Read Bhaibhiri Idzva rechiShona Mupiro 25 Bible Online

Mupiro 25 - Bhaibhiri Idzva rechiShona bible

Mupiro 25

¹Tenzi akataurira Mosesi, mugomo reSinai achiti,

²“Udza vaIsiraeri kuti, kana masvika munyika yandiri kukupai, nyika ngaivewo neSabata rayo pamusana paTenzi.

³Kwamakore matanhatu rimai zvenyu minda yenyu, muchipemhena migirepisi yenyu kwamakore matanhatu, muchikohwa zvenyu zvirimwa zvenyu.

⁴Asi gore rechinomwe ngarive gore reSabata rokuzorodza minda, negore rakapirwa Tenzi. Musarime minda yenyu kana kupemhena migirepisi yenyu.

⁵Regai kukohwa zvirimwa zvenyu zvamahoko. Regai kutanha magirepisi emigirepisi yenyu yamusina kumbopemhena iya, igore rokusarutsa minda isina kurimwa.

⁶Zvirimwa zvamahoko nemichero inoibva gore iroro rokusarutsa minda, ndozvichava chokudya chenyu imi, navaranda venyu vechirume nevechikadzi, navashandi venyu, navatorwa vagere nemi,

⁷nezvipfuwo zvenyu nemhuka dzomunyika yenyu. Zvose zvinoibva gore iroro ndozvichava chokudya.

⁸“Mukachengeta makore okusabata basa muminda kanomwe munenge matokwanisa makumi mana amakore ana makore mapfumbamwe.

⁹Pazuva rechigumi remwedzi wechinomwe pazuva rokuripira zvitadzo nokuwadzana naMwari, hwamanda ngadziridzwe munyika yenyu yose.

¹⁰Eresai gore ramakumi mashanu, muparidze kuvanhu vose vomunyika yenyu nezvorusununguko. Kwamuri, igore rehwamanda, gore rokuti munhu wose anofanira kudzokera pamunda pake, munhu wose achidzokera kumhuri yokwake.

¹¹Gore rechimakumi mashanu kwamuri, igore rokupemberera Jubhiri iroro, mugore iro regai kurima minda yenyu, kana kukohwa zvemahoko kana kutanha magirepisi pamigirepisi yamusina kupemhena iya.

¹²Ndinodaro nokuti igore rehwamanda, kwamuri igore rinoera. Muchadya zvamahoko omuminda yenyu.

¹³“Mugore iroro rehwamanda, munhu wose ngaadzokere pamunda pake.

¹⁴Kana muchitengeserana kana kutengerana, vaIsiraeri pachenyu, musabiridzirane.

¹⁵Kana munhu otenga munda womumwe, ngapaverengwe makore apfuura kubvira pagore rehwamanda, munda ngautengeswe pachiverengiwa makore okurima asara.

¹⁶Kana kuchine makore mazhinji mutengo wacho ngaukwidzwe. Asi kana kwasara makore mashoma mutengo wacho ngauderedzwe nokuti chaanokutengesera chaicho huwandi hwamakore auchazorima.

¹⁷Musabiridzirane pachenyu, asi ityai Mwari wenyu nokuti ndini Tenzi, Mwari wenyu ndinodaro.

¹⁸“Chengetai mirao yangu nemitemo yangu muite zvainoreva kuti mugare munyika yenyu makagarika makagarikana.

¹⁹Nyika yenyu ichava nyika yamaguta ezvirimwa. Muchadya zvenyu muchiita zvokutorasa, mugere murugare.

²⁰“Kuda mumwe wenyu angati, ‘Ko tichadyeiko mugore rechinomwe patisingabvumirwi kurima minda kana kukohwa mbesa?’

²¹Ndichakutumirai chikomborero changu pagore rechitanhatu zvokuti minda yenyu ichabereka mbesa dzakaenzana nedzemakore matatu.

²²Pamunodyara minda yenyu mugore rechisere munenge muchiri kudya zvamakakohwa kusvikira mugore rechipfumbamwe. Pamunenge muchikohwa zvegore iroro munenge muchitodya zvakare.

²³“Nyika haitengeserwe munhu zvachose nokuti nyika ndeyangu, imi muri vaenzi pairi vandinotombopawo zvangu pokugara.

²⁴“Munyika yenyu yose zvayo, munhu akambotengesa munda, ane mvumo yokuutenga zvakare.

²⁵Kana mumwe muIsiraeri apindwa nourombo akasvika pakutengesa munda wake hama yake yomumba ngaiuye idzikinure munda iwoyo wakatengeswa nehama yake.

²⁶Kana munhu asina hama yomumba yokudzikinura munda wake, asi iye ozopfuma zvokuti anowana mari yokuudzikinura nayo,

²⁷ngaaverenge makore akapera kubvira panguva yaakautengesa, amudzosere muripo unokwanirana namakore anenge asara kusvika pagore rehwamanda, ozobva odzokera pamunda pake.

²⁸Asi kana asina chokuudzikinura nacho kuti uve wake zvakare, uchagara zvawo uri mumaoko emunhu akautenga kusvikira gore rehwamanda. Mugore rehwamanda unenge usisiri womunhu uya akautenga. Muridzi wawo ndopaachadzokera zvake pamunda pake.

²⁹“Kana munhu akatengesa imba yake iri muguta rakakomberedzwa norusvingo, ane mvumo yokuidzikinura kusati kwapera gore rokuitengesa kwake. Gore iroro rose ane mvumo yokuidzikinura.

³⁰Asi kana gore rikapera asina kuidzikinura, imba yakadai, iri muguta rakakomberedzwa norusvingo, ichazogara iri yomunhu akaitenga iyeyo pazvizvarwa zvake zvose, haasungirwi kuidzosera kumuridzi pagore rehwamanda.

³¹Asi dzimba dzomumaruwa, kusina kukomberedzwa norusvingo, dzine murao mumwechete noweminda. Varidzi vadzo vane mvumo yokudzidzikinura, uyewo pagore rehwamanda dzinodzoserwa kune varidzi vadzo.

³²Mumaguta avaRevhi, vaRevhi vane mvumo yokudzikunura dzimba dzavo dzomumaguta avo nguva ipi neipi zvayo.

³³Kana muRevhi akarega kudzikinura imba yakatengeswa muguta ravo inodzokera kwaari mugore rehwamanda. Nokuti dziri mumaguta avaRevhi ndedzavo mukati mavaIsiraeri.

³⁴Asi mafuro akapoteredza maguta avaRevhi ngaarege kutengeswa nokuti ndeavo narini wose.

³⁵“Kana mumwe wako muIsiraeri agere newe akawirwa nourombo, zvokutoshayisisa chokubata, mutore ugare naye umubatsire, sezvaungangoitira mutorwa kana munhu anokumbira pokugara mumusha mako.

³⁶Usareve imwe mari yokuwedzera pamusoro peyawakamukweretesa, asi itya Mwari wako urege mumwe wako muIsiraeri agare zvake newe.

³⁷Usamukweretese mari uchida kuti azokudzosera yabereka imwe pamusoro, kana kumutengesera zvokudya uchida kuti uwane zvako imwe mari pamusoro pomutengo wazvo.

³⁸Ini Tenzi ndinodaro, ndini Mwari wenyu ndakakuburitsai munyika yeIjipiti kuzokupai nyika yeKanani kuti ndive Mwari wenyu.

³⁹“Kana mumwe wako muIsiraeri agere newe, apindwa nourombo, akazvitengesa kwauri rega kumubata somuranda.

⁴⁰Ngaagare newe uchimubata somushandi zvake kana kuti muenzi ari kumbogara zvake newe. Ngaakuitire basa somushandi kusvikira gore rehwamanda,

⁴¹ndopaachazobva zvake pauri iye navana vake, odzokera zvake kumusha kwake, kunyika yemadzibaba ake.

⁴²Ndinodaro nokuti vaIsiraeri varanda vangu vandakaburitsa munyika yeIjipiti, havafanire kutengeswa savaranda.

⁴³Usamubate zvakaipa uchimuitira zvehasha asi itya Mwari wako.

⁴⁴Kana muchida varanda vechirume kana vechikadzi munogona zvenyu kuvatenga kundudzi dzavanhu dzakakupoteredzai.

⁴⁵Munogonawo kuvatenga kubva kumhuri dzavatorwa vagere nemi nemhuri dzinemi dzakaberekerwa munyika menyu vachiva venyu.

⁴⁶Vanogona kuva nhaka yamunosiyira vana venyu ichiva yavo nokusingaperi. Mungavaite zvenyu varanda venyu, asi vamwe venyu vaIsiraeri musavabate zvakaipa muchivaitira zvehasha.

⁴⁷“Mutorwa agere nemi kana kuti mupfuuri agere nemi akapfuma asi mumwe wenyu, muIsiraeri obva apindwa nourombo ozvitengesa kumutorwa kana kumupfuuri agere nemi kana kune mumwe wemhuri yomutorwa iyeyo,

⁴⁸shure kwokuzvitengesa kwaakaita, zvinobvumirwa kumudzikunura. Anogona zvake kudzikunurwa nomumwe wake muIsiraeri,

⁴⁹angave sekuru wake kana babamukuru kana babamudiki wake, kana kuti mukoma kana munun'una wake, kana imwe hama yake yomudzinza rokwake. Dai kuri kuti iye apfumawo anogona kuzvidzikinura pachake.

⁵⁰Ngaaverengerane makore nomunhu akamutenga, kubvira pagore raakazvitengesa kwaari kusvikira pagore rehwamanda. Mari yacho inofanira kuwirirana nemakore acho. Makore aakanga aina vatenzi vake anofanira kutorwa semakore aakanga achiita zvake basa somushandi.

⁵¹Kana kuchine makore mazhinji asara ngaaripe chikamu chemari inosara pamari yaakatengwa nayo pabviswe mari yamakore aakamushandira.

⁵²Kana pasara makore mashomanana, ngaaverengerane naye makore asara kusvika kugore rehwamanda abvise muripo wake unowirirana namakore iwayo asara okuzvinunura.

⁵³Zvaanenge achimushandira gore negore ngaarege kumuomesera upenyu imi makatarisa zvenyu.

⁵⁴Kana asina kudzikunurwa nenzira iyoyi ngaapiwe rusununguko rwake mugore rehwamanda iye navana vake.

⁵⁵Ndinodaro nokuti vaIsiraeri varanda vangu. Ndevangu nokuti ndini ndakavaburitsa munyika yeIjipiti. Ndini Tenzi, Mwari wenyu ndini ndinodaro.