Read Bhaibhiri Idzva rechiShona Jeremiya 10 Bible Online

Jeremiya 10 - Bhaibhiri Idzva rechiShona bible

Jeremiya 10

¹Teererai munzwe zviri kureva Tenzi kwamuri imi vemba yaIsiraeri.

²Zvanzi naTenzi, “Regai kudzidza nzira dzamamwe marudzi, kana kudedereswa zvenyu nezviratidzo zvomumatenga, nokuti ndizvo zvinodederwa namarudzi

³pamusana pokuti tsika dzamamwe marudzi hadzina maturo. Nokuti vanotema muti mudondo wopanhwa nedemo nomuvezi namaoko ake.

⁴“Vanhu vochishongedza nesirivha nendarama vachirovera zvipikiri nenyundo kuitira kuti zvisimbe.

⁵“Zvakaita sezvimifananidzo zvokudzingisa nazvo makunguo mumunda wamagaka. Kutaura, hazvigone kutaura zvinoita zvokutotakurwa nokuti hazvigone kufamba. Musazvitye nokuti hazvikwanisi kuita zvakaipa kana kuita zvakanaka.”

⁶Hakuna akaita semi imi Tenzi. Imi muri mukuru uye zita renyu imi izita guru kwazvo rine simba.

⁷Ndiani angarege kukutyai, imi Mambo wendudzi dzavanhu? Nokuti ndozvakakodzerana nemi izvozvi nokuti pakati pengwazi dzose dzamarudzi munyika dzavo dzose hamuna akaita semi.

⁸Asi izvo mazungairwa namapenzi hapana chaungadzidze kuzvifananidzo zvokunamata nokuti zvimiti chete.

⁹Sirivha yakapfurwa yacho, yaibva kuTashishi[14] nendarama ichibva kuUfazi; zvifananidzo zvacho ibasa ramaoko emhizha uye rinoitwa namaoko emhizha dzendarama. Hanzu dzazvo dzinenge dziri tsvuku kana dzoruvara rwehute, zvose izvozvo ibasa renyanzvi dzavanhu.

¹⁰Asi Tenzi ndiye Mwari wechokwadi, ndiye Mwari mupenyu ndiye Mambo wokugara nokugara. Kana aita hasha nyika inondengendeka, uye ndudzi dzavanhu hadzimbogonana nokutsamwa kwake.

¹¹“Unofanira kuvataurira kuti, vamwari vacho ivavo vasirivo vasiki vematenga napasi, vachaparara panyika uye vachaparara pasi pematenga.[15]

¹²“Iye ndiye akaita nyika nesimba rake ndiye akasika nyika noungwaru hwake uye nokunzwisisa kwake akawarira matenga.

¹³Paanongoti burutsei muromo mumwechete, mvura inodhiriridza mumatenga. Anoita kuti mhute isimuke kubvira kwakaperera nyika achiita kuti mumvura inonaya muve nemheni achiuyisa mhepo ichibva maanoichengetera.

¹⁴“Munhu wose zvake rangova zungairwa, vanhu vasina ruzivo, mhizha yose yezvendarama ichinyadziswa nezvifananidzo zvayo zvokunamata, nokuti zvifananidzo zvayo zvokunamata ndezvenhando uye hazvina mweya unofema mazviri.

¹⁵“Hazvina kana maturo ese ibasa rounyengedzi, panguva yazvo yokurangwa, zvichaparara.

¹⁶“Iye haana kumboita saizvozvi izvi, iye mugove wevokwaJakobho nokuti ndiye akasika zvinhu zvose uye verudzi rwechiIsiraeri ndivo rudzi rwake rwenhaka. Zita rake rinonzi Tenzi wehondo nehondo.

¹⁷“Sungai, twenyu mutakure, imi vagari venyika[16] yakakombwa

¹⁸nokuti zvanzi naTenzi chinzwai, rwendo rwuno, ndava kuvhiriridzira kure vagari vomunyika muno ndichivapinza nhamo chaiyo vambonzwa kurwadza kwazvinoita.

¹⁹“Maiwe zvangu, inga ndakuvara ini! Ronda rangu rinosiririsa kwazvo! Asi ndakangozviti, nhamo inhamo chokwadi, kwava kutongotirira.

²⁰Tendhe rangu raparadzwa tambo dzangu dzose dzadamburwa. Vana vangu vandisiya uye havasisipo. Wokundimisirazve tendhe rangu hakusisina, kana wokunditurikirira machira angu okudzikatirisa

²¹nokuti vafudzi vacho havana kana musoro havambobvunzawo kuti Tenzi anoti kudii. Ndochakavapa kutadza kubudirira uye kuti danga ravo rose zvaro rezvipfuwo riti mwarara.

²²“Herwo runyerekupe, herwo rwouya! Bongozozo chairo richibva kunyika yokuchamhembe rokuzoita kuti maguta okwaJudha asare angove magutawo zvawo nzvimbo inogara makava.”

²³Nhai Tenzi! Inga ndinoziva wani kuti munhu haasiri iye pachake anozvirongera gwara rokufamba naro, uye kuti pakufamba munhu haasiri iye anozvitungamirira.

²⁴Imi Tenzi, kundidzora, ndidzorei henyu, asi zviri pamwero musina kushatirwa nokuti mungadaro mukaita kuti pangu pandiperere.

²⁵Dururirai hasha dzenyu pane vechirudzi vasingakuzivei, uye pamarudzi asinganamati zita renyu nokuti vakazhanya vokwaJakobho vakavazhanya vakaparadzawo musha wavo.