Read Bhaibhiri Idzva rechiShona Mupiro 26 Bible Online

Mupiro 26 - Bhaibhiri Idzva rechiShona bible

Mupiro 26

¹“Regai kuzvigadzirira zvifananidzo zvokunamata kana kumisa zvifananidzo zvokuveza, kana matombo okuyeuka nawo vamwe vamwari. Regai kumisa matombo munyika yenyu muchianamata nokuti ini Tenzi ndini Mwari wenyu.

²Chengetai maSabata angu, muchiremekedza nzvimbo yangu inoera. Ndini Tenzi ndinodaro.

³“Kana mukatevedza mitemo yangu mukateerera mirao yangu nokuichengeta,

⁴ndichakunayisirai mvura nenguva yayo, nyika ichabereka zvibereko zvayo. Miti yemichero yomuminda yenyu ichabereka michero yayo.

⁵Mbesa dzenyu dzichawanda zvokuti nguva yokutanha michero yamagirepisi ichasvika musati mapedza kupura mbesa. Munodzamara musvike pakudyara mbesa dzenyu musati mapedza kutanha magirepisi. Muchadya zvokudya zvenyu muchiguta mugere munyika yenyu makagarikana.

⁶“Ndichakupai rugare munyika yenyu, muchanyatsovata musingavhundutswi nomunhu. Ndichabvisa zvikara munyika yenyu, hamuzovizve nehondo munyika imomo.

⁷Muchadzingirira vavengi venyu, muchivarizha nebakatwa.

⁸Vashanu venyu, vachadzingirira zana ravanhu. Zana ravanhu venyu, richadzingirira zviuru gumi zvavanhu. Vavengi venyu vachapera kuurayiwa nehondo yenyu.

⁹Ndichakucheukai, ndikupei chikomborero chokuti muberekane muwande. Ndichachengeta chitendherano changu nemi.

¹⁰Mbesanwa dzenyu dzichasaruka nokusarukazve mumatura enyu, muchidya, zvokutozodzirasa moisa dzimwe itsva.

¹¹Ndichaita musha wangu pakati penyu, Handizombofi ndakakufuratirai.

¹²Ndichaenda nemi, ndichava Mwari wenyu imi muri vanhu vangu.

¹³Ini Tenzi ndini Mwari wenyu akakuburitsai munyika yeIjipiti kuti murege kuva varanda vavo. Ndakatyora zvikei zvejoko rouranda hwenyu ndikaita kuti mufambe makasununguka.

¹⁴“Kana mukarega kunditeerera, mukarega kuchengeta mitemo iyoyo,

¹⁵kana mukaramba mirao yangu, imi nemwoyo yenyu mofuratira zvirevo zvangu, morega kuchengeta mitemo yangu, mochityora zvenyu chitenderano changu nemi,

¹⁶zvandichaita kwamuri ndezvizvi: ndichakutsvatai nenhamo dzinodederesa, muchaperezeka muchipisa muviri nechirwere chinokupofomadzai muchizoondoroka zvokufa. Muchadyarira mbeu dzenyu pasina, nokuti vavengi venyu ndovachadzidya.

¹⁷Ndichaonana nemi, vavengi venyu vachakurakashai; vanokuvengai ndivo vachakutongai muchatiza pasina anokutandanisai.

¹⁸“Ngatiti maoneswa nhamo idzodzo, asi imi moramba musinganditeereri ini ndichakurangirai zvitadzo zvenyu kakapetwa kanomwe.

¹⁹Chinokuinzvai chacho ndichachityora-tyora. Ndicharambidza denga kunaya, richaita serakadzivirirwa nesimbi, ivhu raunotsika richaomarara somundarira.

²⁰Simba renyu richaperera pasina nokuti hapana chamuchazokohwa muminda yenyu, miti yemichero yomunyika yenyu haina kana muchero wainozokupai.

²¹“Kana mukaramba muchipikisana neni, muchirega kunditeerera, ndichakupinzai mune dzimwe njodzi, ndichikurangirai zvitadzo zvenyu kakapetwa kanomwe.

²²Ndichatupfunura zvikara zvesango zvigoonana nemi, zvichakuurayirai vana venyu, zvichaparadzawo zvipfuwo zvenyu. Zvichakusiyai mava vashomanana, nzira dzenyu dzisisina anofamba.

²³“Kana kuranga ikoku kukatadza kukudzorerai kwandiri asi motoramba zvenyu muchipikisana neni,

²⁴ini pachangu ndichapikisanawo nemi ndichikurangirai zvitadzo zvenyu kakapetwa kanomwe.

²⁵Ndichakuunzirai hondo ichakurangirai kutadza kuchengeta chitenderano. Kana mukaunganidzana mumaguta enyu, ndichaunza denda pakati penyu, ndichakuisai mumaoko avavengi venyu vachakutongai.

²⁶Ndichashomekesa chokudya chenyu zvokuti madzimai gumi achatokwanisa kubikira chingwa chavo muhovhoni imwechete. Pachaerwa mwero wokupa munhu woga woga, muchadya zvenyu asi mucharara muine nzara.

²⁷“Kana izvozvi zvikatadza kuita kuti munditeerere, muchiramba muchingopikisana neni,

²⁸ini pachangu ndichapikisana nemi ndakashatirwa. Iyeni pachangu ndichakurangirai zvitadzo zvenyu kakapetwa kanomwe.

²⁹Muchadya vana venyu vakomana navasikana.

³⁰Ndichaparadza nzvimbo dzenyu dzakatunhumara dzokuteurira. Ndichapaza atari dzenyu dzokupisira rusenzi uye zvitunha zvenyu ndichazviti katakata pamusoro pezvifananidzo zvenyu izvozvo zvakafa zvokunamata. Ini pachangu ndichakusemai.

³¹Maguta enyu ndichaaita kuti ave matongo, nzvimbo dzenyu dzinoera dzichisara dzisisina chinhu. Handizombofadzwa nomunhuhwi wemipiro yenyu.

³²Ndichasiya nyika yenyu yangova nyika, zvichakatyamadza vavengi venyu vageremo.

³³Ndichakumwararidzai mukati mendudzi dzavanhu, ndichakutumirai hondo yebakatwa ikoko. Nyika yenyu ichasara yangova nyika, maguta enyu achisara angova matongo.

³⁴Nyika yenyu ichafarawo kuwana zororo remaSabata, mazuva ose aichange isina vanhu. Imi muri kunyika yavavengi venyu, nyika ndopaichawanawo zororo ichifanirawo kuva namaSabata ayo.

³⁵Zororo raisina kuwana pamaSabata enyu muchigeremo, ichazoriwana pamazuva ose aichange yasara isina munhu.

³⁶“Chitsama chavanhu vanenge vasara ikoko kunyika dzevavengi venyu ndichachipa mwoyo woumbwende zvokuti kunyange mhepo ikapeperetsa shizha rikati shwakata vachati pfocho kutiza. Vachamhanya savanhu vari kutiza hondo yebakatwa. Vachaputsika pasina munhu ari kuvadzingirira.

³⁷Vachatsitsirirana kwazvo iko kusina ari kuvadzingirira. Hakuna mhandu yenyu yamuchagona kumirisana nayo.

³⁸Muchatsakatikira mukati medzimwe ndudzi. Nyika yavavengi venyu ichakupedzai.

³⁹Chitsama chenyu chinenge chasara sezvakangoita madzibaba avo, vacharamba vachipera vari munyika yavavengi venyu pamusana pouipi hwavo uyewo nouipi hwamadzibaba avo.

⁴⁰Asi kana vakarewurura zvakaipa zvavo nezvamadzibaba avo zvavakanditadzira nazvo vakandipandukira

⁴¹zvokuti ini ndakazovapandukirawo, ndikavaendesa kunyika yevavengi vavo, kana vakapindura mwoyo yavo youmhandupandu, vakagamuchira chirango,

⁴²ndicharangarira chitenderano changu chandakaita naJakobho nechitenderano chandakaita naIsaki nechitenderano chandakaita naAbhurahamu, ndigorangarira nyika yavo.

⁴³Asi nyika yavo, vachaisiya ichimbofarirao maSabata ayo okuzorora paichasara isina munhu, vachimbondoripira zvakaipa zvavo nokuti mirao yangu vakaiona sechinhu chisina maturo, mwoyo yavo ikasema mitemo yangu.

⁴⁴Kunyange zvakadaro zvazvo, kana vava kunyika yevavengi vavo ini handizochekani ukama navo, kana kuvavenga zvokuvatsakatisa, ndichityora chitenderano changu navo nokuti ini Tenzi ndini Mwari wavo.

⁴⁵Ndipo pandichazoyeuka chitenderano changu chandakaita namadzitateguru avo andakaburitsa munyika yeIjipiti ndudzi dzose dzichiona, kuti ndive Mwari wavo, ndini Tenzi ndinodaro.”

⁴⁶Izvi ndozvirevo nemirao nemitemo yakaitwa naTenzi pakati pake navaIsiraeri ikapiwa nokuna Mosesi pagomo reSinai.