Read Bhaibhiri Idzva rechiShona Jeremiya 12 Bible Online

Jeremiya 12 - Bhaibhiri Idzva rechiShona bible

Jeremiya 12

¹Tenzi, pandinokunyunyutirai, imi ndimi munenge muri pachokwadi asi ndinoda kumbokutaurirawo nezvoruenzaniso. Seiko vakaipa vachibudirira mune zvavanoita? Sei vanyengedzi vose vachibudirira?

²Ndimi munovasima, ivo vanobva vadzika midzi. Vanokura vagotobereka michero, izvozvo musingabve pamuromo pavo, asi mumwoyo mavo munenge imi musimo.

³Asi imi Tenzi munondiziva munondiona uye munoongorora pfungwa dzangu kwamuri. Vakwekweretsei sehwai dziri kundourayiwa muvatsaurire zuva rorufu.

⁴Kusvikira rini chaizvo nyika ichichema nhamo, uswa huchisvava mumasango mose? Pamusana pokuipa wavageremo mhuka neshiri zvatsvairwa nokuti vanhu vanoti, “Mwari magumo edu haamboaona.

⁵“Kana wakaneta kumhanya navanhu ko kutozoti namabhiza uchakwikwidzana sei? Kana uchiputsika munyika yakanaka kudai, ko kutozoti mumapinga okuna Jorodhani uchaita sei?

⁶“Nokuti kana vakoma, navanun'una vako vemba yokwababa vako; kunyange ivavo vakaita zvounyengedzi kwauri vari kutochema kuti vangakuwane sei, usavanzwe kunyange zvavo vachitaura mazwi akanaka kwauri.

⁷“Ndapa gotsi imba yangu, nhaka yangu ndaifuratira, chido chemwoyo wangu ndachikanda mumaoko mavavengi vacho.

⁸Kwandiri ini nhaka yangu yaita seshumba zvayo yesango, akandiitira pamuromo ndokusaka ini ndava kutomuvenga.

⁹“Ko kwandiri ini, iye nhaka yangu ava here shiri ina matsatsa matsatsa inodya nyama? Akombwa here izvozvi neshiri dzinodya nyama? Endai mundokokorodza mhuka dzose dzesango muuye nadzo dzidye.

¹⁰Vafudzi vakawanda vakaparadza munda wangu wemagirepisi vakatsokodzera mugove wangu, vachiita kuti mugove wangu wakanaka uve renje risina chinhu.

¹¹Vakauita kuti uve chinhu pasina uri chinhu pasina kudaro unochema kwandiri. Nyika iyoyi yose yangova nyika, asi anombozvifunga hapana.

¹²“Pamitunhu yakatunhumara pose zvapo, pasina miti mugwenga'mu, mharadzi dzauya nokuti hondo yaTenzi yebakatwa yoparadza, kubvira kumuganhu wenyika ino kusvikira kwainoperera hakusisina ane rugare.

¹³“Vakadyara zvavo koroni, asi minzwa ndoyavakazokohwa, vakanetera pasina. Vachanyara nezvaunokohwa pari pamusana pehasha dzinotyisa dzaTenzi.”

¹⁴Izvi ndizvo zviri kutaurwa naTenzi izvi, kune vamwe vangu vose vakaipa mwoyo vanotambanudzira ruoko nhaka yandakapa vanhu vangu vaIsiraeri kuti ive yavo achiti, “Chiregai muone ndava kuvadzipura munyika yavo iyoyi, ndichadzura imba yokwaJudha mukati mavo.

¹⁵Mushure mokunge ndavatipura kudaro, ndichavanzwirazve ngoni ndigovadzorerazve mumwe nomumwe kunhaka yake uyezve mumwe nomumwe kunyika kwake.

¹⁶Chichavapo ndechokuti, kana vakazonyatsodzidzawo nzira dzevanhu vangu dzokupika nezita rangu vachiti, ‘NaTenzi chaiye mupenyu,’ sezvavaingoitawo kurunzira vanhu vangu kupika naBhaari, ipapo ndopavachavaka vari mukati mavanhu vangu.

¹⁷Asi kuwana rudzi rusinganzwi, ndichanyatsorutipura ndirwuparadze, ndizvo zviri kutaura Tenzi.”