Read Bhaibhiri Idzva rechiShona Mupiro 23 Bible Online

Mupiro 23 - Bhaibhiri Idzva rechiShona bible

Mupiro 23

¹Tenzi akati kuna Mosesi,

²“Taurira vaIsiraeri kuti, ‘Mazuva makuru aTenzi andakasarudza amunofanira kuti ave mazuva emusangano mutsvene ezvokunamata ndeaya.

³Basa ngariitwe mumazuva matanhatu, asi zuva rechinomwe iSabata, zuva guru rokuzorora romusangano mutsvene wezvokunamata musaite basa pazuva iroro iSabata naTenzi kwose kwose kwamunenge mugere.

⁴Aya ndiwo mazuva makuru akasarudzwa naTenzi nemisangano mitsvene yezvokunamata amunofanira kuudza vanhu kana nguva yawo yasvika.’

⁵“Zuva rechigumi nemana romwedzi wokutanga zuva rodoka, ndiro zuva rePasika yaTenzi.

⁶Zuva rechigumi nemashanu remwedzi wakarewo izuva guru raTenzi reChingwa chisina mbiriso. Munofanira kudya chingwa chisina mbiriso kwamazuva manomwe.

⁷Pazuva rechiposhi munofanira kuita musangano mutsvene wezvokunamata, musaite basa rinorema.

⁸Asi kwamazuva manomwe pirai Tenzi mupiro unoita zvokupiswa nomoto. Pazuva rechinomwe itai musangano mutsvene wezvokunamata, murege kuita basa rinorema.

⁹Tenzi akati kuna Mosesi,

¹⁰Taurira vaIsiraeri kuti, ‘Kana masvika kunyika yandiri kukupai mukakohwa mbesa dzayo torai chisumbu chembesa dzamunotanga kukohwa mupe mupristi.’

¹¹Ngaapire chisumbu ichocho aite mupiro unovheyeswa uchipirwa kuna Tenzi kuti akugamuchirei. Pazuva rinotevera Sabata, mupristi ndipo paanosimudza achiupira kuna Tenzi.

¹²Pazuva ramunoita mupiro unosimudzirwa uchipirwa Mwari, munofanira kupira Tenzi hwayana hono, ine gore rimwechete, isina chinoshoreka yomupiro wokupisa.

¹³Toraiwo makirogiramu maviri eupfu muhukanye namafuta eorivhi mupire kuna Tenzi mupiro unoita zvokupiswa nomoto, unonhuhwirira zvinofadza, pamwechete nawo pirai mupiro wezvokunwa wewaini inokwana rita rimwechete.

¹⁴Musambodya zvenyu chingwa kana mbesanwa dzakakangwa kana kudya zvomumunda zvinyoro, kusvikira pazuva rakarero kusvikira matounza mupiro waTenzi iwoyu. Murao iwoyu uchagara uripo pazvizvarwa zvenyu zvose kwose kwose kwamunenge mugere narini wose.

¹⁵“Kubvira pazuva rinotevera Sabata rechinomwe pamunounza chisumbu chembesanwa chinosimudzirwa chichipirwa verengai mavhiki manomwe azere.

¹⁶Kana kwapera maSabata manomwe, zuva ramangwana racho rinobva rakwanisa mazuva makumi mashanu ipapo pirai Tenzi mumwe mupiro wembesanwa itsva.

¹⁷Muchaunza kubva kudzimba dzenyu zvingwa zviviri zvinosimudzirwa zvichipirwa kuna Mwari. Chingwa choga choga ngachibikwe noupfu hunorema makirogiramu maviri, huri hwekoroni hwakanyatsokuyiwa, chibikwe chiine mbiriso sembesa dzokutanga kuibva dzinopirwa Tenzi.

¹⁸Pamwechete nechingwa ichocho munofanira kupira hwayana nomwe dzine gore rimwechete dzisina chinoshoreka padziri, nehandira imwechete nembudzi mbiri. Ngazvive zvomupiro wokupisa pamwechete nemupiro wazvo wembesanwa nemupiro yazvo yezvokunwa. Iwoyu mupiro unoita zvokupiswa nomoto unonhuhwirira zvinofadza Tenzi.

¹⁹Munofanira kupira mbudzi hono imwechete, yomupiro wokupfupira zvitadzo nehwayana mbiri, hono, dzine gore rimwechete sechibayiro chomupiro wekuwadzana.

²⁰Mupristi ngaazvisimudze achizvipira nechingwa chiya chembesanwa dzinotanga kukohwiwa somupiro unosimudzwa uchipirwa kuna Tenzi nehwayana mbiri. Zvinhu izvozvi zvinenge zvapirwa kuna Tenzi, zvinoera, zvinozopihwa vapristi.

²¹Pazuva rakarero daidzirai musangano mutsvene wezvokunamata. Musaite basa rinorema. Iwoyu, mutemo uchagara uripo, narini wose, kwose kwamunenge mugere, pazvizvarwa zvenyu zvose.

²²“Kana mokohwa minda yenyu regai kukohwa kumuchetocheto kana kufuhwa mbesanwa dzinosaririra muminda yenyu. Ngazvisiyirwe varombo navatorwa. Ndini Tenzi Mwari wenyu ndinodaro.”

²³Tenzi akataurira Mosesi achiti,

²⁴“Udza vaIsiraeri kuti ‘Zuva rokutanga romwedzi wechinomwe, izuva guru rokuzorora, zuva romusangano mutsvene wezvokunamata, rinopembererwa nokuridza mupururu.

²⁵Musamboita zvenyu basa rinorema, munofanira kupira mupiro unoita zvokupiswa nomoto kuna Tenzi.’ ”

²⁶Tenzi akataurira Mosesi achiti,

²⁷“Zuva rechigumi remwedzi iwoyu wechinomwe, izuva rokuripira zvitadzo nokuwadzana naTenzi. Kwamuri inguva yamunofanira kuita musangano mutsvene wezvokunamata. Munofanira kuzvinyima mupire Tenzi mupiro wokupisa nomoto.

²⁸Musamboita zvenyu basa pazuva iroro nokuti izuva rokuripira zvitadzo nokuwadzana naTenzi, Mwari wenyu.

²⁹Ani naani anorega kuzvinyima pazuva iroro achachekwa ukama novokwake.

³⁰Ani naani anotoita zvake basa pazuva iroro munhu iyeyo ndichamuparadza pakati pevokwake.

³¹Musamboita zvenyu basa. Murao iwoyu uchagara uripo narini wose pazvizvarwa zvenyu zvose, kwose kwamunenge mugere.

³²Kwamuri, zuva iri, iSabata guru rokuzorora. Munofanira kuzvinyima kubvira manheru ezuva rechipfumbamwe romwedzi iwoyo. Chengetai Sabata kubvira manheru iwayo kusvikira mangwana manheru.”

³³Tenzi akati kuna Mosesi,

³⁴“Taurira vaIsiraeri kuti, ‘Kubvira pazuva rechigumi namashanu romwedzi wechinomwe chengetai mazuva makuru amatumba okupemberera Tenzi.’

³⁵Zuva rokutanga racho izuva romusangano mutsvene wezvokunamata, hamufaniri kuita basa rinorema.

³⁶Kwamazuva manomwe iwayo pirai Tenzi mipiro wokupisa nomoto. Pazuva rorusere ngapaitwe musangano mukuru mutsvene wezvokunamata, mupire kuna Tenzi mupiro wokupisa, musangano mukuru, musaite basa rinorema.

³⁷Iwaya ndomazuva makuru akasarudzwa naTenzi amunofanira kuita misangano mitsvene yezvokunamata, amunopira Tenzi mipiro yokupisa nomoto, nemipiro yokupisa nemipiro wembesanwa nezvibayiro nemipiro yezvokunwa, zuva nezuva riine mipiro yaro

³⁸tisingaverengeri maSabata aTenzi, kana zvipo zvenyu, kana mupiro yezvakambotsidzwa kana mipiro yokupa nechido chenyu, yamunopira kuna Tenzi.

³⁹“Kubvira pazuva rechigumi nemashanu romwedzi wechinomwe, pamunenge mapedza kukohwa minda yenyu, chengetai mazuva makuru iwayo okupemberera Tenzi, kwamazuva manomwe, Zuva rokutanga ngarive zuva guru rokuzorora.

⁴⁰Zuva rorusere ngarive zuva guru rokuzorora rokutanga, tanhai michero yakanaka yemiti yenyu yamakasima. Toraiwo mapazi omurara neemimwe miti ine mashizha mazhinji, neemushambangwena yomurwizi, mufare muchipemberera pamberi paTenzi Mwari wenyu kwamazuva manomwe.

⁴¹Chengetai mazuva makuru iwaya okupemberera Tenzi kwamazuva manomwe pagore. Iwoyu, murao uchagara uripo narini wose, pazvizvarwa zvenyu zvose. Uchengetei mumwedzi wechinomwe.

⁴²Garai mumatumba kwamazuva manomwe. Munhu wose, muIsiraeri, ngaagare mumatumba,

⁴³kuitira kuti zvizvarwa zvenyu zvizive kuti ini ndakagarisa vaIsiraeri mumatumba, pandakavaburitsa munyika yeIjipiti. Ndini Tenzi, Mwari wenyu ndinodaro.”

⁴⁴Saizvozvo Mosesi akaudza vaIsiraeri mazuva makuru akasarudzwa okupemberera Tenzi.