

Mupiro 19 - Bhaibhiri Idzva rechiShona bible

Mupiro 19

¹Tenzi akati kuna Mosesi,

²“Udza vaIsiraeri kuti, ‘Ivai vatsvene nokuti ini Tenzi, Mwari wenyu ndiri mutsvene.

³Mumwe nomumwe wenyu ngaaremekedze amai vake nababa vake, achengete maSabata angu. Ini Tenzi ndini Mwari wenyu.’

⁴“Musapindukire kuzvifananidzo. Musagadzire vamwari vokuumba noutare. Ini Tenzi ndini Mwari wenyu.

⁵“Kana mopira chibayiro chemipiro yokuwadzana kuna Tenzi chipirei nomutoo unoita kuti chive chinogamuchirwa.

⁶Ngachidyiwe musi wakarewo wachinenge chapirwa, kana mangwana acho. Zvose zvinenge zvasara zvichiripo kusvikira pazuva retatu ngazvipiswe nomoto.

⁷Kana chikazodyiwa pazuva retatu kunenge kwava kuita chinhu chakaipa kwazvo, hachizogamuchirwa.

⁸Ani naani anochidya imhosva yake nokuti anenge an'oresa chinhu chaTenzi chinoera, munhu iyeyo ngaachekwe ukama nevokwake.

⁹“Kana mokohwa minda yenyu regai kukohwa kusvikira kumichetocheto, kana kufuhwa muchitora mbesanwa dzinosaririra muminda yenyu pakukohwa.

¹⁰Musabva mafuhwiridza munda wamagirepisi kana kubva manhongerera magirepesi anenge adonhera pasi. Ngazvisiyirwe varombo navatorwa. Ini Tenzi Mwari wenyu ndini ndinodaro.

¹¹“Musabe kana kunyengedzana kana kureva nhema.

¹²Musapike nhema nezita rangu muchiipisa zita raMwari wenyu, ndini Tenzi ndinodaro.

¹³“Musabate mumwe wenyu zvakaipa kana kupamba zvinhu zvake. Regai kurara muine mubayiro womushandi usiku hwose kusvikira mangwanani.

¹⁴Musati kune matsi dai ukawana chinokuwana. Usaisire bofu chinhu chokuripingirisha, unofanira kutya Mwari wako, ndini Tenzi ndinodaro.

¹⁵“Pakutonga mhosva tonga usingatsaudzire, usinganyari murombo kana kuremekedza mupfumi, asi unofanira kutonga mhosva nomazvo.

¹⁶Usafambe-fambe uchiita makuhwa pakati pevekwako. Usapupurire mumwe zvenhema kuti aurayiwe, ndini Tenzi ndinodaro.

¹⁷Usaite daka uchivenga hama yako mumwoyo mako, asi gara pasi unyatsotaurirana naye urege kuita chitadzo pamusana pake.

¹⁸Usatsive kana kuita daka uchivenga vamwe vako. Asi ida mumwe wako sokuda kwaunozviita iwe pachako, ndini Tenzi ndinodaro.

¹⁹“Chengetai mirao yangu. Zvipfuwo zvenyu ngazvirege kuberekeswa nerumwe rudzi rwezvipfuwo. Musadyare mhando mbiri dzembeu mumunda mumwechete. Musapfeke chipfeko chakagadzirwa pachisanganisirwa machira emhando mbiri.

²⁰“Kana murume akaita chakaipa nomuranda wechikadzi iye achangobva mukuroorwa nomumwe murume, asi asati abvisirwa mari yokumutenga kana kumusunungura muuranda, ngavapiwe chirango, asi ngaarege kuurayiwa nokuti mukadzi iyeyo anga achiri muranda.

²¹Murume iyeyo ngaaunze hondohwe yomupiro wake wokuripa mhosva yake kuna Tenzi kumusuo wetendhe rokusanganira, hondohwe yokubvuma mhosva.

²²Nehondohwe iyoyo yomupiro wokuripa mhosva mupristi ngaaripire kuna Tenzi chitadzo chomunhu iyeyo chaakaita. Chitadzo chaakaita chinobva charegererwa.

²³“Kana mazosvika kunyika iyoyo mukasima miti yemichero inodyiwa michero iyoyo ichava inorambidzwa kwamuri, hamubvumirwe kuidya kwemakore matatu, ngairege kudyiwa.

²⁴Michero yose yainobereka mugore rechina inenge yava michero inoera inenge yava yomupiro wokurumbidza nawo Tenzi.

²⁵Asi mugore rechishanu mungadye zvenyu michero yayo. Izvozvi zvose zvinoitirwa kuti michero yenyu iwe. Ndini Tenzi Mwari wenyu ndinodaro.

²⁶“Musadye nyama isina kusinzwa. Musaite un'anga hwokududzira mashura kana kubvunza anosvikirwa.

²⁷Musachekerere vhudzi renyu reparushaya kana kugera mativi endebvu dzenyu.

²⁸Kana mafirwa, musazvichekechekere kana kuzvitaratadzira miviri yenyu izvozvo. Ndini Tenzi ndinodaro.

²⁹“Usabvisise mwana wako musikana chimiro uchimuita kuti ave pfambi, nyika ingadaro ikapindwa nomweya woufeve, ikazara kuti kabu nouipi.

³⁰Chengetai maSabata angu, muremekedze nzvimbo yangu inoera. Ndini Tenzi ndinodaro.

³¹“Musaende kundobvunza vanosvikirwa kana kundoshopera. Musavatsvake kuti murege kun'oreswa navo. Ndini Tenzi, Mwari wenyu ndinodaro.

³²“Unofanira kuremekedza vachena musoro, ukudze harahwa nechembere, uchitya Mwari wako, ndini Tenzi ndinodaro.

³³Musabata zvakaipa mutorwa agere munyika yenyu.

³⁴Zvaunoita kune chizvarwa chomunyika yenyu ndozvamunofanira kuita kune mutorwa. Unofanira kumuda sokuda kwaunozviita iwe pachako nokuti imiwo maiva vatorwa munyika yeIjipiti. Ndini Tenzi, Mwari wenyu ndinodaro.

³⁵“Musambotsaudzira zvenyu pakutonga kana pakuera ukuru hwechinhu, kana kurema kwacho, kana uwandi hwezvinhu.

³⁶Munofanira kuva nezvokueresa zviri pamwero, zvingave zvokueresa kurema kwechinhu, kana bhagidhi rokueresa musvo, kana zvokuera zvinhu zvakaita mvura mvura. Ndini Tenzi, Mwari wenyu ndakakuburitsai kunyika yeIjipiti ndinodaro.

³⁷Munofanira kuchengeta mirao yangu yose nezvirevo zvangu zvose muzviite. Ndini Tenzi ndinodaro.”