Read Bhaibhiri Idzva rechiShona Jeremiya 11 Bible Online

Jeremiya 11 - Bhaibhiri Idzva rechiShona bible

Jeremiya 11

¹Herino izwi rakauya kuna Jeremiya richibva kuna Tenzi richiti,

²“Teerera unzwe zviri kurehwa nechitenderano ichi, utaurire vanhu vokwaJudha navagari veJerusaremu,

³uti kwavari, zvanzi naTenzi Mwari weIsiraeri, ‘Ngaapinde rushambwa munhu asingachengeti zviri kurehwa nechitenderano ichi

⁴chandakati madzibaba enyu achengete pandakavaburitsa munyika yeIjipiti,’ muvira romoto resimbi ndichiti, ‘Teererai izwi rangu muite zvose zvandinokuudzai, nokudaro muchava vanhu vangu, ini ndichivawo Mwari wenyu,

⁵kuitira kuti ndichengete chitsidzo chandakapika kumadzibaba enyu chokuvapa nyika yakanaka nyika yomukaka nouchi sezvazviri pari nhasi.’ ” Ini ndakapindura ndichiti, “Ngazvive saizvozvo Tenzi.”

⁶Tenzi akabva ati kwandiri, “Paridza mashoko ose iwayo mumaguta okwaJudha nomumigwagwa yeJerusaremu uchiti inzwai zvinotaurwa nechitenderano ichi muzviite.

⁷Ndinodaro nokuti ndakayambira ndayambirazve madzibaba enyu pandakavaburitsa munyika yeIjipiti ndikaramba ndichivayambira kusvikira pari nhasi ndichingoti, teererai izwi rangu.

⁸Asi ivo kuteerera havana kuteerera kana kurerekera nzeve dzavo. Asi kuti munhu wose akatotevera zvake zvomusoro wake zvakaipa. Ndokusaka ini ndakaita kuti vawirwe nezvose zvinorehwa nechitenderano ichi chandakati vachengete asi ivo vakarega zvavo.”

⁹Tenzi akatizve kwandiri, “Mukati mavanhu vokwaJudha navagari veJerusaremu mapandukwa.

¹⁰Vadzokerazve muuipi hwamadzibaba avo vakaramba kunzwa zvandinotaura. Vavakutevera vamwe vamwari vachivanamata. Imba yokwaIsiraeri nemba yokwaJudha vakatyora chitenderano changu chandakaita namadzibaba avo.

¹¹Naizvozvo, zvanzi naTenzi, chinzwa, ‘Ndavakuvaunzira nhamo yavasingakwanisi kunzvenga. Kunyange vakachema kwandiri, handisi kuzovateerera.’

¹²Zvino maguta okwaJudha navagari veJerusaremu vachaenda kundochema kuna vamwari ivavo vavanopisira rusenzi, asi havakwanisi kuvanunura munhamo dzavo panguva yenhamo yavo.

¹³Nokuti imi vokwaJudha, kuwanda kwakaita maguta enyu ndokuwandawo kwakaita vaMwari venyu. Uyewo sokuwanda kwakaita migwagwa yeJerusaremu ndokuwandawo kwakaita atari dzamakavakira icho chakafumuka ichi, atari dzokupisira rusenzi kuna Bhaari.

¹⁴“Naizvozvo iwe rega kunamatira vanhu ava kana kumbovaisira chichemo kana munyengetero wokuvakumbirira nokuti handisi kuzoteerera kana vodaidzira kwandiri panguva yavo yenhamo.

¹⁵“Iye mudiwa wangu chaachiri kuda mumba mangu chii iye akabata twakaipa twukadai? Idzo mhiko dzenyu nenyama yezvibayiro ndozvingakununurei kunhamo here? Kutoita rurasademo kufara zvenyu nhai?

¹⁶Inga wani Tenzi akambokutii muri muorivhi wakasvibirira une michero yakanaka inoyevedza. Asi noruzha rwedutu guru remhepo achauririmisa nomoto, mapazi awo aroromeswe.

¹⁷“Tenzi wehondo nehondo iye akakusimai ati muwirwe nenhamo pamusana pezvakaipa zvakaitwa nemba yokwaIsiraeri nemba yokwaJudha vachindishatirisa nokupira rusenzi kuna Bhaari.”

¹⁸Tenzi akandiruma nzeve ini ndikabva ndazoziva ndokubva mandiratidza bangano ravo.

¹⁹Asi ini ndakanga ndakapfava sehwayana iri kuendeswa kunourayiwa, ndisingamboziva kuti twavaironga vainge vachitorongereni vachiti, “Ngatiparadzei muti nomuchero wawo, ngatimutsakatisei panyika yavapenyu zita rake ribva rakanganikwa.

²⁰“Zvino, imi Tenzi; wehondo nehondo munotonga zvakarurama imi munoongorora zviri mumwoyo nomupfungwa dzomunhu dai waro mukaita kuti ndione kuvatsividza kwamunoita nokuti ndakaisa kwamuri zvinondinetsa.”

²¹Naizvozvo zvanzi naTenzi panyaya yavanhu veAnatoti vari kuda kupfuudza upenyu hwako vachiti, “Rega kuporofita nezita raTenzi nokuti tingakuuraye namaoko edu aya,”

²²nezvo zvanzi naTenzi wehondo nehondo, “Chinzwa, ini ndichavaranga; majaya achafira muhondo yebakatwa. Vanakomana vavo navanasikana vavo vachafa neshangwa yenzara.

²³Hapana achasara nokuti ndichaunza nhamo pavanhu veAnatoti mugore ravo rokurangwa.”